قازىر ەل ىشىندە ىندەت ءورشىپ تۇرعانى بەلگىلى. الەۋمەتتىك جەلىلەردە ۇكىمەت قابىلداپ جاتقان شارالارعا قاتىستى سىني پىكىرلەر دە كوپ. شەشىلمەي تۇرعان تۇيتكىلدى ماسەلەلەر دە از ەمەس. الماتى، نۇر-سۇلتان سەكىلدى ءىرى قالالار مەن وبلىس ورتالىقتارىنداعى احۋال جايلى كۇندەلىكتى اقپاراتتاردان ەستىپ، كورىپ جۇرسىزدەر. ال وڭىرلەر شە؟ شالعاي جاتقان ايماقتارداعى اعايىننىڭ جاعدايى قالاي؟

ءماجىلىس دەپۋتاتى، «اق جول» پارتياسىنىڭ توراعاسى ازات پەرۋاشەۆ جۋىردا، ارقالىقتاعى اعايىننىڭ ارىز-تىلەگىن تىڭداپ كەلىپتى. سول ساپاردان از-كەم اقپارات جازعاندى ءجون كوردىك.

ساپار قوستاناي وبلىسىنىڭ ارقالىق وڭىرىنە جاسالعان. نەگە ارقالىق؟

«ەگەر نۇر-سۇلتان، الماتى قالالارى نەمەسە وبلىس ورتالىقتارى ۇنەمى قوعام نازارىندا بولسا، ال شالعاي جاتقان اۋىلداردا ادامدار ادىلەتسىزدىكپەن، قايعىمەن بەتپە-بەت كەلىپ، ەشكىمگە كەرەكسىز قالعانداي. ءبىزدىڭ باستى مىندەتىمىز – ونداعى ازاماتتاردىڭ اربىرىنە جەتۋ، ولار جالعىز ەمەس ەكەنىن جانە ولاردىڭ مۇقتاجدىقتارىن تىڭدايتىنىمىزدى جەتكىزۋ»، - دەيدى پەرۋاشەۆ.

ارقالىق جانە ونىڭ ماڭىنداعى اۋىلشارۋاشىلىق ايماقتار - قازاقستاندا شالعاي جاتقان ءوڭىر بولىپ سانالادى. ارقالىق قالاسى وڭىردەگى تەمىرجول ماگيسترالىنان الىس ورنالاسقان. اۆتوكولىكپەن وبلىس ورتالىعىنا جەتۋ ءۇشىن قۇرىلىسى اياقتالماعان (جوندەلىپ جاتقان), شاڭ توزاڭ جانە شوقالاق جولمەن جۇرگەندە 7 ساعاتقا جۋىق ۋاقىت قاجەت. وسىنداي گەوگرافيالىق جاعدايىنا قاراماستان، بۇل ايماق مەملەكەتتىك ورگاندار نازارىنان ۇنەمى تىس قالادى.

ءىس-ساپارى بارىسىندا ازات پەرۋاشەۆ جەرگىلىكتى اۋرۋحانا جۇمىسىمەن، ونداعى اتقارىلىپ جاتقان جۇمىستارمەن تانىسىپ، قاۋىپتى ىندەتپەن بەتپە-بەت كەلگەن دارىگەرلەرمەن سويلەسىپ، كوكەيكەستى ماسەلەلەرىن تىڭداعان.

«اق جول» پارتياسى ارقالىق دارىگەرلەرىنە كومەك بەردى

وڭىردەگى دارىگەرلەر دەنساۋلىق ساقتاۋ مينيسترلىگى اۋىسقاننان كەيىن ءدارى جەتىسپەۋشىلىگى توقتاعانىن ايتىپتى. وڭىردە Covid-19 ىندەتىن جۇقتىرعانداردىڭ دا سانى ازايىپ كەلەدى ەكەن. تەك مەديتسينالىق قىزمەتكەرلەرگە ارنالعان جەكە قورعانۋ قۇرالدارى مەن جوعارى قۋاتتى جاساندى دەمالۋ اپپاراتتارىنا مۇقتاج بار كورىنەدى.

