قازاقستان پرەزيدەنتى قاسىم-جومارت توقاەۆ ازيا دامۋ بانكى مەن ازيا ينفراقۇرىلىمدىق ينۆەستيتسيالار بانكىنەن جالپى سوماسى 1,6 ميلليارد ەۋرو قارىز الۋ تۋرالى زاڭعا قول قويدى. بۇل تۋرالى اقوردا باسپاسءوز قىزمەتى حابارلادى.

قارىز كوروناۆيرۋسپەن كۇرەس جانە ەل ەكونوميكاسىن قالپىنا كەلتىرۋ شارالارىنا الىنىپ وتىر.

قاراشا ايىنىڭ سوڭىندا قازاقستان پارلامەنتى ءماجىلىسى ازيا دامۋ بانكى مەن ازيا ينفراقۇرىلىمدىق ينۆەستيتسيالار بانكىنەن جالپى سوماسى 1 570 396 000 ەۋرو (شاماممەن 1,9 ميلليارد دوللار) قارىز الۋ تۋرالى زاڭدى ماقۇلداعان. ەۆريبور+0,50% ۇستەماقىسىمەن بەرىلەتىن بۇل قارىزدىڭ 908,5 ميلليون ەۋروسىن ازيا دامۋ بانكى، 661,8 ميلليون ەۋروسىن ازيا ينفراقۇرىلىمدىق ينۆەستيتسيالار بانكى ۇسىنىپ وتىر.

قازان ايىندا قازاقستان قارجى ءمينيسترى ەرۋلان جاماۋباەۆ 2021 جىلى رەسپۋبليكالىق بيۋدجەتكە كىرىس 11,4 تريلليون تەڭگە، شىعىس 14 تريلليون تەڭگە بولادى دەپ جوسپارلانىپ وتىرعانىن ايتقان.

قازاقستان ۇلتتىق بانكىنىڭ مالىمەتىنشە، 2020 جىلعى 1 شىلدەدە ەلدىڭ سىرتقى قارىزى 159,8 ميلليارد دوللارعا جەتكەن. ونىڭ ىشىندە 11,8 ميلليارد دوللار مەملەكەتتىك باسقارۋ ورگاندارىنىڭ، 825 ميلليون دوللارى ورتالىق بانكتىڭ (ۇلتتىق بانك), 5,2 ميلليارد دوللارى ەكىنشى دەڭگەيلى بانكتەردىڭ، 101,2 ميلليارد دوللارى فيرماارالىق قارىزدىڭ ۇلەسىندە. قالعان 40,6 ميلليارد دوللار – مەملەكەت كەپىلدىگىمەن الىنعان باسقا دا قارىزدار.

كوروناۆيرۋس جۇقتىرعان ناۋقاس العاش تىركەلىپ، توتەنشە جاعداي جاريالانعاندا قازاقستان ۇكىمەتى كوروناۆيرۋسپەن كۇرەسكە جانە ونىڭ سالدارىنان تۋىندايتىن ەكونوميكالىق داعدارىسقا 5,9 تريلليون تەڭگە (14 ميلليارد دوللارعا جۋىق) بولەتىنىن مالىمدەگەن. بۇل سومانىڭ ىشىندە 191 ميلليارد تەڭگە پاندەميامەن كۇرەسكە تىكەلەي جۇمسالعان. قالعانى كوروناۆيرۋس ىندەتىنە بايلانىستى ەنگىزىلگەن كارانتين شارالارىنان تابىسىنان ايىرىلعاندارعا جاردەماقى تولەۋگە، كاسىپورىندارعا قولداۋعا جانە ەكونوميكانى قالپىنا كەلتىرۋ بويىنشا وزگە دە شارالارعا باعىتتالعان.

قازاقستاندا جەرگىلىكتى ماماندار شەتەلدەن الىنعان قارىزدىڭ ءتيىمدى جۇمسالۋىنا كۇمان كەلتىرەدى. جەمقورلىق دەڭگەي جوعارى ەلدە مەملەكەتكە قارىز بولىپ جازىلاتىن اقشانىڭ تالان-تاراجعا ءتۇسۋى وڭاي دەيدى. مۇنىڭ مىسالى – نۇر-سۇلتان قالاسىنداعى LRT جەڭىل رەلستى كولىك جوباسى. قىتايدان العان قارىزعا جاسالۋى ءتيىس بولعان جوبا قۇرىلىسى اياقتالماي توقتاپ قالدى. جوباعا جاۋاپتى كومپانيانىڭ بۇرىنعى باسشىلارى ءىستى بولدى. قازاقستان بۇل جوبا ءۇشىن قىتايدان 1,5 ميلليارد دوللار قارىز العان.

قازاقستان Transparency International ۇيىمىنىڭ جەمقورلىق رەيتينگىندە 198 ەلدىڭ ىشىندە 113-ورىندا.

Abai.kz