- ءبىز رەسپۋبليكالىق بيۋدجەتتەن تولەنۋى ءتيىس 25 پايىزدىق ۇستەماقىنى تولەي المايمىز. بىزدە پەداگوگيكالىق ستاۆكالار ۇلعايعان، قارجى جەتىسپەيدى. قوسىمشا قاراجات ءبولۋ تۋرالى ءوتىنىش تۇسىرگەنبىز. ءوتىنىشىمىز قاناعاتتاندىرىلدى جانە الداعى ۋاقىتتا قوسىمشا قارجى بولىنەدى، - دەدى الماتى قالالىق ءبىلىم باسقارماسىنىڭ جوسپارلى قارجى ءبولىمىنىڭ جەتەكشىسى ءادىل وتارباەۆ.
مۇعالىمدەر تامىز جانە قىركۇيەك ايىنداعى ۇستەماقىنى الماعان.
وتكەن اپتادا Facebook-تاعى "قازاقستان ۇستازدارى" توبىندا مۇعالىمدەردىڭ جالاقىسى كەشىكتىرىلىپ جاتقانى تۋرالى شاعىم پوست جاريالانعان ەدى.
"رەسپۋبليكالىق بيۋدجەتكە نە بولعان؟ ەگەر الماتىنىڭ وزىندە جالاقىنى وسىلاي كەشىكتىرىپ جاتسا، ايماق تۋرالى نە ايتۋعا بولادى؟ قىركۇيەك ايىندا رەسپۋبليكالىق بيۋدجەتتەن قارجى تۇسپەگەن" دەپ جازدى ايا قۋانىشەۆا.
الماتى قالاسى ءبىلىم باسقارماسىنىڭ ءباسپاسوز قىزمەتىنىڭ حابارلاۋىنشا، ماسەلە مۇعالىمدەر جالاقىسىندا ەمەس - "پەداگوگ مارتەبەسى" تۋرالى زاڭنىڭ كۇشىنە ەنۋىنە بايلانىستى مۇعالىمدەر جالاقىسىنا قوسىلۋى ءتيىس ۇستەماقى جايلى بولىپ وتىر. باسقارما بۇل قاراجات جاقىن ارادا رەسپۋبليكالىق بيۋدجەتتەن ءتۇسۋى ءتيىس ەكەنىن ايتادى.
"پەداگوگ مارتەبەسى تۋرالى" زاڭعا سايكەس، 2020 جىلدىڭ قاڭتار ايىنان باستاپ مۇعالىمدەردىڭ ەڭبەكقاسى 25 پايىزعا كوبەيۋى ءتيىس. وسىعان دەيىن پرەزيدەنت قاسىم-جومارت توقاەۆ مۇعالىمدەردىڭ جالاقىسىن ءتورت جىل ىشىندە ەكى رەت ءوسىرۋدى تاپسىرعان.
Abai.kz