ازات پەرۋاشەۆتىڭ ايتۋىنشا، ءدال ارقالىق وڭىرىنە ساپارلاپ بارۋعا وسى جاعدايلار سەبەپ بولعان. ارقالىق اۋرۋحاناسى باسشىلىعىنىڭ سۇراۋى بويىنشا «اق جول» دەموكراتيالىق پارتياسىنىڭ جەتەكشىسى ونداعى دارىگەرلەر مەن مەدقىزمەتكەرلەرگە جەكە قورعانۋ قۇرالدارىن (قورعانۋ كوستيۋمدەرى، ماسكالار مەن قولعاپتار), سونداي-اق، ءتيىستى دارەجەدەگى ءۇش جاساندى دەمالۋ اپپاراتتارىنىڭ قۇجاتتارىن تاپسىرىپتى. ول اپپاراتتار 27 شىلدە كۇنى جەتكىزىلەدى دەپ جوسپارلانىپ وتىر ەكەن.

بۇكىل ارقالىقتا جالعىز عانا رەنتگەن اپپاراتى بار

ازات پەرۋاشەۆ، سونداي-اق، اۋرۋحاناعا كەلۋشىلەرمەن سويلەسكەن. ولار اۋرۋحاناعا جاتقىزۋ كەزىندەگى بيۋروكراتيالىق كەدەرگىلەردى ايتىپ، شاعىمدانعان. مىندەتتى تۇردەگى ساراپتامالاردان ءوتۋ، ونىڭ ىشىندە رەنتگەننەن وتۋدەگى پروبلەمالار ءسوز بولعان.

تۇرعىنداردىڭ ايتۋىنشا، اۋرۋحانادا جالعىز رەنتگەن اپپاراتى جۇمىس ىستەيدى. ال وعان بىرنەشە كۇن بۇرىن كەزەككە جازىلادى ەكەن. اۋىلداردان وكپە قابىنۋى دەگەن كۇدىكپەن كەلگەن قارت كىسىلەر كەزەككە جازىلۋ ءۇشىن رەنتگەن كابينەتىن ىزدەۋگە ءماجبۇر. سوسىن كەزەككە جازىلىپ، كەزەگى كەلگەندە ارقالىققا قايتا كەلۋى ءتيىس. ولاردىڭ اۋىلدان ارقالىققا بارىپ-كەلۋى ءۇشىن كەمى 2-3 مىڭ تەڭگەلەرى تاعى جۇمسالادى.

«قازىر ەلىمىزدە وكپە قابىنۋى ءورشىپ تۇر. ادامدار تەزىرەك ساۋىعىپ كەتۋ ءۇشىن تەزىرەك اۋرۋحاناعا جاتقىزىلۋى ءتيىس. جاڭاعىداي بيۋروكراتيالىق كەدەرگىلەردەن سوڭ قارت كىسىلەر قولدارىن بىراق سىلتەپ، ۇندەمەي، ۇيلەرىنە قايتىپ كەتۋگە ءماجبۇر. اۋرۋحاناعا جاتىپ ەمدەلگەننەن، ۇيدە امالداعان وڭايىراق. ال ءتوزىمى جەتىپ، اۋرۋحانالارعا جاتقاندار – مەملەكەتتىك مەديتسينالىق كومەك بارلىق قاجەتتىلىكتى قامتىمايتىنىن ايتادى. كەيبىر ءدارى-دارمەكتى وزدەرى ساتىپ الادى ەكەن. زەينەتكەرلەردىڭ زەينەتاقىسى ونسىز دا باسقا تۇرمىستىق شىعىندارىنا جەتپەيدى. بۇل جاقتا ورتا جاستاعى ناۋقاستاردىڭ دا سانى از ەمەس»، – دەيدى پەرۋاشەۆ.

زاڭعا وزگەرتۋ ەنگىزۋ كەرەك!

ال ارقالىق قالاسىنىڭ اكىمى قايرات ابىشەۆ قازىر ەكىنشى رەنتگەن اپپاراتىن قوسقالى جاتقانىن ايتىپتى. ەندى اۋرۋحاناعا جاتقىزۋ جانە گوبمپ كولەمى بويىنشا ماسەلەلەر جەرگىلىكتى دارىگەرلەر قۇزىرىندا ەمەس كورىنەدى.

اۋرۋحانانىڭ باس دارىگەرى نۇرلان ەرجانوۆ وبلىس ورتالىعىنان 200-300 شاقىرىم الىس جەرلەردە ورنالاسقان مەديتسينالىق مەكەمەلەر ءۇشىن مەملەكەتتىك ساتىپ الۋ زاڭدارىنا وزگەرىستەر ەنگىز قاجەت دەيدى.

