ارداقتى اعايىن!

بۇگىن العاشقى جۇمىس كۇنىم اياقتالدى. قۇتتىقتاۋلارىڭىزعا راقمەت.

مەملەكەتتىك قىزمەتتەن تىس ءجۇرىپ تە مەملەكەتكە قىزمەت ەتۋگە بولادى. وسى ويعا بەكىنىپ، مەمقىزمەتتەن قاشقاقتاپ ءجۇر ەدىم.

سوڭعى ايدا كورگەن ىندەت ويىمدى ءبىراز وزگەرتتى.

شىمكەنت قالاسىنىڭ اكىمى مۇرات ايتەنوۆ وتكەن اپتادا ۇسىنىس جاسادى. ءبىراز سويلەستىك. بۇرىن سىرتىنان عانا تانۋشى ەدىم. ۇسىنىسقا تاڭعالدىم. وعان ويىن اشىق ايتىپ جۇرگەن مەننەن گورى، بۇرىننان تانيتىن، ياعني سەنىمدى ادام قولايلى ەمەس پە دەپ ويلادىم. ءبىراز سويلەسكەن سوڭ ايتەنوۆ مىرزانىڭ شىمكەنتكە بارىن سالىپ ادال قىزمەت ەتكىسى كەلەتىنىن سەزدىم.

ەندى نە ىستەمەكپىن؟

بىرىنشىدەن، دەنساۋلاق ساقتاۋ سالاسى. ادام قولىن كەسىپ السا، ول جەرگە سۋ جينالىپ، جارا پايدا بولادى. سەبەبى ادام اعزاسىنىڭ جاسۋشالارى جارانى جازۋعا جينالادى. قازىر سونداي جاعداي. قالانىڭ بۇكىل كۇش-قۋاتى جارانى جازۋعا جۇمىلدىرىلىپ جاتىر.

ەكىنشىدەن، ءبىلىم سالاسى. قاراپايىم اتا-انا رەتىندە وتكەن وقۋ جىلىن اۋپىرىمدەپ وتكەردىك. اتا-انالارعا دا، مۇعالىمدەرگە دە وڭاي بولعان جوق. جاڭا وقۋ جىلى دا وڭاي بولمايدى. دەگەنمەن ونلاين مەكتەپتىڭ ساپاسى تۇسپەۋگە ءتيىس.

ۇشىنشىدەن، كوممۋنيكاتسيا. ءار ءىستىڭ تابىستىلىعى 55% كوممۋنيكاتسياعا بايلانىستى. كولدەنەڭ كوممۋنيكاتسيا ەشقاشان قيىن بولعان ەمەس. اڭگىمە تىك، ياعني تومەننەن جوعارىعا، جوعارىدان تومەنگە جۇرەتىن كوممۋنيكاتسيا. سوندىقتان، بايلانىستىڭ ءداستۇرلى تۇرىنە قوسا، ءوزىمنىڭ قىزمەتتىك WhatsApp نومىرىمە (+77007007091) اسا ماڭىزدى سۇراعى بار ادام تىكەلەي جازىپ جىبەرىڭىز.

ءتورتىنشى، مادەنيەت. كومپانيالاردا "كورپوراتيۆتىك مادەنيەت" دەگەن تۇسىنىك بار. ونى قالىپتاستىرۋعا ۇزاق ۋاقىت كەرەك. ەگەر قالىپتاسسا، ول كومپانيانى كەلىپ-كەتەتىن باسشىلار ەمەس، مادەنيەت باسقارادى. سوندىقتان، مادەنيەت دەگەندە تەك ونەر مەن مۋزىكانى مەڭزەپ تۇرعانىم جوق. سول سياقتى جاقسى قۇندىلىقتاردان باستاۋ الاتىن شىمكەنتتىك مادەنيەتتى ارى قاراي ورنىقتىرۋ.

بەسىنشى، بىرلىك. قازاقستانداعى ارالۋاندىق ء(تىل، ءدىن، ەتنوس، مارتەبە، كوزقاراس) الاۋىزدىققا ەمەس، اۋىزبىرشىلىككە سەبەپ بولارداي ۇيلەسىم تابۋ. ءبىر ءتۇستى گۇلدەن، ءتۇرلى ءتۇستى گۇلدەن جاسالعان گۇلشوعى ادەمى. ارالۋاندىق دەگەن - بايلىق، اسەمدىك، ادەمىلىك. قانداي ولشەم بويىنشا ءارالۋان بولساق تا، ماقسات ءبىر بولسا، بىرلىك بولادى. ول ماقسات، مەنىڭشە، قازاقستاننىڭ بولاشاعى، ەلىمىزدى دامىعان مەملەكەتكە اينالدىرۋ.

التىنشى، جاستار. نە شىقسا دا جاستاردان شىعادى. جاستارعا جاڭا كاسىپ ۇيرەتىپ، جىگەرلەندىرىپ، جاڭا ورىستەر اشۋ. جاستاردى قۋاتتاندىرۋ دا باستى باستى مىندەتىم بولماق.

جەتىنشى، قالانىڭ دامۋىنا حالىقتى قاتىستىرۋ (public engagement). حالىق اكىمدىك پەن ءماسليحات قابىلدايتىن ماڭىزدى شەشىمدەردە ءوزىنىڭ قاتىسى بارىن سەزىنۋى ءتيىس. ۇكىمەتتىك ەمەس ۇيىمدار وسى جۇمىستا باستاماشىلدىق تانىتقانى ءجون. تۇپتەپ كەلگەندە قوعامدىق ۇيىمدار مەملەكەتتىك ورگاندار اتقارىپ وتىرعان فۋنكتسيانىڭ بىرقاتارىن وزدەرى اتقاراتىن جاعدايعا جەتۋى ءتيىس.

سەگىزىنشى، سەنىم. وسى جۇمىستىڭ بارلىعىن اتقارۋ ءۇشىن حالىقتىڭ سەنىمى قاجەت. سەنىمنىڭ فورمۋلاسى ءادىل شەشىم مەن ادال ەڭبەك. سەنىمگە سەلكەۋ تۇسىرەتىن كوپ فاكتوردىڭ ءبىرى سىبايلاس جەمقورلىق. بۇل دا ءبىر ۆيرۋس. ونىمەن ءار ازامات كوروناۆيرۋسپەن كۇرەسكەندەي كۇرەسسە عانا جەڭبەك. ءوزىم باسقاراتىن الەۋمەتتىك سالا قىزمەتكەرلەرىن تازا جۇمىس ىستەۋگە، بۇگىنىمىزگە ەمەس، بولاشاعىمىزعا قىزمەت ەتۋگە شاقىرامىن. بارلىق ارىپتەستەرىم قولدايدى دەپ ويلايمىن.

مەنىڭ الدىمدا تۇرعان مىندەتتىڭ بىرقاتارى وسى.

شىڭعىس مۇقاننىڭ جازباسى

Abai.kz