بۇگىن پرەمەر-مينيستر اسقار ءماميننىڭ توراعالىعىمەن ۇكىمەت وتىرىسى ءوتتى. وندا مامين 2021 جىلى قاعاز انىقتامالاردى تولىعىمەن الىپ تاستاۋ كەرەك ەكەنىن ايتتى. بۇل تۋرالى Primeminister.kz سايتى حابارلادى. 

«سمارتفون قولدانۋشىلار سانى وسۋدە، وسى رەتتە مەملەكەتتىك قىزمەتتەر مەن سەرۆيستەردى ءموبيلدى پلاتفورمادا كورسەتۋ قاجەتتىلىگى ارتىپ وتىر. ەڭ قاجەتتى الەۋمەتتىك ماڭىزدى مەملەكەتتىك قىزمەتتەردى ءموبيلدى فورماتقا كوشىرۋ جۇمىسىن جانداندىرۋ قاجەت. تسيفرلىق دامۋ مينيسترلىگىنە مۇددەلى مەملەكەتتىك ورگاندارمەن بىرلەسىپ، بارلىق الەۋمەتتىك ماڭىزدى مەملەكەتتىك قىزمەتتەردى eGov موبايلعا اۋىستىرۋ بويىنشا جوسپاردى بەكىتۋدى تاپسىرامىن. جالپى 2021 جىلى «قاعاز» انىقتامالاردىڭ قاجەتتىلىگىن تولىعىمەن جويۋىمىز كەرەك. «ازاماتتارعا ارنالعان ۇكىمەت» كورپوراتسياسىنان قىزمەتتەردى جەتكىزۋدى جانە بارلىق ونلاين قىزمەتتەر مەن سەرۆيستەردىڭ 100 پايىز قولجەتىمدىلىگى قامتاماسىز ەتۋىمىز قاجەت»، - دەدى ۇكىمەت باسشىسى.

سونىمەن قاتار اسقار مامين مەملەكەت باسشىسى زەينەتاقى مەن جاردەماقىلاردى تاعايىنداۋ جانە تولەۋگە قاتىستى پروتسەستەردى تولىعىمەن تسيفرلاندىرۋدى تاپسىرعانىن اتاپ ءوتتى.

«وسى جىلدىڭ سوڭىنا دەيىن الەۋمەتتىك جانە ەڭبەك سالاسىندا ەلەكتروندىق فورماتتا كورسەتىلەتىن مەملەكەتتىك قىزمەتتەر كورسەتكىشى 90 پايىزعا جەتكىزىلەدى. دەنساۋلىق ساقتاۋ مينيسترلىگىنە ازاماتتارعا قاجەتتى ەلەكتروندىق مەديتسينالىق مالىمەتتەردى بەرۋدى قامتاماسىز ەتۋدى تاپسىرامىن. ەڭبەك مينيسترلىگى مەملەكەتتىك ورگاندارمەن بىرلەسىپ، زەينەتاقى مەن جاردەماقىلاردى تاعايىنداۋ جانە تولەۋ پروتسەستەرىن تسيفرلاندىرۋ ءۇشىن قاجەتتى دەرەكتەردى تولىق تسيفرلاندىرۋ مەن جاڭارتۋدى قامتاماسىز ەتۋدى جۇكتەيمىن»، - دەدى پرەمەر-مينيستر.

ۇكىمەت باسشىسى اكىمدەر مەن مۇددەلى مەملەكەتتىك ورگاندار الەۋمەتتىك سيپاتتاعى قىزمەتتەر بويىنشا جۇمىستى جۇيەلى تۇردە ۇيىمداستىرۋعا نازار اۋدارۋى قاجەتتىگىن باسا ايتتى.

«سەرۆيس پەن كەرى بايلانىس دەڭگەيىن ارتتىرۋ قاجەت. حالىق قاجەتتى مەملەكەتتىك قىزمەتتى كەزەكسىز، ارتىق ەشقايدا بارماي الۋى كەرەك. مىسالى، قازىر ۇيلەر پايدالانۋعا كوپتەپ تاپسىرىلىپ جاتىر، ءارتۇرلى تۇرعىن ءۇي باعدارلامالارى بار. يپوتەكا الۋ جانە كەپىلگە قويۋ مەحانيزمىن بارىنشا جەڭىلدەتۋ قاجەت»، - دەدى ول.

بۇدان بولەك، پرەمەر-مينيستر ورتالىق جانە جەرگىلىكتى اتقارۋشى ورگاندارعا بارلىق اقپاراتتىق جۇيەلەردىڭ ۇزدىكسىز جۇمىسى مەن ءتيىمدى ينتەگراتسياسىن قامتاماسىز ەتۋدى، ولاردىڭ ساپاسىن ارتتىرۋ شارالارىن قابىلداۋدى تاپسىردى.

«ولار حالىقتىڭ پايدالانۋى ءۇشىن جەڭىل بولۋى ءتيىس. مەملەكەتتىك قىزمەتتەردى تسيفرلاندىرۋ سالاسىنداعى جاڭالىقتاردى ءتۇسىندىرۋ جۇمىسىنا ەرەكشە كوڭىل ءبولۋ قاجەت»،- دەدى اسقار مامين.

Abai.kz