«جابدىقتىڭ كىشكەنتاي عانا بولشەگىن شۇعىل اۋىستىرۋ ءۇشىن بىزگە كوپ قۇجاتتار تولتىرۋ كەرەك. سوسىن ولاردى وبلىسقا جىبەرىپ، كەلىسىمىن كۇتەمىز. بارىپ-كەلۋدىڭ وزىنە 15-16 ساعات كەتەدى. ودان وبلىستىڭ كەلىسىمى مەن ولار ەنگىزگەن تۇزەتۋلەردى كۇتۋ ءۇشىن كەم دەگەندە 1 اپتا ۋاقىت كەتەدى. وسى كەزدە جاڭاعى جابدىقتاردىڭ جۇمىسى توقتاپ تۇرادى. دارىگەرلىك ساراپتامالار، وپەراتسيالار توقتاتىلادى، جۇمىس كەستەسى بۇزىلادى. سوندىقتان دا، قاجەتتى تۇسىنىكتەمەلەر كەرەك.  مىسالى، كەيبىر اۋرۋحانالار وزدەرى شەشە الاتىن قاراجات سومالارى بويىنشا ناقتى انىقتاما تۇسىنىكتەر كەرەك»، - دەيدى باس دارىگەر.

دەپۋتات ازات پەرۋاشەۆ، اتالعان ماسەلەلەردى، ونىڭ ىشىندە، مەملەكەت جانە الەۋمەتتىك  مەديتسينالىق ساقتاندىرۋ تاراپىنان قامتامسىز ەتىلەتىن دارىلەر ءتىزىمىن ۇلعايتۋ جونىندە ۇكىمەت پەن دەنساۋلىق ساقتاۋ مينيسترىلىگىنە جەتكىزىپ، ماسەلە ەتىپ كوتەرۋگە ۋادە بەرگەن.

تۇرعىنداردىڭ جانايقايى

ونان سوڭ، ازات تۇرلىبەكۇلى پاندەميا مەن وكپە قابىنۋىنان قايتىس بولعانداردىڭ تۋىستارىمەن جولىققان. كەزدەسۋگە كەلگەندەر دارىگەرلەردىڭ ولاردىڭ تۋىستارىنا قاراماعانىن ايتىپ، دارىلەردىڭ، يۆل اپپاراتتارىنىڭ جوقتىعىن، شۇعىل ەمدەۋ شارالارىنىڭ سوزىلۋىن، ءمايىتحانالار جۇمىسىنىڭ رەتسىزدىگىن ايتقان.

جيىنعا كەلگەندەر: «شىندىقتى ايتىڭىز، شىندىقتى»، دەپ اشىنا سويلەپ، «سىزگە وتىرىك ايتادى، قايتىس بولعان ادامنىڭ سۇيەگىن ايقاي-شۋمەن الامىز»، - دەپ دارىگەرلەرگە وكپەلەرىن جەتكىزدى.

اۋرۋحانانىڭ باس مەدبيكەسى ايگۇل مۇقانبەتجانوۆا كوزىنە جاس السا دا، جاۋاپ بەردى:

«بۇل شىندىققا جاتپايدى. ءبىز قولىمىزدان كەلگەنىن جاساۋدامىز. ءاربىر ادامنىڭ ءومىرى ءۇشىن ارپالىستىق، ءوز تۋعاندارىمىزداي جانىمىز اشىدى. ءاربىر ادامنىڭ ءولىمى بىزگە دە اۋىر تيەدى.  مايىتحاناعا قايتىس بولعانداردىڭ سۇيەگىن تازا اپارامىز، ول جەردە قان دا بار، ءيىس تە شىعادى، ويتكەنى ءمايىتحانا»، - دەيدى ايگۇل حانىم.

پەرۋاشەۆ: بۇل - تۇتاستاي ەمدەۋ جۇيەسىندەگى قاتەلىك!

