جىلدىڭ سوڭعى كۇندەرىندە سۋىق حابار كەلدى. ابايدىڭ تىكەلەي ۇرپاعى، شوپشەگى - ايدار باعفۇرۇلى اقىلباەۆ دۇنيەدەن ءوتتى. سوڭعى ساپارعا شىعارىپ سالۋعا ابايدىڭ، قۇنانبايدىڭ ۇرپاقتارى جينالدى.

جانازاسىنا مادەنيەتتانۋشى مۇرات اۋەزوۆ، ديار قوناەۆ قاتىستى. اقىننىڭ تۇياعىمەن قوشتاسۋ ءۇشىن اباي ەلىنەن اباي اۋداندىق مادەنيەت ءبولىمىنىڭ باسشىسى ەلدار ورازالين كەلدى. ول مارقۇمنىڭ تۋىستارىنا شىعىس قازاقستان وبلىسىنىڭ اكىمىنىڭ، اباي اۋدانىنىڭ اكىمىنىڭ اتىنان كوڭىل ايتتى.

سۋىق حاباردى ەستىپ، سەمەيدەن الماتىعا ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق قورىق-مۇراجايىنىڭ ديرەكتورى تۇردىقۇل شاڭباي كەلدى.

ايدار باعفۇرۇلى اقىلباەۆ الماتىنىڭ ورتالىق زيراتىندا شەشەسى عافۋرا راززاققىزى، اعاسى باۋكەن باعفۇرۇلىنىڭ جانىندا جەرلەندى.

قازىرگى تاڭدا ابايدان تىكەلەي ەركەك كىندىكتى ەكى-اق ۇرپاق قالدى. ولار - ايداردىڭ ۇلى دانيار جانە ايداردىڭ اعاسى ەرنەستتىڭ ۇلى - ايدوس. ەكەۋى دە - ابايدىڭ ءدىلدادان تۋعان ۇلكەن ۇلى اقىلبايدىڭ ۇرپاقتارى.

ايدوس اقىلباەۆ ۋكراينادا تۇرادى. دانيار اقىلباەۆ مۇحيتتانۋشى، جاسى ەلۋدىڭ شاماسىندا، ءۇش قىزدىڭ اكەسى.

ايدار اقىلباەۆ 1949 جىلى الماتىدا تۋعان. باعفۇر الىمقۇلۇلى مەن عافۋرا راززاققىزىنىڭ ءۇش ۇلىنىڭ كەنجەسى ەدى. اعالارى  - ەرنەست، باۋكەن.

اكەسى باعفۇر كەزىندە بايلاردىڭ ۇرپاعى، ابايدىڭ ۇرپاعى رەتىندە قۋدالاۋعا ۇشىرىلدى. اناسى  عافۋرا - راززاق ومارحانۇلى اۋەزوۆتىڭ قىزى. راززاق  - مۇحتار اۋەزوۆتىڭ تۋعان اعاسى ەدى. دەمەك، ايدار اقىلباەۆ ءھام ابايدىڭ ۇرپاعى، ءھام اۋەزوۆ اۋلەتىنىڭ جيەنى ەدى. باعفۇر مەن ۇلكەن ۇلى ەرنەست ۇزىناعاشتىڭ ماڭايىندا ورنالاسقان مىڭباەۆ اۋىلىنىڭ زيراتىندا جەرلەنگەن.

ايدار اقىلباەۆ پوليتەحنيكالىق ينستيتۋتىن ءبىتىرىپ، كوپ جىل ماڭعىستاۋ مۇڭاي وندەۋ سالاسىندا جۇمىس ىستەگەن. بەرتىنگى كەزدە الماتىعا كوشىپ كەلگەن.

جەرلەۋ راسىمىنەن كەيىن، ايدار اقىلباەۆقا قۇران باعىشتالعان. كارانتين شارالارىنىڭ سەبەبىنەن، اسىنا كوپ ادامدى جيناۋعا مۇمكىندىك بولمادى. ەڭ جاقىن تۋىستارى - ابايدىڭ تىكەلەي ۇرپاقتارى، بىرگە وقىعان دوستارى، ەلدەن كەلگەن تۇردىقۇل شاڭباي، ەلدار ورازالين جينالدى، مارقۇمدى ەسكە الدى.

تۇردىقۇل شاڭباي مەن ەلدار ورازالين بيىل وتكەن ابايدىڭ 175-جىلدىعى تۋرالى دا ەكى اۋىز ءسوز ايتتى.

ولاردىڭ ايتۋىنشا، اتى جامان اۋرۋدىڭ ىندەتىنىڭ كەسىرىنەن دۇركىرەگەن توي وتپەسە دە، بارلىق ايماقتاردا، سونىڭ ىشىندە ابايدىڭ ەلىندە كوپتەگەن ءىس-شارالار، ونلاين-كونفەرەنتسيالار، كىتاپتاردىڭ تۇساۋكەسەرلەرى، چەللەندجتەر، كونتسەرتتەر وتكەن.

كارانتين بولعاندىقتان، ولاردىڭ كوبىسى ونلاين-رەجيمىندە وتكەن. ابايدىڭ مەملەكەتتىك تاريحي-مادەني جانە ادەبي-مەموريالدىق قورىق- مۇراجايىندا رەمونت، رەكونسترۋكتسيا، مودەرنيزاتسيا ءوتتى.

مۇراجايدا ءۇش ءتىلدى ساندىق (ەلەكتروندىق) گيد باعدارلاماسى ورناتىلدى. دەمەك، مۇراجايدا ءۇش تىلدە ەكسۋرسوۆودسىز ەكسكۋرسيانى جاساۋعا بولادى. ابايدىڭ مۇراسىن ۇمىتپاۋ، ساقتاۋ، زەرتتەۋ، دارىپتەۋ ءۇشىن ۇكىمەت كوڭىلىن، قاراجاتىن ءبولىپ ءجۇر.

بيىل مەملەكەت باسشىسى اباي ەلىنە ساپار جاساپ، اۋىلدىڭ اقساقالدارىنان باتاسىن العان. ابايدىڭ ەسىمى، ابايدىڭ مۇراسى، ابايدىڭ ەلى مەملەكەت باسشىسىنىڭ، ۇكىمەتتىڭ نازارىنان تىس قالمايدى.

حاكىم اباي ايتقانداي، «ولسە ولەر تابيعات، ادام ولمەس». دەمەك، ابايدىڭ ۇرپاعى ايداردىڭ دا ەسىمدەرى ەل ەسىندە قالادى.

اسقار دايىربەك

Abai.kz