بەلارۋس ەلىندە ورىس تىلىنە ەشكىم كۇتپەگەن قارسىلىق جاسالدى. تمد-عا تانىمال ساياساتكەر ستانيسلاۆ شۋشكەۆيچ ورىس ءتىلىن «مەملەكەتتىك ءتىل» مارتەبەسىنەن ايىرۋ تۋرالى مالىمدەمە جاسادى.

ستانيسلاۆ شۋشكەۆيچ 1991-1994 جىلدارى بەلورۋس بيلىگىنىڭ تىزگىنىن ۇستاپ، 1996-2018 جىلدار ارالىعىندا بسدگ  («بەلورۋس سوتسيال-دەموكراتيكالىق گرامادا») پارتياسىنىڭ باسشىسى بولعان. شۋشكەۆيچ 1995 جىلى اتا زاڭعا وزگەرىس ەنگىزىپ، ورىس تىلىنە «مەملەكەتتىك ءتىل» مارتەبەسىن بەرگەنىن پرەزيدەنت لۋكوششەنكونىڭ باستى قاتەلىگى دەپ مالىمدەدى.

«بىزدە ەشقاشان ۇلتارالىق الاۋىزدىق بولعان ەمەس. دەگەنمەن ءبىز قاشاندا بەلارۋس بولىپ قالعانىمىزدى قالادىق. ءبىزدى، ءبىر سوزبەن ايتقاندا، انا تىلىمىزدەن ايىرىپ، ءتول مادەنيەتىمىزدەن الاستاتۋ جالعاسىپ كەلەدى... ورىس تىلىنە ءتونىپ تۇرعان ەش قاۋىپ جوق. ال، مەملەكەتتىك ءتىل بىرەۋ عانا، تەك – بەلارۋس ءتىلى بولۋى كەرەك، ويتكەنى، ونىڭ بىزدەن باسقا جەردە وتانى جوق»، - دەيدى شۋشكەۆيچ.

ودان ءارى بۇرىنعى جوعارعى كەڭەس باسشىسى بەلارۋس ءتىلىنىڭ مەملەكەتتىك ءتىل رەتىندەگى وتپەلى كەزەڭى ۇزاق تا، وتە اۋىر جاعدايدى باستان وتكەرەدى دەگەندى جوققا شىعارمايدى. 

ءبىزدىڭ ەلدە دە ورىس ءتىلى جالعان قوس تىلدىلىكتىڭ تاساسىنداعى نەووتارشىل ۇستەمدىككە يە. وكىنىشتىسى، 30 جىل بويى «ورىس ءتىلىنىڭ» جالاۋىن كوتەرگەن بوگدە ءتىلدى بيلىككە قاسقايا قارسى تۇراتىن، زاڭسىز «رەسمي تىلگە» باسىمدىق بەرۋدى توقتاتۋدى تالاپ ەتەتىن بىردە ءبىر ساياسي ءىرى تۇلعا ازىرگە تابىلماي تۇر. ءدال قازىر پرايمەريز وتكىزىپ، ۇرانداتىپ جۇرگەن «Nur Otan» پارتياسى تەك مەملەكەتتىك تىلدە سويلەپ، جازا الاتىن دەپۋتاتتار كورپۋسىن جاساقتاپ، وزگە پارتيالارعا ۇلگى بولا الار ما ەكەن؟ الدە ءتىلدى قىزعىشتاي قورعايتىن «اق جول» پارتياسى تاعى دا «اق قارعانىڭ كۇيىن كەشىپ» جالعىز قالا بەرە مە؟

«زاڭدى قۇقىعى جوق «رەسمي ءتىل» ءوز ورنىن ءبىرجولا مەملەكەتتىك تىلگە قاشان بوستادى؟» دەگەن ساۋالعا سايلاۋعا تۇسكەلى جاتقان پارتيالار ءوز جاۋابىن قاي كەزدە بەرمەك. الدە قازاق ءتىلدى سايلاۋشىلارىن «كەمەلەرى سۋدان» ءوتىپ العان سوڭ، كوزگە ىلمەي ورىس تىلىندە پارلامەنتتە سايراۋدى جالعاستىرامىز دەگەن ويلارىنان اينىماۋدى ومىرلىك ماقساتىمىز دەپ ساناي ما؟!

ءابىل-سەرىك الياكبار

Abai.kz