الماتى قالاسىنىڭ المالى اۋداندىق سوتىندا سانجار بوقاەۆقا، ونىڭ جيەنى ماديار قالمەنوۆكە جانە جەكە موبيلوگرافى ۇلان نۇسىپقوجاعا قاتىستى قىلمىستىق ءىس بويىنشا كەزەكتى سوت وتىرىسى باستالدى.

بوقاەۆقا الاياقتىق، قىلمىستىق جولمەن الىنعان كىرىستەردى زاڭداستىرۋ، ۇرلىق جاساۋ، اعاشتاردى زاڭسىز كەسۋ جانە كورىنەۋ جالعان اقپارات تاراتۋ ايىپتارى تاعىلعان. قالمەنوۆ الاياقتىق جانە قىلمىستىق كىرىستەردى زاڭداستىرۋ، ال نۇسىپقوجا قالعان ءۇش ەپيزود بويىنشا ايىپتالىپ وتىر.

قازىرگى ۋاقىتتا اۆتوشەرۋ ۇيىمداستىرۋعا ارنالعان كەلىسىمشارتتاردىڭ جاسالۋ ءمان-جايلارىنا، مەردىگەر كومپانيالاردىڭ تاڭدالۋىنا جانە وسى ماقساتتارعا كاسىپوداق قاراجاتىنان بولىنگەن اقشانىڭ كەيىنگى قوزعالىسىنا قاتىستى الاياقتىق پەن قىلمىستىق جولمەن الىنعان كىرىستەردى زاڭداستىرۋ دەرەكتەرى بويىنشا كۋاگەرلەردەن جاۋاپ الۋ جالعاسىپ جاتىر.

ەسكە سالساق، الدىڭعى سوت وتىرىسىندا «QazaqGaz» ۇك» اق دەپارتامەنتىنىڭ باس مەنەدجەرى ءارى كاسىپوداقتىڭ تەكسەرۋ كوميسسياسىنىڭ مۇشەسى مەدەتبەك ابدىقالىقوۆ اۋديت بارىسىندا انىقتالعان «BM Trust» جانە «We Can» كومپانيالارىمەن جاسالعان كۇماندى كەلىسىمشارتتار تۋرالى ايتىپ بەرگەن ەدى.

ونىڭ سوزىنشە، باسەكەلەستىك ورتاعا قاراماستان، كەلىسىمشارتتار ءبىر عانا كومپانيالارمەن قايتا-قايتا جاسالعان. سونىمەن قاتار سمەتالاردا كورسەتىلگەن قىزمەت قۇنىن نەگىزسىز كوتەرۋ بەلگىلەرى انىقتالعان. ال مەردىگەرلەر بوقاەۆتىڭ تاراپىنان ۇسىنىلىپ، وزگە كومپانيالار، ياعني بالاما نۇسقالار ەش قاراستىرىلماعان.

سونداي-اق، كۋاگەر جىمقىرۋ بەلگىلەرىن انىقتاعاننان كەيىن زاڭبۇزۋشىلىقتاردى جاسىرۋدى مۇلدە ويلاماعانىن، بلوگەر ەكەن دەپ بوقاەۆتان مۇلدە قاۋىپتەنپەگەنىن اتاپ ءوتتى. زاڭعا قايشى دەرەكتەر انىقتالعان سوڭ كۇماندى كەلىسىمشارتتارعا قاتىستى ماتەريالدار قۇقىق قورعاۋ ورگاندارىنا جولدانعان.

بۇدان بولەك، رەۆيزوردىڭ پىكىرىنشە، يميدجدىك ءىس-شارالاردى قارجىلاندىرۋ «قازترانسگاز» اق-نىڭ جارعىلىق مىندەتتەرىنە كىرمەگەن.

تاعى ءبىر كۋاگەر – «BM Trust» جشس-نىڭ نەگىزىن قالاۋشى جانبولات ماراتوۆ باستاپقىدا كومپانيا كاتامارانداردى جالعا بەرۋمەن اينالىسقانىن جانە ءتۇرلى ءىس-شارالاردى ۇيىمداستىرۋعا ەش قاتىسى بولماعانىن مالىمدەدى.

ونىڭ ايتۋىنشا، 2017 جىلى بوقاەۆ فيرمانى ءوزىنىڭ جيەنى ماديار قالمەنوۆتىڭ اتىنا قايتا راسىمدەۋدى ۇسىنعان. كەيىننەن كومپانيا «قازترانسگاز» ءۇشىن ءتۇرلى ءىس-شارالاردى ۇيىمداستىرۋعا ارنالعان مەردىگەرلىك تاپسىرىستاردى الا باستاعان.

بۇل رەتتە، ماراتوۆ مەردىگەرلەرمەن جاسالعان كەلىسىمشارتتاردىڭ بارلىعىنا بوقاەۆتىڭ كابينەتىندە قول قويىلعانىن العا تارتقان بولاتىن.

Abai.kz