.png)
ءبىرپارتيالى سەنات كوپپارتيالى ءماجىلىستىڭ ءۇنىن وشىرەتىن تسەنزۋراعا اينالعان!
قازاقستاندا ساياسي رەفورمالار، تسيفرلاندىرۋ مەن شەتەلدىك ينۆەستيتسيالار تۋرالى كەلىسىمدەر توڭىرەگىندەگى پىكىرتالاستار بارعان سايىن ۇدەپ بارادى.
«اق جول» پارتياسىنىڭ جەتەكشىسى، ءماجىلىس دەپۋتاتى ازات پەرۋاشەۆ «ەندى نە ىستەيمىز؟» YouTube ارناسىنا بەرگەن سۇحباتىندا وسى تاقىرىپتارعا قاتىستى ءوز پىكىرىمەن ءبولىستى. ونىڭ سوزىنەن اڭعارعانىمىز: ەلدى الاڭداتىپ وتىرعان باستى ماسەلە – بيلىكتىڭ جاۋاپكەرشىلىگى مەن جۇيەسىزدىگى، ال ەڭ وتكىر تۇسى – سەناتتىڭ ساياسي تسەنزۋرا رەتىندەگى ءرولى.
پەرۋاشەۆ پرەزيدەنتتىڭ بيىلعى جولداۋىنا توقتالدى. جولداۋ ەل كۇتكەن ۇلكەن ءۇمىتتىڭ جۇگىن ارقالاعانىمەن، ونىڭ ورىندالۋى باسقا اڭگىمە ەكەنىن دەپۋتات اشىق ايتتى. ول اسىرەسە اۋىل شارۋاشىلىعى ونىمدەرىندەگى قايشىلىقتى مىسال ەتتى:
«ەلىمىز ءسۇت ءوندىرىسىن ارتتىرىپ جاتقانىمەن، دۇكەن سورەلەرىندە رەسەي مەن بەلارۋس ونىمدەرى باسىم. بۇل – وتاندىق وندىرۋشىلەردى قولداۋ ورنىنا سىرتقى نارىققا جاعداي جاساپ وتىرعان ۇكىمەتتىڭ سەلقوستىعىنىڭ دالەلى. پرەزيدەنتىمىزدىڭ ءوزى اشىق سىناپ وتىرسا، بۇل بيلىك ورگاندارىنىڭ سالاقتىقتان بولەك، ۇلتتىق مۇددەگە نەمقۇرايدىلىعى»، – دەدى ول.
وسى نەمقۇرايدىلىقتىڭ ەكىنشى قىرى تسيفرلاندىرۋ سالاسىندا دا ايقىن كورىنەدى. جاساندى ينتەللەكت مينيسترلىگىن قۇرۋ تۋرالى ۇسىنىس قوعامدى ەكىگە جارسا، پەرۋاشەۆ ماسەلەنىڭ ءمانىن باسقاشا قويادى. ونىڭ ايتۋىنشا:
«قازاقستان ازىرگە جاساندى ينتەللەكتتى ءوندىرۋشى ەمەس، تۇتىنۋشى ەل. جاستاردىڭ الەۋەتى زور بولعانىمەن، مەملەكەتتىڭ قولداۋى جەتكىلىكسىز. ال تسيفرلاندىرۋعا ءبولىنىپ جاتقان ميللياردتاعان قارجى باقىلاۋسىز كەتىپ جاتىر. ءار مينيسترلىك پەن اكىمدىك ءوز بەتىنشە جۇيەسىز باعدارلاما ەنگىزىپ، ىسىراپشىلدىق ورشۋدە. ماسەلەن، پاۆلودار وبلىسىنداعى ءبىر جوباعا 8,6 ملرد تەڭگە جۇمسالعان. بۇل اقىلعا قونبايدى، ال قىتايدا مۇنداي جوبالار ەكى-ءۇش ەسە ارزانعا تۇسەدى»، – دەپ ءتۇيدى دەپۋتات.
ياعني، ماسەلە جاڭا مينيسترلىك قۇرۋدا ەمەس، بار باعدارلامالاردى ورتالىقتاندىرۋدا، باقىلاۋدى كۇشەيتىپ، ىسىراپتى توقتاتۋدا.
بىراق بيلىكتىڭ «جاسىرىن» ساياساتى تسيفرلاندىرۋمەن شەكتەلمەيدى. شەتەلدىك ينۆەستيتسيالار كەلىسىمدەرى حالىقتان قۇپيا ۇستالىپ كەلەدى. پەرۋاشەۆ كاتاردان تارتىلعان قارجىدان باستاپ مۇناي-گاز سەكتورىنداعى ۇلەسكە دەيىنگى مالىمەتتەردىڭ نەگە جاريالانبايتىنىن سۇرايدى.
