بۇگىن پرەزيدەنتتىڭ ەكونوميكالىق ماسەلەلەر بويىنشا شتاتتان تىس كەڭەسشىسى ولجاس قۇدايبەرگەنوۆ قىزمەتىنەن بوساتىلدى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي جەلىدە جازدى. 

«ولجاس قۇدايبەرگەنوۆ قازاقستان رەسپۋبليكاسى پرەزيدەنتىنىڭ ەكونوميكالىق ماسەلەلەر بويىنشا شتاتتان تىس كەڭەسشىسى قىزمەتىنەن بوساتىلدى. مەملەكەت باسشىسى قاسىم-جومارت توقاەۆ ولجاس ابدىمالىكۇلىنا ەكونوميكانى دامىتۋ جونىندەگى ۇسىنىستارى ءۇشىن العىس ايتتى»، - دەپ جازدى پرەزيدەنتتىڭ ءباسپاسوز حاتشىسى.

ولجاس قۇدايبەرگەنوۆ پرەزيدەنتتىڭ شتاتتان تىس كەڭەسشى بولىپ 2019 جىلدىڭ جەلتوقسانىندا تاعايىندالعان. كەڭەسشى قىزمەتىنە دەيىن CSI كونسالتينگتىك كومپانياسىنىڭ اعا سەرىكتەسى، 2014 جىلى ۇلتتىق بانكتىڭ توراعاسى قايرات كەلىمبەتوۆتىڭ (قازىر «استانا» حالىقارالىق قارجى ورتالىعىنىڭ باسشىسى) كەڭەسشىسى بولعان. «اتامەكەن» ۇلتتىق كاسىپكەرلەر پالاتاسى تورالقاسىنىڭ جانىنداعى ەكونوميكالىق ساراپشىلىق كەڭەستىڭ مۇشەسى.

الەۋمەتتىك جەلىدە وتكىر-وتكىر جازبالارىمەن تانىمال ولجاس قۇدايبەرگەنوۆ نەگە قىزمەتىنەن بوساتىلدى؟

ولجاس قۇدايبەرگەنوۆتىڭ ءوزى دە بۇل تۋرالى جەلىدەگى جەكە پاراقشاسىندا جازىپتى. ايتۋىنشا، ول اتالعان قىزمەتكە الدىن-الا كەلىسىم بويىنشا، 6 ايعا كەلگەن.

«وتكەن جىلدىڭ جەلتوقسانىندا بولعان كەزدەسۋدە پرەزيدەنت ءوزىنىڭ شتاتتان تىس كەڭەسشىسى بولۋدى ۇسىندى. سودان كەيىن ولار ماعان شامامەن التى ايدان كەيىن باسقا قىزمەتكە اۋىسۋعا بولاتىنىن ايتتى. مەن بۇل وزگەرىستى ماۋسىم ايىندا كۇتكەن ەدىم. بىراق ول كەزدە مۇمكىندىك بولماعان سياقتى.

بۇگىن تاڭەرتەڭ پرەزيدەنتتەن تەلەفون شالىپ، اتقارعان جۇمىستارىم ءۇشىن ريزاشىلىق ءبىلدىرىپ، روتاتسيا بۇگىننەن باستالعانىن ايتتى. قىسقاسى، قازىر مەن شتاتتان تىس كەڭەسشى ەمەسپىن.

بۇل قىزمەتكە اقى تولەنبەيدى، ەڭبەك كەلىسىم-شارتى، كەڭسە قىزمەتكەرلەرى جوق. الايدا، ماقتانىش سەزىمىن تۋدىراتىن ارتىقشىلىعى دا بار...

دەگەنمەن، وسى ۋاقىتقا دەيىنگى جازبالارىمدى شتاتتان تىس كەڭەسشىنىڭ ەمەس، جەكە ادامنىڭ جازبالارى رەتىندە كورسەتۋگە تىرىستىم. بۇل مارتەبە مەنىڭ كەيبىر وتكىر مالىمدەمەلەرىمدى ءجيى ساياسيلاندىرىپ جىبەرەتىن، ەندى كەلەسى جازبالارىمدا مۇنداي ساياسي تۇسىنىك بولمايدى دەپ ۇمىتتەنەمىن.

جالپى، وسى قىزمەتتە جۇرگەندە ادامدار ءۇشىن پايدالى بولاتىن نارسەنىڭ ءبارىن مۇمكىندىگىنشە جاساۋعا تىرىستىم. ءبىز بۇدان ءارى دە پايدالى بولا الامىز دەپ ۇمىتتەنەمىن. سونىمەن قاتار، بيزنەستە، مەملەكەتتىك ورگاندارمەن، اكىمشىلىكپەن ءارى قاراي جۇمىستا دا ەشتەڭە وزگەرمەيدى»،- دەدى ول.

بۇعان دەيىن، بىرنەشە كۇن بۇرىن قۇدايبەرگەنوۆ قازاقستاندا كوروناۆيرۋس جۇقتىرعاندار سانى 2 ميلليونعا جۋىق بولۋى مۇمكىن ەكەنىن ايتقان.

«قازىر كوروناۆيرۋسپەن اۋىرعانداردىڭ  رەسمي سانى 67 مىڭدى قۇرايدى، ال پنەۆمونيا اۋىرعاندار شامامەن 234 مىڭ(1 قاڭتاردان 15 شىلدەگە دەيىن). ەگەر ءبىز پنەۆمونيانىڭ تازا ءوسىمىن عانا الساق، وندا شامامەن 163 مىڭ بولادى. دەمەك، 67 + 163 = 230 مىڭ. بۇل مينيمۋم. ەگەر ءبىز ءوسىمدى ەمەس، بۇكىل كورسەتكىشتى الساق، وندا 230 مىڭ ەمەس، 301 مىڭ ناۋقاس بولادى. ارينە، ۇيدە اۋىرعان ادامدار بار. ولاردان قانداي ساندار كۇتىلەتىنى ءالى بەلگىسىز. جانە، رەسمي ساناققا كىرمەگەن تەك سيمپتومسىز ناۋقاستاردىڭ ءوزى 85% ەكەنىن  ەسكەرسەك، 2 ميلليونعا جۋىق قازاقستاندىق اۋىرعان نەمەسە اۋىرىپ جاتىر»، - دەپ جازعان بولاتىن.

سونىمەن قاتار ول ۆيرۋستان كەم دەگەندە ءتورت مىڭعا جۋىق ادام قايتىس بولعان دەدى.

«قازىر كوروناۆيرۋستان قايتىس بولعاندار سانى = 464. جىل باسىنان 15 شىلدەگە دەيىن پنەۆمونيادان قايتىس بولعاندار سانى 3 327 بولدى. بىلتىر وسى كەزەڭدە 1896 ادام قايتىس بولعان. ياعني، ءولىم كورسەتكىشى وتكەن جىلمەن سالىستىرعاندا 1,75 ەسەگە كوپ.

سوندا كوروناۆيرۋستان قايتىس بولعاندار ەڭ كەم دەگەندە 1895 ادام نەمەسە ماكسيمالدى تۇردە 3791 ادام قايتىس بولعان. بۇعان كوروناۆيرتان ەمدەلگەن، بىراق اۋرۋحانادا باسقا سەبەپتەردەن (ينسۋلت، ينفاركت جانە ت.ب.) قايتىس بولعان ادامداردى دا قوسۋ كەرەك»، - دەگەن ەدى پرەزيدەنتتىڭ ەكس-كەڭەسشىسى.

Abai.kz