قازىر رەسەيدىڭ زومبي جاشىگى ورتالىق ازيا ەلدەرىنە «ورىس الەمىنىڭ» پاتشالىق جانە قىزىل يمپەريا كەزىندە تاماشا ەكونوميكالىق-الەۋمەتتىك ءومىر مەن ءىلىم-ءبىلىم سىيلاعانىن جەر-كوككە كوتەرە دارىپتەۋگە كىرىستى. بۇل جانتالاسۋدىڭ استارىندا كوپ نارسە جاتىر. شىندىعىندا بۇگىنگى كۇنى بارشامىز بۇرىنعى «اعا حالىقتى» ۇلت ساناسىنان وشىرەتىن رەسەي مەتروپولياسى مەن ورتالىقازيا ەلدەرى اراسىنداعى جاڭا قارىم-قاتىناستىڭ كەزەڭى باستالعانىنا كۋا بولا تۇسۋدەمىز. 

بىراق ورتالىق ازيا ەلدەرىنىڭ ەليتاسى مەن بۇقاراسىنىڭ ۇستانىمى ەكى بولەك بولا تۇسۋدە. بيلەۋشى تاپ ورتاق تاريحتىڭ كەڭەستىك جانە ءتىپتى پاتشالىق كەزەڭدەگى ءداۋىرىن ءوز ەلدەرىندە ەكونوميكالىق، الەۋمەتتىك جانە ينتەللەكتۋالدىق جاقتان تاماشا بولدى دەگەنگە مالدانۋدا. بىراق وتكەندە كەتكەن ەسە مەن قورلىقتى ەستە ۇستاۋدى كەرەك ەتەتىن پوستكەڭەستىك، پوستيمپەريالىق ءداۋىر ءوز دەگەنىن ىستەۋدە. 

وسى وتقا ماي قۇيعان كەڭەس-پاشەس ايارلىعىنىڭ دالەلى مولوتوۆ-ريببەنتروپ  پاكتىسىنىڭ اۆتورلارىنىڭ ءبىرى مولوتوۆتىڭ نەمەرەسى، رەسەي ساياساتتانۋشىسى ۆياچەسلاۆ نيكونوۆتىڭ رەسەيدىڭ ورتالىق 1 ارناسىنىڭ تىكەلەي ەفيردەگى: «قازاقستان دەگەن مۇلدەم بولعان جوق، سولتۇستىك قازاقستان ءتىپتى جۇرت تۇرماعان قۇلا ءدۇز ەدى. ولار بولدى، بىراق ءسال-ءپال وڭتۇستىككە قاراي قونىستاندى. ءبىر سوزبەن ايتقاندا، قازاقستان تەرريتورياسى دەگەنىمىز – رەسەي مەن كەڭەستەر وداعىنىڭ تاراپىنان جاسالعان ۇلى سىيى. ورتالىق ازياعا قاراتا تاپ وسىنىداي تۇيتكىلدى ماسەلەلەردى ايتا الامىز»! دەگەن مالىمدەمەسى بولدى.

مىنە وسى سوزگە قازاق ساياساتتانۋشىسى ايدوس سارىم ءوزىنىڭ Facebook پاراقشاسىندا رەسەيدىڭ مەملەكەتتىك دۋماسى مەن «ەدينايا روسسيا» پارتياسىنان رەسمي تۇسىنىك بەرۋ مەن جۇرت الدىندا كەشىرىم سۇراۋدى تالاپ ەتتى. 

وندا: «قازاقتارعا ەشكىم دە، ەشقاشاندا ءبىر سۇيەم جەرىن سىيلاعان ەمەس. تاۋەلسىز دە، ەگەمەن قازاقستاننىڭ بۇگىنگى اۋماعىن قامتىعان بارشا جەر – اتا-بابالارىمىزدىڭ قانشاما عاسىرلار بويى قانى مەن تەرىن توگىپ جاۋلاپ العان كيەلى توپىراعى....

ءوز اتىمنان جانە «Nur-Otan» پارتياسىنداعى ارىپتەستەرىم اتىنان بۇنداي مالىمدەلەرگە جول بەرۋگە بولمايدى دەپ سانايمىن! رەسەيدىڭ مەملەكەتتىك دۋماسى مەن «ەدينايا روسسيا» پارتياسى نيكونوۆتىڭ مەملەكەتتەر مەن حالىقتار اراسىنداعى قارىم-قاتىناسقا زور سىزات تۇسىرەتىن قورلاۋ مەن وتىرىككە قۇرىلعان جالعان تاريحي مالىمدەسىنە قاتىستى رەسمي تۇسىنىك بەرىپ ءام جۇرت الدىندا كەشىرىم سۇرايدى دەگەنگە سەنىمدىمىن» دەلىنگەن.

سوندا، اسىرەيمپەرياشىلدار وتكەنىمىزگە كۇل شاشا بەرمەك پە؟! سايلاۋعا ءتۇسىپ جاتقان پارتيالار رەسەيدىڭ مەملەكەتتىك دۋماسى مەن «ەدينايا روسسيا» پارتياسىنان رەسەي ساياساتتانۋشىسى ۆياچەسلاۆ نيكونوۆتىڭ رەسەيدىڭ ورتالىق 1 ارناسىنىڭ تىكەلەي ەفيردەگى مالىمدەمەسىنە قاتىستى ءوز نارازىلىعىن اشىق بىلدىرە الا ما!؟

ءابىل-سەرىك الياكبار

Abai.kz