«ءادىل كەلىسىم جاسالسا، ينۆەستورلاردىڭ ءوزى ونى ماقتانىشپەن جاريالار ەدى. ەگەر جاسىرسا – دەمەك، شارت ادىلەتسىز»، – دەيدى ول.
راسىندا دا، كەيبىر بەيرەسمي دەرەكتەر بويىنشا، قاشاعاندا قزاقستان مۇنايدان نەبارى 2 پايىز عانا تابىس العان. سوڭعى جىلدارى بۇل ۇلەس 10 پايىزعا دەيىن كوتەرىلدى دەگەن اقپارات بار، بىراق ناقتى دەرەك ءالى دە قۇپيا. بۇل – مەملەكەتتىڭ ۇلتتىق مۇددەسىن ساۋدالاۋعا ۇقسايتىن قاۋىپتى تەندەنتسيا.
وسىنىڭ ءبارىن قورىتىندىلاي كەلە، پەرۋاشەۆ سەناتتىڭ قازىرگى ءرولىن قاتتى سىنادى. ونىڭ پىكىرىنشە، ماجىلىستە تالقىلانىپ، قوعام مۇددەسىن قورعايتىن زاڭدار سەناتقا كەلگەندە تەجەلىپ، «سۇزگىدەن» وتپەي قالادى.
«نەگىزىنەن بيلىك پارتياسىنىڭ وكىلدەرى وتىرعان ءبىرپارتيالى سەنات كوپپارتيالى ءماجىلىستىڭ ءۇنىن وشىرەتىن ساياسي تسەنزۋراعا اينالعان. ءبىز ۋنيتارلى مەملەكەتپىز، ءار ايماققا بولەك زاڭ قاجەت ەمەس. سەنات تەك بيلىكتىڭ ىڭعايىنا جۇمىس ىستەپ وتىر. سوندىقتان ءبىر پالاتالى پارلامەنتكە كوشۋ – ۋاقىت تالابى»، – دەدى ول.
بۇل پىكىردى ول كەزدەيسوق ايتقان جوق. پەرۋاشەۆ 2017 جىلى-اق، سەناتتى تاراتىپ، ءبىر پالاتالى جۇيەگە كوشۋ جونىندە باستاما كوتەرگەنىن ەسكە سالدى. الايدا ول كەزدە سەنات ءتورايىمى بولعان داريعا نازارباەۆا بۇل ۇسىنىسقا ءۇزىلدى-كەسىلدى قارسى شىققان.
«داريعا نازارباەۆا باستاعان سەناتورلار ءبىزدى «كونستيتۋتسياعا قول سۇعاسىڭدار» دەپ ايىپتاپ، باستامانى وتكىزبەۋگە بارىن سالدى. ويتكەنى سەنات – ولاردىڭ ساياسي ىقپالىن ساقتاپ قالۋدىڭ تەتىگى ەدى»، – دەيدى دەپۋتات.
وسى ارقىلى ول سەناتتىڭ شىن مانىندە حالىق مۇددەسىن ەمەس، بيلىكتەگى توپتاردىڭ مۇددەسىن قورعاپ وتىرعانىن اشىق كورسەتتى.
پەرۋاشەۆتىڭ بۇل سىندارى – جەكە ءبىر پارتيانىڭ ۇستانىمى عانا ەمەس، قوعامدا قوردالانعان تۇيتكىلدەردىڭ ايناسى. ءبىر جاعىنان، پرەزيدەنتتىڭ جولداۋىنداعى جاڭا باستامالار حالىققا ءۇمىت سىيلايدى، ەكىنشى جاعىنان، ولاردى ىسكە اسىراتىن بيلىك ورگاندارىنىڭ نەمقۇرايدىلىعى سول ءۇمىتتى قايتا ءسوندىرىپ وتىر. ميللياردتاعان قارجىنىڭ جەلگە ۇشۋى، ۇلتتىق بايلىقتىڭ قۇپيا كەلىسىمدەرمەن تالان-تاراجعا ءتۇسۋى، سەناتتىڭ ساياسي تەجەۋىشكە اينالۋى – وسىنىڭ ءبارى شىن مانىندە ەلدىڭ بولاشاعىنا تىكەلەي قاۋىپ.
بۇل سۇحباتتىڭ تولىق نۇسقاسىن «ەندى نە ىستەيمىز؟» YouTube ارناسىنان كورە الاسىزدار...
;t=41sAbai.kz
