بۇگىن، 4 قاراشادا قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ الاڭىندا الماتى وبلىسىنىڭ اكىمى اماندىق باتالوۆ ءوڭىردىڭ 9 ايداعى الەۋمەتتىك-ەكونوميكالىق دامۋىنا ارنالعان ءباسپاسوز كونفەرەنتسياسى وتكىزدى.

ءباسپاسوز جيىنى بارىسىندا «Qazaq Times» سايتىنىڭ ءتىلشىسى اسان اناربايۇلى باتالوۆقا ۇيعىر اۋدانىنىڭ اتىن وزگەرتۋ ماسەلەسى جايلى سۇراق قويدى.

سۇراق: اماندىق عابباسۇلى، ۇيعىر اۋدانىنىڭ اتاۋى جونىندە، شونجى اۋىلىنىڭ اتاۋى جونىندە قوعامدا كوپتەن بەرى تالقىلانىپ كەلەدى. بيىل ماۋسىم ايىندا قازاق جاستارى مەن ۇيعىر جاستارى اراسىندا قاقتىعىس بولعانى ەسىمىزدە. ۇلتارالىق بىرلىك ماسەلەسىن ۋشىقتىرماس ءۇشىن كوپشىلىك ۇيعىر اۋدانىنىڭ اتاۋىن قارادالا، شونجىنىڭ اتاۋىن المەرەك دەپ وزگەرتۋدى ۇسىنعان. ءسىز وسى ۇسىنىستى جوعارى ينستانتسياعا جەتكىزۋگە ۋادە بەرگەنىڭىزبەن، اۋدان اكىمىنە حات جولداعان ەكەنسىز. اۋدان اكىمدىگى مۇنداي شەشىم شىعارۋعا قۇزىرەتى جوق ەكەنىن ايتادى. ال ونوماستيكالىق تالداۋ ءبولىمى اكىمدىك ۇسىنىس بەرسە، مۇنى رەسپۋبليكالىق كەڭەستە تالقىلاۋعا دايىن ەكەنىن ايتادى. بۇل ماسەلەنىڭ شەشىم تاپپاي، وسىلاي سيىرقۇيمشاقتانىپ كەتۋىنە نە سەبەپ؟

جاۋاپ: سول جەردەگى سىيلى اقساقالداردى، ىزعاربەك بەكتۇرسىنۇلىن شاقىرىپ، ءبارىن بايانداپ بەردىم. جاعدايدىڭ قازىرگى كەزدە قانداي ەكەنىن ايتتىم. جۇمىس ىستەلىپ جاتىر. بىراق قازىرگى ساتتە بۇل ماسەلە كۇنتارتىبىندە تۇرعان جوق. سەبەبى، قازىر سايلاۋ ناۋقانى باستالايىن دەپ جاتىر. وسىنىڭ الدىندا ءبىز سايلاۋشىلاردىڭ ءتىزىمىن ناقتىلادىق، سايلاۋ ۋچاسكەلەرىن تۇگەندەدىك. سول ءۇشىن وسىنداي كەزدە كوشەنىڭ اتىن، اۋداننىڭ اتىن اۋىستىرۋ سەكىلدى جۇمىستاردى ىستەۋگە بولمايدى. قازىر سايلاۋشىلاردىڭ تۇراتىن جەرىن وزگەرتۋگە بولمايدى. سايلاۋ ناۋقانى وتكەننەن كەيىن بۇل ماسەلەگە قايتا ورالامىز. ناقتى شەشىمىن سول كەزدە سىزدەرگە جەتكىزەمىز.

سۇراق: باسپاسوزدە وبلىستىق اكىمدىكتەن اۋدان اكىمدىگىنە حات جولدانعانى تۋرالى اقپارات شىقتى...

جاۋاپ: مەن ەشقانداي حات جىبەرگەن جوقپىن. سىزدەرگە ايتقان ۋادەلەرىمنىڭ ءبارىن ورىندادىم.

Abai.kz