سايلاۋ قارساڭىندا «استانا» تەلەارناسى «استانا-زەرتتەۋ» قوعامدىق قورىنا ءوز قاراجاتى ەسەبىنەن الەۋمەتتىك ساۋالناما وتكىزۋگە تاپسىرىس بەرىپ، 10 مەن 15 جەلتوقسان ارالىعىندا ماماندار، حالىقتىڭ ەلەكتورالدى كوڭىل-كۇيىن زەرتتەدى. ساۋالناماعا قاتىسۋشىلار دايىن قىسقا سۇراقتارعا جاۋاپ بەردى.  الەۋمەتتىك زەرتتەۋگە نۇر-سۇلتان، الماتى، شىمكەنت قالالارى جانە رەسپۋبليكانىڭ 14 وبلىسىنان: 6 800 رەسپوندەنت قاتىستى. ىرىكتەۋ كوەففيتسيەنت قاتەلىگى شامامەن 2,1 پايىزدى قۇرادى.

«2021 جىلعى 10 قاڭتاردا ءماجىلىس جانە بارلىق دەڭگەيدەگى ءماسليحات دەپۋتاتتارىن سايلاماق. ءسىز بۇل تۋرالى بىلەسىز بە؟» دەگەن ساۋالعا، رەسپوندەنتتەردىڭ 65.4% «ءيا» دەپ جاۋاپ بەرگەن. اتاپ وتەر ەرەكشەلىگى، قالاعا قاراعاندا اۋىل تۇرعىندارىنىڭ باسىم بولىگى سايلاۋ وتەتىنى تۋرالى جاقسى بىلەتىن بولىپ شىقتى. ونىڭ ىشىندە ەر ادامدار جاقسى قۇلاقتانعان. ال جاس ەرەكشەلىگىنە كەلسەك، 46 جاستان اسقان ازاماتتار سايلاۋ تۋرالى اقپاراتتى جاقسى بىلەتىنىن كورسەتكەن.

«2021 جىلعى 10 قاڭتاردا وتەتىن سايلاۋدا داۋىس بەرۋدى جوسپارلاپ وتىرسىز با؟» ساۋالىنا قاتىسۋشىلاردىڭ 58,1%-ى وڭ جاۋاپ بەرگەن. اۋىل حالقىنىڭ ۇلەسى باسىم، ناقتىراق ايتساق 66,8%-ى سايلاۋعا باراتىندارىن ايتتى. ال، قالالىقتاردىڭ ۇلەسى 52,6%.

«پارتيانى تاڭداۋ كەزىندە ءسىز ءۇشىن نە ماڭىزدى؟» دەگەن سۇراققا 28,7%-ى ءبىرىنشى كەزەكتە پارتيا كوشباسشىسىنا دەگەن سەنىمدى تاڭداپتى. ەكىنشى - 26,8%-ى ەلدەگى جاعدايدى ساياسي پارتيا وزگەرتە الادى دەپ سەنەدى. ساۋالناماعا جاۋاپ بەرگەندەردىڭ 21,6%-ى پارتيانىڭ ساياسي كەلەشەگىن ماڭىزدى دەپ سانايدى. 20,1%-ى بولسا قاراپايىم ازاماتتاردىڭ مۇددەسىن قورعاي الۋى دەپ كورسەتكەن.

بۇعان قوسا، سايلاۋعا بارۋدى جوسپارلاپ وتىرعان ساۋالناماعا قاتىسۋشىلارىنان، «2021 جىلعى 10 قاڭتاردا ءوز سايلاۋ ۋچاسكەڭىزگە كەلسەڭىز، قاي پارتيانى تاڭدايسىز؟» دەگەن ساۋالعا قاتىسۋشىلاردىڭ 74,2%-ى Nur Otan-عا داۋىس بەرۋگە دايىن ەكەنىن كورسەتكەن. سونداي-اق، «Aق جولعا» – 5,2%، قازاقستان حالىق پارتياسىنا – 4,4%، «اۋىل» – 4,1% جانە Adal ساياسي پارتياسىنا – 2,5% داۋىس بەرمەك. بۇدان وزگە 9,6% ازىرگە ەشقانداي شەشىم قابىلداماعانىن جەتكىزگەن.

ايتا كەتەيىك، «استانا» تەلەارناسىنىڭ تاپسىرىسىمەن «استانا-زەرتتەۋ» قوعامدىق قورى سايلاۋ جاقىنداعاندا سايلاۋشىلاردىڭ كوڭىل-كۇيىن ءبىلۋ ماقساتىندا تاعى دا وسىنداي الەۋمەتتىك ساۋالناما وتكىزەدى. بۇعان قوسا سايلاۋ كۇنى قورىتىندى جاساماق.

«استانا» تەلەارناسىنىڭ سيۋجەتىن مىنا جەردەن كورە الاسىزدار.

Abai.kz