قازاقستان كوممۋنيستىك حالىق پارتياسىنىڭ اتاۋى وزگەرىپ، رەبرەندينگ جاسالدى. ەندى قكحپ «قازاقستاننىڭ حالىق پارتياسى» دەپ اتالاتىن بولادى. بۇل تۋرالى پارتيا وكىلدەرى مالىمدەدى.

«ءبىز بيىل پارتيامىزدىڭ اتاۋىن وزگەرتىپ، رەبرەندينگ جاساۋدى ءجون كوردىك. بۇگىنگى پارتيانىڭ كەزەكتەن تىس XV سەزىنىڭ باستى جاڭالىعى، ءبىزدىڭ پارتيامىزدىڭ اتاۋىنىڭ «قازاقستاننىڭ حالىق پارتياسى» بولىپ وزگەرۋى.

بۇل دەگەنىمىز كوممۋنيستىك يدەولوگيادان كەتۋ دەگەن ءسوز ەمەس، ءبىزدىڭ ەلىمىزدەگى الەۋمەتتىك ماسەلەلەرگە كوپ ءمان بەرۋىمىزبەن بايلانىستى. ەلىمىزدەگى شەشىلۋى ءتيىس ماسەلەلەردىڭ كوبى الەۋمەتتىك سالامەن بايلانىستى. تاعى ءبىر پارتيا مۇشەلەرىنىڭ قاتارىن كەڭەيتۋ، باعدارلامامىزدىڭ اياسىن كەڭەيتۋدى كوزدەيمىز. سونداي-اق، ءبىز پارتيالاردىڭ قاتارىندا جوق، بىراق وزىندىك يدەيالارى بار ازاماتتاردى ءوز پارتيامىزعا شاقىرامىز»، - دەدى قكحپ-نىڭ حاتشىسى جامبىل احمەتبەكوۆ.

رەبرەندينگ پارتيانىڭ ۇيىمدىق قۇرىلىمىنا تۇزەتۋلەر ەنگىزدى. وسىلايشا، حالىق پارتياسىندا توراعا لاۋازىمى پايدا بولدى، ورتالىق كوميتەت حاتشىلارىنىڭ سانى ءوستى، ساياسي بيۋرونىڭ قۇرامى وزگەردى. سەزد بارىسىندا ايقىن قوڭىروۆ قازاقستان حالىق پارتياسىنىڭ توراعاسى بولىپ ءبىر اۋىزدان سايلاندى.

– مەنىڭ ويىمشا، ءبىز پارتيامىزدىڭ الاڭىندا قوعامنىڭ بارلىق سالاۋاتتى حالىقتىق-پاتريوتتىق كۇشتەرىن بىرىكتىرە الامىز. وسىعان بايلانىستى ءبىز پارتيامىزدىڭ ىرگەتاسىن – سوتسياليستىك يدەيانى ساقتايمىز، – دەدى قوڭىروۆ.

جاقىن ۋاقىتتا پارتيا قايتا تىركەۋدەن وتپەك. كەزەكتەن تىس XVI سەزدى وتكىزۋگە جانە سايلاۋ ناۋقانىنا، قر ءماجىلىسى مەن جەرگىلىكتى اتقارۋشى ورگاندار مەن ءماسليحاتتاردىڭ الداعى سايلاۋىنا لايىقتى قاتىسۋعا نيەتتى.

ايتا كەتەيىك، ەلوردادا قازاقستان كوممۋنيستىك حالىق پارتياسىنىڭ كەزەكتەن تىس XV سەزى ءوتىپ جاتىر.

Abai.kz