ءبىلىم جانە عىلىم مينيسترلىگىنىڭ شەشىمىمەن شىمكەنتتەگى اكادەميك قۋاتبەكوۆ اتىنداعى حالىقتار دوستىعى ۋنيۆەرسيتەتى ليتسەنزياسىنان ايىرىلدى.

مينيسترلىكتىڭ مالىمەتىنشە، بۇل شەشىم جوعارى وقۋ ورنىندا ءبىلىم بەرۋ سالاسىنداعى زاڭنامانى ساقتاۋ بويىنشا بىرنەشە تەكسەرۋدەن كەيىن قابىلدانعان.

"شىمكەنت قالاسىنىڭ مامانداندىرىلعان اۋدانارالىق اكىمشىلىك سوتى وتىرىسىنىڭ قورىتىندىسى بويىنشا وسىنداي شەشىم قابىلداندى، ول 10 جۇمىس كۇنى ىشىندە زاڭدى كۇشىنە ەنەدى. وسى كەزەڭدە اكادەميك قۋاتبەكوۆ اتىنداعى حالىقتار دوستىعى ۋنيۆەرسيتەتى سوت شەشىمىنە دە، مينيسترلىك شەشىمىنە دە اپەللياتسيا بەرۋگە قۇقىلى", - دەپ حابارلادى بعم ءباسپاسوز قىزمەتىندەگىلەر.

بۇعان دەيىن جوو-عا جوسپارلى تەكسەرۋلەر بارىسىندا انىقتالعان زاڭ بۇزۋشىلىقتاردى تۇزەتۋگە بىرنەشە رەت مۇمكىندىك بەرىلگەنى اتاپ ءوتىلدى.

"زاڭ بۇزۋشىلىقتار وقۋ پروتسەسىن ۇيىمداستىرۋعا، تالاپكەرلەردى قابىلداۋعا، جوو-نى وقۋ، وقۋ-ادىستەمەلىك جانە عىلىمي ادەبيەتتەرمەن قامتاماسىز ەتۋگە، تۇلەكتەردى جۇمىسقا ورنالاستىرۋعا قاتىستى بولعان. ماسەلەن، "اتامەكەن" ۇكپ رەيتينگىنىڭ دەرەكتەرى بويىنشا، جوو-نىڭ ءبىلىم بەرۋ باعدارلامالارى جۇمىس بەرۋشىلەردىڭ تالابىنا 17,4 پايىزعا عانا سايكەس كەلەدى، ال ءبىلىم بەرۋ باعدارلامالارىنىڭ 82,6 پايىزى پىسىقتاۋدى تالاپ ەتەدى، ويتكەنى جۇمىس بەرۋشىلەردىڭ تالاپتارىنا سايكەس كەلمەيدى", - دەپ تولىقتىردى ۆەدومستۆوداعىلار.

بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى مۇنداي شارالار ستۋدەنتتەردىڭ مۇددەلەرىن ەسكەرە وتىرىپ قابىلداناتىنىن ايتتى.

ء"بىز مۇنى ستۋدەنتتەر مەن اتا-انالاردىڭ تۇسىنگەنىن قالايمىز. جوعارى وقۋ ورىندارى ءبىلىم بەرۋ سالاسىنداعى تالاپتارعا سايكەس كەلمەسە، بولاشاق ماماندار ديپلوم العاننان كەيىن جۇمىسقا ورنالاسۋدا پروبلەمالار تۋىنداۋى مۇمكىن. بۇل ۋنيۆەرسيتەتكە قاتىستى شەشىم ايدىڭ سوڭىندا زاڭدى كۇشىنە ەنەدى. ارينە، پروتسەسس كەشىگۋى مۇمكىن. ءبىز ءوز تاراپىمىزدان ستۋدەنتتەرگە باسقا جوعارى وقۋ ورىندارىنا اۋىسۋعا كومەكتەسەمىز. بۇل ۋنيۆەرسيتەتتە تەك 50 ادام گرانتتا وقيدى، ول بۇل ستۋدەنتتەردىڭ ارقايسىندا ساقتالادى", - دەدى كوميتەت توراعاسى گۇلزات كوبەنوۆا.

"اقىلى وقيتىندار ءۇشىن وقۋ باعاسى بۇرىنعى دەڭگەيدە قالادى. ستۋدەنتتەر مەملەكەتتىك جوعارى وقۋ ورىندارىنا اۋىسا الادى. ستۋدەنتتەردىڭ بارلىق وقۋ كورسەتكىشى باسقا جوو-لارعا اۋىسقان كەزدە جارامدى. شىمكەنتتە اتالعان جوو-نىڭ ءبىلىم الۋشىلارىن قابىلداي الاتىن جوعارى وقۋ ورىندارىنىڭ سانى جەتكىلىكتى ەكەنىن اتاپ وتكىم كەلەدى، سوندىقتان ستۋدەنتتەر ءوز ماماندىقتارى بويىنشا وقۋىن جالعاستىرا الادى. سونداي-اق، جاقىن ورنالاسقان قالالاردا 50-گە جۋىق ۋنيۆەرسيتەت بار. ءبىز اتالعان جوعارى وقۋ ورنىنىڭ ينفراقۇرىلىمى نەگىزىندە مەكتەپ نەمەسە كوللەدج اشۋدى ۇسىندىق، سەبەبى بۇگىندە ءبىر وقۋشىعا 500 مىڭ تەڭگە كولەمىندە اي سايىنعى مەملەكەتتىك تاپسىرىس الۋ مۇمكىندىك بار", - دەپ قوستى ول.

بۇل جوو-دا ستۋدەنتتەر نەگىزىنەن "باستاۋىشتا وقىتۋ پەداگوگيكاسى مەن ادىستەمەسى", "ەسەپ جانە اۋديت", "قارجى", "قۇقىقتانۋ" جانە باسقا دا باعىتتار بويىنشا اقىلى وقيدى. وقۋ قۇنى 275-تەن 800 مىڭ تەڭگەگە دەيىن.

ستۋدەنتتەرگە وقۋ سەمەسترىنىڭ اياقتالۋىن كۇتپەستەن باسقا جوعارى وقۋ ورىندارىنا اۋىسا الاتىنى حابارلاندى.

Abai.kz