دارىگەرلەردىڭ ايتۋىنشا، اشىنا سويلەپ، ارىز ايتقان تۇرعىننىڭ تۋىسىنىڭ اۋرۋى اسقىنىپ، اۋرۋحاناعا كەش جەتكىزىلگەن. وكپەسىنىڭ 50 پايىزى اسقىنىپ، پوليورگاندىق جەتىسپەۋشىلىككە شالدىققان. جەدەل رەابيليتاتسيالىق شارالار قابىلدانعانىمەن، تۋىستارى جەتكەنشە قايتىس

«ءاربىر قازا ءبىزدىڭ ورتاق قايعىمىز. قازىر ىندەت ءورشىپ تۇر. قازا بولعاندار دا از ەمەس. بۇل - ءبىر وقيعاداعى عانا قاتەلىك ەمەس، بۇل – تۇتاستاي ەمدەۋ جۇيەسىندەگى قاتەلىكتەر. مەن دارىگەر ەمەسپىن.  سوندىقتان ەشقانداي اقىل ايتىپ، كەڭەس بەرە المايمىن. بىراق، ەكونوميكا مەن ستاتيستيكانى جاقسى بىلەمىن. وسى تۇرعىدان العاندا، كوروناۆيرۋس پەن وكپە اۋرۋلارىنىڭ ءبىر مەزگىلدە ءورشۋى مەن ونىڭ قۇرباندارىنىڭ وسىنداي ۇلكەن كولەمدە بولۋى، وسى دەرتتەردىڭ ءبىر-بىرىمەن تىعىز بايلانىستا جانە ولاردىڭ جالپى تابيعاتى بىردەي ەكەنىن كورسەتەدى.

وسى ىندەتتىڭ ەمىن بۇكىل الەم ىزدەپ جاتىر. بۇل ءبارىمىزدىڭ ورتاق قايعىمىز. بۇل سوزدەر سىزدەردى جۇباتپايتىنىن بىلەمىن، سىزدەرمەن قازىر بۇكىل ەل، ءتىپتى، بۇكىل ادامزات بىرگە دەر ەدىم. ەرتە مە، كەش پە شەشىمى تابىلادى. ال قازىر اۋىرعانداردى اۋرۋحانادا توسەك ورنىمەن، ءدارى-دارمەكپەن، مەدجابدىقتارمەن تولىقتاي قامتۋىمىز كەرەك. ولاردى كابينەت-كابينەتتەرگە جۇگىرتىپ قويۋدى توقتاتۋ كەرەك.

مەنىڭ كورگەنىم ماعان قاتتى اسەر ەتتى. سىزدەر وزدەرىڭىزدىڭ وتباسىلارىڭىزدى، جاقىندارىڭىزدى ىسىرىپ قويىپ ازاماتتىق ەرلىك جاساپ جاتىرسىزدار. وسىنىڭ ءبارى باسقا ادامداردىڭ ءومىرىن ساقتاپ قالۋ ءۇشىن. بۇگىن ايتىلعان اۋىر سوزدەر كىمنىڭ بولماسىن جۇرەگىن جارالايدى، دەگەنمەن سىزدەردىڭ ەرلىكتەرىڭىزدى ەل باعالاپ وتىر»، - دەيدى ازات پەرۋاشەۆ.

سونىمەن بىرگە، ازات پەرۋاشەۆ مەدقىزمەتكەرلەردى ايتىلعان سىنعا تۇسىنىكپەن قاراۋىن سۇرادى.

«مەن وتىنىشتەردى تەكسەرۋدى سۇرادىم. تۇسىنىڭىزدەر، مۇنداي جاعدايدا كىم بولماسىن شەكتەن شىعىپ كەتۋى مۇمكىن. مۇنى ادامي تۇرعىدان تۇسىنۋگە بولادى، ادامداردىڭ قايعىسىنا جانە ولاردىڭ سەزىمدەرىنە تۇسىنىستىكپەن قارايىق. تەكسەرۋلەر بارلىق سۇراقتارعا جاۋاپ بەرەدى دەپ ۇمىتتەنەمىن. سىزدەرگە تەمىردەي جۇيكە، ءتوزىم مەن تۇسىنىستىك تىلەيمىن. سابىر ەتەيىك»، - دەدى پەرۋاشەۆ.

قايىرىمدىلىق اكتسياسى

وسىدان سوڭ، «اق جول» فراكتسياسىنىڭ باسشىسى ارقالىقتا قايىرىمدىلىق اكتسياسىن وتكىزىپتى.

