جەكسەنبى, 7 ناۋرىز 2021
1684 2 پىكىر 22 قاڭتار, 2021 ساعات 14:35

قىرعىز ۇكىمەتى وتستاۆكاعا كەتتى

قىرعىزستان پرەزيدەنتى مىندەتىن ۋاقىتشا اتقارۋشى، جوگوركۋ كەڭەش سپيكەرى تالانت مامىتوۆ پرەمەر-مينيستر مەن ۇكىمەتتىڭ وكىلەتىن اياقتاۋ تۋرالى جارلىققا قول قويدى. بۇل تۋرالى مەملەكەت باسشىسىنىڭ سايتىندا حابارلاندى.

حابارلامادا پرەزيدەنت سايلاۋىنىڭ رەسمي قورىتىندىسى جاريالانىپ، سادىر جاپاروۆتىڭ پرەمەر-مينيستر وكىلەتىن اياقتاۋ تۋرالى ءوتىنىش بەرگەنى جازىلعان.

ازاتتىقتىڭ قىرعىز قىزمەتىنىڭ جازۋىنشا، بۇل جارلىق بويىنشا ۇكىمەت تولىق وتستاۆكاعا كەتتى دەپ سانالادى. پرەمەر-مينيستر مىندەتىن ارتەم نوۆيكوۆ ۋاقىتشا اتقارادى.

بۇعان دەيىن سادىر جاپاروۆتىڭ پرەزيدەنت سايلاۋىنىڭ رەسمي ناتيجەسى شىققاننان كەيىن پرەمەر-مينيستر وكىلەتىنەن باس تارتاتىنى حابارلانعان ەدى. كونستيتۋتسيا بويىنشا، بۇدان سوڭ ۇكىمەت تولىق وتستاۆكاعا كەتۋى ءتيىس.

بىلتىر 6 قازاندا قىرعىزستاندا حالىق تولقۋى بولىپ، ارتىنشا بيلىك اۋىسقان. جوگوركۋ كەڭەشتىڭ كەزەكتەن تىس وتىرىسىندا سادىر جاپاروۆ پرەمەر-مينيستر بولىپ تاعايىندالعان. كەيىن ول پرەزيدەنت سايلاۋىنا تۇسكىسى كەلەتىنىن ايتىپ، ۇكىمەت جەتەكشىسىنىڭ وكىلەتىن ۋاقىتشا توقتاتقان. ونىڭ مىندەتى پرەمەر-ءمينيستردىڭ ورىنباسارى ارتەم نوۆيكوۆقا جۇكتەلگەن.

20 قاڭتاردا ورتالىق سايلاۋ كوميسسياسى پرەزيدەنت سايلاۋىنىڭ رەسمي ناتيجەسىن جاريالاپ، سادىر جاپاروۆتىڭ جەڭگەنىن مالىمدەدى. ونىڭ يناۋگۋراتسياسى 28 قاڭتاردا وتەدى.

كەزەكتەن تىس پرەزيدەنت سايلاۋى 10 قاڭتاردا وتكەن، وعان 17 كانديدات قاتىسقان.

Abai.kz

2 پىكىر