بايقوڭىر قالاسىنىڭ 7 مەكتەبى رەسەي فەدەراتسياسىنىڭ ءبىلىم بەرۋ ستاندارتتارىمەن وقيدى. بۇل جونىندە قر پرەمەر-ءمينيسترى اسقار مامين ايتتى.

ال، مەكتەپ باعدارلاماسىنا قازاقستان تاريحى، قازا ءتىلى مەن ادەبيەتى پاندەرىن ەنگىزۋ ءۇشىن رەسەيدىڭ وقۋ-اعارتۋ مينيسترلىگى رۇقسات ەتۋى قاجەت ەكەن.

«بايقوڭىر قالاسىنىڭ 7 مەكتەبىندە وقىتۋ رەسەي فەدەراتسياسىنىڭ مەملەكەتتىك جالپىعا مىندەتتى ءبىلىم بەرۋ ستاندارتتارىنا سايكەس جۇرگىزىلەدى. بۇل مەكتەپتەردە قازاقستاندىق بالالار دا وقيدى. ولار ءوز بولاشاعىن قازاقستانمەن بايلانىستىراتىندىقتان، ولار ءۇشىن قازاقستان تاريحىن، قازاق ءتىلى مەن ادەبيەتىن ءبىلۋ ماڭىزدى بولىپ تابىلادى. مەكتەپ باعدارلاماسىنا اتالعان پاندەردى ەنگىزۋ ءۇشىن رەسەي فەدەراتسياسىنىڭ وقۋ-اعارتۋ مينيسترلىگىنىڭ رۇقساتى قاجەت»،- دەدى ۇكىمەت باسشىسى.

ءماميننىڭ ايتۋىنشا، بايقوڭىر قالاسىنداعى رەسەيلىك مەكتەپتەردە قازاقستان تاريحى، قازاق ءتىلى مەن ادەبيەتى پاندەرىن وقىتۋ تۋرالى ماسەلە 2020 جىلدىڭ 10 قاراشاسىندا وتكەن ۇكىمەتتىك كوميسسيانىڭ كۇن تارتىبىنە ەنگىزىلگەن. كەيىننەن اتالعان ماسەلە بولەك قارالادى دەگەن سەبەپپەن الىنىپ تاستالىپتى.

«بايقوڭىر قالاسى بويىنشا قازاقستان-رەسەي ۇكىمەتارالىق كوميسسياسىنىڭ بولەك وتىرىسىندا قاراۋدىڭ ورىندىلىعى تۋرالى شەشىم قابىلدانىپ، اتالعان ماسەلە كۇن تارتىبىنەن الىنىپ تاستالدى.

بايقوڭىر قالاسىنداعى 7 مەكتەپتىڭ بىرەۋىن رەسەي فەدەراتسياسىنىڭ بالانسىنان الىپ قازاقستاننىڭ كوممۋنالدىق مەنشىگىنە بەرۋ ماسەلەسى دە ءبىلىم بەرۋ سالاسىنداعى ىنتىماقتاستىق جونىندەگى ۇكىمەتارالىق كەزەكتى كوميسسيانىڭ وتىرىسىندا قاراستىرىلاتىن بولادى»، - دەدى اسقار مامين.

سونىمەن قاتار، قر ازاماتتارىن قازاقستاندىق مەملەكەتتىك جالپىعا مىندەتتى ءبىلىم بەرۋ ستاندارتتارى بويىنشا وقىتۋ ماسەلەسىن شەشۋ ءۇشىن 2019-2020 وقۋ جىلىنان باستاپ № 275 ورتا مەكتەپتىڭ بازاسىندا ورىس تىلىندە وقىتاتىن باستاۋىش سىنىپتار اشىلعان.

ال، 2020 جىلى قىزىلوردا وبلىسىنىڭ اكىمدىگى رەسەي مەكتەپتەرىندەگى قازاقستاندىق 5-11 سىنىپ وقۋشىلارى ءۇشىن قر ستاندارتى بويىنشا ورىس تىلىندە وقىتىلاتىن سىنىپتار اشۋ بويىنشا جۇمىستار جۇرگىزدى. كەلەشەكتە ورىس تىلىندە وقىتاتىن قوسىمشا سىنىپتار اشۋ جۇمىستارى جالعاسپاق.

