سارسەنبى, 28 قازان 2020
COVID-19 قازاقستاندا. جۇقتىرعاندار — 110684. جازىلعاندار — 105766. قايتىس بولعاندار — 1825
قوعام 1052 5 پىكىر 25 تامىز, 2020 ساعات 11:57

سەريالدار مەن ويىن-ساۋىق باعدارلامالار ازايادى

اقپارات جانە قوعامدىق دامۋ ءمينيسترى ايدا بالاەۆا پرەزيدەنت تەلەراديوكەشەنىنە سۇحبات بەرىپ، جاڭا ماۋسىمدا مەملەكەتتىك تەلەارنالاردا قانداي وزگەرىستەر بولاتىنىن ايتتى.

مينيستەردىڭ ايتۋىنشا، جاڭا ماۋسىمدا مەملەكەتتىك تەلەارنالاردا سەريالدار مەن ويىن-ساۋىق مازمۇنىنداعى باعدارلامالار ازايادى. ولاردىڭ ورنىنا قازاقستاندىقتارعا مەملەكەتتىك باعدارلامالاردىڭ جۇزەگە اسىرىلۋى كورسەتىلەدى.

Sputniknews-ءتىڭ حابارلاۋىنشا، بالاەۆا مينيستر لاۋازىمىنا تاعايىندالعاننان كەيىن مەملەكەتتىك تەلەارنالاردىڭ جۇمىسىنا قاتىستى كوپتەگەن ۇسىنىس پەن سىن-پىكىر ايتىلعانىن مالىمدەدى.

- ازاماتتاردان ارنالاردا ويىن-ساۋىق پەن سەريالداردىڭ كوپ كورسەتىلەتىنى جايلى كوپتەگەن شاعىم ءتۇستى. وسىعان بايلانىستى جاڭا ماۋسىمنان باستاپ شەتەلدىك ويىن-ساۋىق مازمۇندى باعدارلامالار مەن سەريالداردى ساتىپ الۋدى 30%-كە قىسقارتامىز دەگەن شەشىم قابىلداندى. الايدا تۇرىك سەريالدارىن تۇگەلدەي الىپ تاستاۋعا بولمايدى. ءبىر اۋديتوريانىڭ قامىن ويلاپ، ەكىنشى اۋديتوريانى ەلەۋسىز قالدىرا المايمىز.  ءبىر اۋديتوريا ونى قالاپ، كۇتىپ وتىرادى. اپالارىمىز ءار سەريال كەيىپكەرىنىڭ تىلەۋىن تىلەپ وتىرادى. سولارمەن بىرگە قۋانىپ، بىرگە مۇڭايادى. ول اۋديتوريانىڭ مۇددەسىن تاپتاي المايمىز، – دەدى بالاەۆا.

ءمينيستردىڭ ايتۋىنشا، ەندى تەلەارنادان وتاندىق ءونىم كوبىرەك كورسەتىلەتىن بولادى. ەلدىڭ الەۋمەتتىك-ەكونوميكالىق ءومىرىن، مەملەكەتتىك ورگانداردىڭ قىزمەتىن، سونىمەن قاتار مەملەكەتتىك باعدارلامالار مەن باستامالاردىڭ ىسكە اسىرىلۋى كورسەتىلەتىن باعدارلامالار كوبەيەدى دەپ كۇتىلۋدە.

- پاندەميا ەكونوميكالىق جاعدايعا اسەر ەتتى، سوندىقتان ءبىز «ءال-فارابي» تەلەارناسىن ىسكە قوسۋدان باس تارتۋ تۋرالى شەشىم قابىلدادىق. بۇعان دەيىن ەكى جاڭا ارنانىڭ ىسكە قوسىلاتىنى حابارلاندى. بۇل باستاما جاعداي وڭالعان ۋاقىتقا شەگەرىلىپ وتىر. قازىر قولدانىستاعى ارنالاردىڭ مازمۇنىن جاقسارتۋ تۋرالى شەشىم قابىلداندى. «ەلارنا» مادەني-ءبىلىم ارناسى رەتىندە جۇمىس ىستەيدى. سونداي-اق، Kazakh TV ارناسىنا رەبرەندينگ جاسالادى، – دەدى بالاەۆا.

وتاندىق سەريالدار مەن دەرەكتى فيلمدەردى ەكرانعا شىعارۋ ماقساتىندا «قازاقفيلمنىڭ» نەگىزگى سەرىكتەسى بولۋ دا مينيسترلىكتىڭ جوسپارىندا بار.

سونىمەن قاتار بالاەۆا مينيسترلىكتە مەملەكەتتىك تاپسىرىس جۇيەسىنە تالداۋ جۇرگىزىلگەنىن ايتتى.

- قازىر مەملەكەتتىك باعدارلامالاردى كەڭىرەك جاريا ەتۋگە، تالداۋ ماتەريالدارىن كوبىرەك جاساۋعا باعىتتالعان ناقتى پىكىرلەر بار. بۇل مەملەكەت ساياساتىن كەڭىنەن تانىستىرۋعا مۇمكىندىك بەرەدى. بەلگىلى ءبىر باعدارلامالارعا نەمەسە باستامالارعا قاتىستى ساراپتامالىق پىكىر ارقاشان ماڭىزدى. كەلەسى جىلدان باستاپ جاڭا فورماتتا جۇمىس ىستەيمىز، – دەدى بالاەۆا.

Abai.kz

5 پىكىر