2019 جىلى 2020 جىلدىڭ بارلىق دەڭگەيدەگى بيۋدجەتى بەكىتىلدى. سونىڭ ىشىندە ءارتۇرلى، ۇلكەندى-كىشىلى جيىندار، كوپشىلىك ءىس-شارالار، شەتەلگە ساپارلار جانە تاعىسىن تاعىعا ارنالعان بيۋدجەت باپتارى قاراستىرىلدى.

مەملەكەت ەسەبىنەن اتقارىلاتىن جيىن مەن توي-تومالاقتى، شەت ەلدەرگە ءىسساپاردى جاقسى كورەتىن شەندىلەر ول قارجىنى اياماي-اق جوسپارلاعان بولار.

ول كەزدە كوروناۆيرۋستىڭ ءيىسى دە سەزىلمەدى. 2020 جىلى پاندەمياعا قاتىستى سول شارالار ساپ تىيىلدى. جوسپارلانعان ءىس-شارالاردىڭ ءبىر دە ءبىرى وتكەن جوق. ماسەلەن، پرەزيدەنتتەن باستاپ، ەشكىم دە شەتەلگە شىققان جوق. ءبىر دە ءبىر حالىقارالىق فورۋم وتكىزىلمەدى. باسقا دا جيىندار دا كۇرت توقتاتىلدى.

سالىق تولەۋشى رەتىندە ءبىر سۇراق: 2020 جىلى جۇمسالماعان، پاندەميا ۇنەمدەپ بەرگەن سول قارجىنىڭ سوماسى قانداي جانە ولار قاي جاققا جۇمسالدى؟ سول قارجىنى نەلىكتەن ىندەتپەن ايانباي كۇرەسىپ جاتقان دارىگەرلەرگە، الەۋمەتتىك جاعىنان قورعالماعان اعايىنعا قوسىمشا كومەك رەتىندە بەرمەيمىز؟

ءامىرجان قوسان

Abai.kz