اتالعان ماسەلەنى 13 قاراشا كۇنى سەنات دەپۋتاتى مۇرات باقتيارۇلى كوتەرگەن بولاتىن.

سەناتوردىڭ ايتۋىنشا، بايقوڭىردا رەسەيگە قاراستى 5 مەكتەپ پەن 1 بالاباقشادا عانا قازاق تىلىندە ءبىلىم الۋعا مۇمكىندىك جاسالعان.

«2015 جىلى قازاقستان رەسپۋبليكاسى مەن رەسەي فەدەراتسياسى ۇكىمەتارالىق كوميسسياسىنىڭ شەشىمىمەن رەسەي فەدەراتسياسىنا قاراستى 5 مەكتەپ پەن 1 بالاباقشا عانا قازاقستان رەسپۋبليكاسىنىڭ يۋريسديكتسياسىنا الىنىپ، بالالارعا قازاقستاندىق ستاندارتپەن قازاق تىلىندە ءبىلىم الۋىنا مۇمكىندىك جاسالدى. ۇستىمىزدەگى جىلى مەملەكەتتىك-جەكەمەنشىك ارىپتەستىك نەگىزىندە قوسىمشا ەكى بالاباقشا اشىلىپ، قىزمەت كورسەتۋدە.

دەگەنمەن، قازاق تىلىندە تاربيە بەرەتىن بالا باقشالارىنىڭ بۇگىنگى جاعدايى الاڭداتىپ وتىر. ويتكەنى، بۇل بالا باقشالاردا انا تىلىندە تاربيە بەرۋ جانە تولىققاندى مەكتەپالدى دايارلىقتان وتكىزۋدە كەمشىلىكتەر بار. سوعان وراي قازىرگى ۋاقىتتا اتا-انالاردى ءوز بالالارىنىڭ الداعى ۋاقىتتا قازاق مەكتەپتەرىندە ءبىلىم الۋى ءۇشىن  تولىققاندى مەكتەپالدى دايارلىقتان وتۋلەرى قاناعاتتاندىرماي كەلەدى.

سول سەبەپتەن، بايقوڭىر قالاسىنىڭ ورتالىق تۇرعىن ءۇي مولتەك اۋداندارىندا ورنالاسقان رەسەي فەدەراتسياسىنىڭ مەنشىگىندەگى، تولىق پايدالانىلماي تۇرعان 13 بالاباقشانىڭ بىرنەشەۋىن قازاقستاننىڭ يۋريسديكتسياسىنا الۋدى بايقوڭىرلىقتار ورىندى كوتەرىپ وتىر دەپ سانايمىز. بۇل قالا تۇرعىندارى ءۇشىن  وزەكتى پروبلەمانىڭ ءبىرى»،- دەدى سەنات دەپۋتاتى.

بۇگىنگى تاڭدا بايقوڭىر قالاسىندا قازىر 77 مىڭنان اسا حالىق تۇرادى. ونىڭ 70 پايىزى قازاقستان ازاماتتارى. ال، قازىرگى جاعداي بويىنشا، بايقوڭىر قالاسىنداعى قازاق تىلىندە ءبىلىم بەرەتىن 5 قازاق مەكتەبىندە بۇگىنگى كۇنى 5 236 بالا ءبىلىم السا، رەسەيلىك 7 مەكتەپتە 4049 بالا ءبىلىم الادى، سونىڭ 1 508-ءى، ياعني 37 پايىزى قازاقستان رەسپۋبليكاسى ازاماتتارىنىڭ بالالارى.

ايتا كەتەيىك، 1995 جىلدان باستاپ قازاقستان – رەسەي ۇكىمەتى اراسىندا بايقوڭىر كوسمودرومىنا بايلانىستى 20-دان استام كەلىسىمدەر راتيفيكاتسيالانىپ، قۇقىقتىق اكتىلەرگە قول قويىلىپ، قابىلدانعان.

الايدا، سەناتور بايقوڭىردا تۇرىپ جاتقان قازاقستان ازاماتتارىنىڭ ءالى دە بولسا دا شەشىمىن تاپپاي وتىرعان  ماسەلەلەرى جەتكىلىكتى ەكەنىن العا تارتتى.

Abai.kz