جەرگىلىكتى دۇكەننەن 30 قاپ ۇن، قانت، وسىمدىك مايى ت.ب. كۇندەلىكتى تۇرمىسقا قاجەتتى ازىق-تۇلىك تاۋارلارىن ساتىپ الىپ، تۇرمىسى تومەن جانە كوپ بالالى وتباسىلارعا ۇلەستىرگەن. كومەككە مۇجتاج وتباسىلاردىڭ ءتىزىمىن پارتيانىڭ جەرگىلىكتى فيليالى ازىرلەگەن ەكەن.

كەزدەسۋ بارىسىندا تۇرعىندار ۇكىمەتتەن بەرىلەتىن 42 500 تەڭگەلىك جاردەماقىنى الۋ مۇمكىندىگىنىڭ جوقتىعىن ايتىپ، شاعىمدانعان.

مىسالى، ارقالىق تۇرعىنى كۇلرايحان مولدابەكوۆانىڭ كۇيەۋى استانا بازارىندا ساۋدا جاساپ، جۇمىس ىستەگەن. جۇمىس بەرۋشى رەسمي ەڭبەكاقى تولەمەي، تەك، كۇنىنە 2-3 مىڭ تەڭگە تولەپ تۇرعان. تج  ەنگىزىلگەن سوڭ، ول تابىس كوزىنەن ايىرىلعان. ەندى سونى رەسمي دالەلدەي الماعان.

تاعى ءبىر جاعداي، كوپبالالى انا تايشينا ميرامگۇلدى «اسپ» الۋدان ايىرعان. سەبەبىن ءوزى دە بىلمەيدى. ايتۋىنشا، تابىسى ءۇشىن سياقتى (جۇمىسقا ورنالاسقان), بىراق، جالاقىسىنىڭ ازدىعى سونشالىقتى، ودان دا جۇمىستان شىعىپ، بالالارعا ارنالعان اسپ العاننىڭ جەڭىلدىگىن ايتادى.

ال اۋىلداعىلاردىڭ كەيبىرى ءتىپتى، جاردەماقى الۋعا قۇقىلارى بارىن، قالاي ءوتىنىش بەرۋ كەرەگىن دە بىلمەيتىن كورىنەدى. وسىعان بايلانىستى دەپۋتات اكىمدىك وكىلىنەن مۇقتاج وتباسىلاردىڭ ءتىزىمىن  سۇراپ بىلگەن. اڭگىمە بارىسىندا ءماسليحات حاتشىسى گۇلبانۋ ەرتاەۆا كوپتەگەن جەرلەستەرىنىڭ قيىن جاعدايىن جاقسى بىلەتىنىن جەتكىزدى.

ايەلى ءبىر اپتا بۇرىن قايتىس بولعان، التى بالامەن جالعىز قالعان سەرىك باجانوۆ دەپۋتاتقا جاعدايىن ايتىپ، باسپانا سۇراعان.

«مەن ارقالىقتا جۇمىس ىستەيمىن. ۇلكەن بالالارىم ستۋدەنت، ال كىشكەنتاي ءتورت بالامدى وزدەرىن جالعىز قالدىرۋ قورقىنىشتى. قالاعا كوشەيىن دەپ ەدىم، سول جەردەن قانداي بولسا دا باسپانا تابىلسا»، - دەيدى سەرىك باجانوۆ.

«قازىر تۇرعىن ءۇي قۇرىلىس جيناق بانكى «5-10-20» باعدارلاماسىن ىسكە قوسىپ جاتىر. كوپتەگەن وڭىرلەردە اكىمدىكتەر بۇرىنعى باعدارلاما بويىنشا دا ازاماتتارعا العاشقى جارنا ءۇشىن سەرتيفيكاتتار بەرۋدە. وسىنداي جاعداي ءۇشىن قانداي بولماسىن ءبىر قادام جاساۋ قاجەت شىعار. مەن بۇل ماسەلەنى بانك ءتورايىمى ءلاززات يبراگيموۆامەن تالقىلايىن»،- دەدى دەپۋتات.

ازات پەرۋاشەۆ: بارلىق بالا ءبىر تەلەفونمەن وقىپ جاتىر

ءماجىلىس دەپۋتاتى كوپبالالى وتباسىلاردى ارالاعان كەزدە بىرقاتار تۇيتكىلدى ماسەلەلەرگە توقتالعان.

