سەنبى, 21 قاراشا 2026
116 0 پىكىر 21 قاراشا, 2026 ساعات 13:37

بۇۇ-دا قازاقستاننىڭ حالىقارالىق سۋ ۇيىمىن قۇرۋ تۋرالى ۇسىنىسى قارالادى

سۋرەت: basnews.kz سايتىنان الىندى

توقاەۆتىڭ باستاماسى ابۋ-دابيدە سۋ سالاسىنداعى حالىقارالىق ىنتىماقتاستىقتى ودان ءارى دامىتۋ ماسەلەلەرى اياسىندا تالقىلانادى.

قازاقستاننىڭ حالىقارالىق سۋ ۇيىمىن قۇرۋ تۋرالى ۇسىنىسىن ابۋ-دابيدە وتەتىن بۇۇ-نىڭ سۋ رەسۋرستارى جونىندەگى كونفەرەنتسياسىندا قاراۋ جوسپارلانىپ وتىر. بۇل باستامانى سەنەگال مەن بىرىككەن اراب امىرلىكتەرىنىڭ وكىلدەرى قولداپ، جاھاندىق سۋ پروبلەمالارىن شەشۋ ءۇشىن مەملەكەتتەردىڭ ۇيلەسىمدى ءىس-قيمىل جاساۋى قاجەتتىگىن اتاپ ءوتتى, دەپ حابارلايدى Jibek Jolyتەلەارناسى.

نيۋ-يوركتەگى بۇۇ شتاب-پاتەرىندە وتكەن بريفينگتە قاتىسۋشىلار باستامانى ىلگەرىلەتۋ ءۇشىن ەلدەردىڭ ورتاق ۇستانىمى، حالىقارالىق ىنتىماقتاستىقتى دامىتۋ، تاجىريبە الماسۋ جانە سۋ ينفراقۇرىلىمى بويىنشا بىرلەسكەن جۇمىس قاجەت ەكەنىن ايتتى.

سەنەگالدىڭ بۇۇ جانىنداعى تۇراقتى وكىلىنىڭ ورىنباسارى مامادۋ نديايە ەكىجاقتى جانە كوپجاقتى دەڭگەيدەگى ءوزارا ءىس-قيمىل سۋمەن جابدىقتاۋ جانە سانيتاريا ماسەلەلەرىن تيىمدىرەك شەشۋگە مۇمكىندىك بەرەتىنىن مالىمدەدى.

«جۇمىس ويداعىداي ىلگەرىلەپ كەلەدى. بۇل ۇدەرىس جاقىن ارادا اياقتالىپ، سۋمەن جابدىقتاۋ جانە سانيتاريا سالاسىنداعى حالىقارالىق ىنتىماقتاستىقتىڭ دامۋىنا ىقپال ەتەدى دەپ ۇمىتتەنەمىز. مۇندا ەكىجاقتى جانە كوپجاقتى ءوزارا ءىس-قيمىل ماڭىزدى ءرول اتقارا الادى. ءدال وسى ىنتىماقتاستىق سۋ تاپشىلىعىنا بايلانىستى ماسەلەلەردى ءتيىمدى شەشۋگە كومەكتەسەدى»، – دەدى ديپلومات.

بۇۇ جانىنداعى بىرىككەن اراب امىرلىكتەرىنىڭ تۇراقتى وكىلى مۇحامەد ءابۋشاحاب تا الداعى كونفەرەنتسيا قازاقستاننىڭ ۇسىنىسىن تالقىلاۋعا مۇمكىندىك بەرەتىنىن راستادى.

«بۇۇ-نىڭ سۋ رەسۋرستارى جونىندەگى كونفەرەنتسياسىندا ءتۇرلى باستامالاردى، سونىڭ ىشىندە حالىقارالىق سۋ ۇيىمىن قۇرۋ تۋرالى ۇسىنىستى تالقىلاۋعا مۇمكىندىك تۋادى»، – دەدى ول.

مۇنداي قۇرىلىم قۇرۋ يدەياسىن قازاقستان پرەزيدەنتى قاسىم-جومارت توقاەۆ بىلتىر اشحابادتا وتكەن حالىقارالىق فورۋمدا كوتەرگەن بولاتىن. ۇيىم مەملەكەتتەردىڭ جاھاندىق سۋ رەسۋرستارىن باسقارۋ سالاسىنداعى كۇش-جىگەرىن بىرىكتىرىپ، سۋ ماسەلەلەرىن ەنەرگەتيكا، كليمات جانە ازىق-تۇلىك قاۋىپسىزدىگى باعىتتارىمەن تىعىز بايلانىستىرۋعا ىقپال ەتەدى دەپ بولجانىپ وتىر.

ابۋ-دابيدە وتەتىن كونفەرەنتسيا حالىقارالىق ىنتىماقتاستىقتى نىعايتۋعا، ينۆەستيتسيا تارتۋعا جانە سۋ رەسۋرستارى سالاسىندا قاۋىپسىز بولاشاقتى قامتاماسىز ەتۋگە باعىتتالعان يننوۆاتسيالىق شەشىمدەردى ىزدەۋگە ارنالادى. ءىس-شاراعا قاتىسۋعا شامامەن جەتى مىڭ ادام نيەت بىلدىرگەن.

كونفەرەنتسيا اياسىندا ودان ءارى ءوزارا ءىس-قيمىل باعىتتارىنا ارنالعان جەكە ينتەراكتيۆتى ديالوگ وتەدى. ونىڭ شەڭبەرىندە قازاقستاننىڭ حالىقارالىق سۋ ۇيىمىن قۇرۋ تۋرالى ۇسىنىسى دا تالقىلانادى.

 Abai.kz

0 پىكىر