مىسالى،  جۇلدىز ەرمۋرادوۆا كۇيەۋىمەن 5 جىل بۇرىن ۇيلەرى ورتەنىپ كەتىپ، سودان بەرى ءۇي جالداپ تۇرادى ەكەن. كۇيەۋىن جۇمىستا ءوندىرىس تومەندەگەن سوڭ، كارانتين الدىندا ءوزىنىڭ ءوتىنىشى بويىنشا ارىز جازدىرىپ، جۇمىستان كەتۋگە ماجبۇرلەگەن. سوندىقتان دا جاردەماقى الۋعا ءۇمىتى بولماعان. جۇلدىزدىڭ ءوزى ۇيدە وتىرىپ تابىس تابادى. تۇراقتى تابىستىڭ جوقتىعىنا قاراماستان 4 بالاعا قاشىقتىقتان ساباق وقۋ ءۇشىن ءبىر تەلەفون ساتىپ العان.

جۇلدىز مەكتەپ مۇعالىمدەرىنە، جالپى كەستەمەن ەمەس، ۇيدەگى جالعىز تەلەفونعا بايلانىستى جەكە   شۇعىلدانۋعا كەلىسكەنىنە راحمەتىن ايتىپتى. ءبىر ماسەلە - مۇنداي جەكە ساباقتار ءتۇن باتقانعا دەيىن سوزىلادى ەكەن.

مۇنداي پروبلەما تۋرالى گۇلفايرۋس برالينا دا ايتقان. ال ايەلى قايتىس بولعان سەرىك باجانوۆ  از عانا جالاقىسىنا قاراماستان نەسيە الىپ، مەكتەپتە وقيتىن بالالارىنىڭ بارىنە تەلەفون الىپ بەرگەن.

«وسى تۇستا، وسىدان ءبىر عاسىر بۇرىن بريتان ينجەنەرى دجون ۋيلدورف ۋوردەلدىڭ: «قازاقتار ءوزىنىڭ تابيعاتىندا قانداي سەزىمتال حالىق دەسەڭشى، بالالارىن سونداي جاقسى كورەدى، ...بىلىمگە دەگەن  قۇلشىنىستارى زور» («ۆ كازاحسكيح ستەپياح»، س.366) دەگەن سوزدەرى ەرىكسىز ەسكە تۇسەدى»، - دەيدى دەپۋتات.

ازات پەرۋاشەۆ «اق جول» فيليالىنا وسى وتباسىلاردى كومپيۋتەر نەمەسە تەلەفوندارمەن (ينتەرنەتتىڭ بولۋىنا قاراي) قامتاماسىز ەتۋدى تاپسىردى.

ارقالىققا جاساعان ساپارى بارىسىندا پارتيا توراعاسى وڭىردەگى وندىرىستىك نىساندارعا دا ات باسىن بۇرعان ەكەن. ارقالىق تەتس  رەكونسترۋكتسياسى جۇمىستارىنىڭ بارىسىمەن تانىسقان. وسى جۇمىستارعا وبلىس باسشىلىعى 8 ميللياردتان استام قاراجات بولگەن. جۇمىس كارانتيندىك شەكتەۋلەرگە قاراماستان كەلەسى جىلى اياقتاۋ جوسپارلانعان. ارقالىق تەتس-ءىن مازۋتتان شۇباركول كومىرىنە اۋىستىرۋ كوزدەلگەن. ول شىعىنداردى ەداۋىر تومەندەتىپ، ءوڭىردىڭ وندىرىستىك الەۋەتىن دامىتۋ ءۇشىن رەزەرۆتىك قۋاتتىلىعىن ارتتىرادى-مىس.

سونان سوڭ، «تورعاي ەت» ەت وڭدەۋ كەشەنىنە جانە وڭىردەگى دارىحانالارعا بارعان. ارقالىق قالاسىنىڭ اكىمى وڭىردەگى ءدارى جەتىسپەۋشىلىگىن مويىنداپ سويلەپ، پروبلەمالاردىڭ بارىن ايتقان.

«بۇل - دەنساۋلىق ساقتاۋ مينيسترلىگىنىڭ ماسەلەنى «تولىقتاي شەشۋ» تۋرالى ەسەپتەرىنە قايشى كەلسە دە، قۇرمەتكە لايىق شىندىق. بارلىق ءدارىحانالاردىڭ الدى ۇزىن-سونار كەزەككە تولى. كىرە بەرىستەرىندە: «پاراتسەتومول، ليدوكوين، تسەفازولين، اسكوربينوۆايا كيسلوتا جوق» دەگەن جازۋلار جازىلعان. دارىلەردىڭ كەيبىر اتاۋلارى سىزىلىپ، كەيبىرەۋلەرى بۇرىنعىلاردىڭ ۇستىنەن جاڭادان جازىلعان»، - دەيدى دەپۋتات.

ازات پەرۋاشەۆ قالانىڭ ءار جەرىندەگى 3 ءدارىحانادا كەزەكتە تۇرىپ، تۇتىنۋشىلار مەن ساتۋشىلارمەن سويلەسكەن.

ءدارىحاناشىلار «سك-فارماتسيانىڭ» مەملەكەتتىك مەكەمەلەردى جەتكىزۋ تۋرالى مالىمدەمەسىنە نارازى.

«بىزگە ءوزىمىزدىڭ قازاقستاننىڭ ازاماتتارى عوي كەلەتىن. نەلىكتەن ولارعا ءدارى جەتپەيدى؟ ولاردىڭ كىناسى نە؟ ءبىز ءدارى-دارمەك بەرۋدى سۇرامايمىز، ءبىز ولاردى «سك-فارماكسيادان» ساتىپ الۋعا دايىنبىز. قازىر نارىقتى تولىقتىرۋ كەرەك، دۇربەلەڭدى تومەندەتۋ كەرەك. مەملەكەتتەن ءدارى-دارمەك الۋ ءۇشىن ادام اۋرۋحاناعا بارۋى كەرەك، ونىڭ اۋرۋحاناعا دەرەۋ قابىلداۋى وتە قيىن. بىراق، ولار ەمدەلۋى كەرەك. سودان سوڭ ولار بىزگە كەلەدى، ال ءبىز كومەكتەسە المايمىز. ەگەر ايماقتىق ۇيىمدا ءدارى-دارمەك بولىپ، ءبىز ونى ساتىپ تاۋىسساق، ولاردىڭ ورنىن تولىقتىرۋعا كەمىندە ءتورت كۇن قاجەت. ادامدار كەيدە ەكى-ءۇش كۇندە قايتىس بولىپ كەتىپ جاتىر.

حالىق باعانىڭ قىمباتتاعانىنا قاراماي دارىلەردى ساتىپ الۋدا. اكەسىن، اناسىن قۇتقارۋ ءۇشىن نەسيە العاندار دا بار.

ارقالىق سىندى كىشكەنتاي قالادا بىرەۋدىڭ قيىندىعىن ءوز پايدامىزعا جاراتا المايمىز. ءبارىمىز ءبىر-بىرىمىزگە تۋىسپىز، كورشىمىز، سىنىپتاسپىز.

قازىر باعانىڭ تۇراقتالعانى جاقسى بولدى. «سك-فارماتسيا» ۇستەمە باعامەن باسقالارعا ساتتى دەگەن سىبىس بار. ودان دا جەكە دارىحانالارعا رەسمي بەرگەنى جاقسى ەدى»، - دەيدى ءدارىحاناشىلار.

«مۇمكىن، ءبىز دەنساۋلىق ساقتاۋ مينيسترلىگىنە ءدارىحانالاردا ەمدى تاعايىنداۋ ءۇشىن جىلجىمالى تەراپەۆتىك پۋنكتتەر ورناتۋدى ۇسىنامىز. ال «سك-فارماتسيا» جەكەمەنشىك دارىحانالارعا ءدارى-دارمەك جەتكىزۋدى پىسىقتاۋى كەرەك»، - دەدى «اق جول» باسشىسى.

ساپار سوڭىندا ازات پەرۋاشەۆ 1923 جىلى بولشەۆيكتەر ءولتىرىپ، باسىن كەسكەن جەرگىلىكتى ۇلت-ازاتتىق قوزعالىسىنىڭ جەتەكشىسى كەيكى باتىردىڭ كەسەنەسىنە باردى. ۇلت باتىرىنىڭ باس سۇيەگىن رەسەي ۇكىمەتى قازاقستانعا 2016 جىلى قايتارىپ بەرگەن.

Abai.kz