قىزىلوردا وبلىستىق اپپەلياتسيالىق سوتىندا وتكەن اپتادان بەرى بۇرىنعى «اكىمدەر ءىسىنىڭ» تالقىلاۋى ءجۇرىپ جاتىر. العاشقى كۇننەن-اق بايلامى شيكى ءىستىڭ قولدان قۇراستىرىلعانى اشەكەرە بولا باستادى. سوت تالقىسىندا ءبىر-بىرىنە قيۋلاسپايتىن نەبىر دالەلدەر، ءتىپتى، ەكس-اكىمنىڭ ەكى ورىنباسارىن بىردەي جالعان كۋالىك بەرۋگە يتەرمەلەگەن اۋديو جازبا پايدا بولدى.

مۇرات يماندوسوۆتىڭ قورعاۋشىلارى دا قىزىق مالىمەت ۇسىندى. وندا وبلىستىق جۇمىلدىرۋ باسقارماسىنىڭ باسشىسى، باستى كۋاگەر اسىلبەك شامەنوۆتىڭ تەرگەۋ بارىسىندا بەرگەن جاۋابى كەلتىرىلگەن. ا.شامەنوۆتىڭ ايتۋىنشا، 08.08.2019 جىلى وبلىس اكىمىنىڭ بۇرىنعى ورىنباسارى مۇرات يماندوسوۆتىڭ كابينەتىندە جينالىس بولىپتى-مىس. ءسويتىپ، م.يماندوسوۆ «سىر مەيىرىمى» قايىرىمدىلىق قورىنان 80 ملن تەڭگەنى 4 قۇرىلىس كومپانياسىنا اۋدارتۋعا «تاپسىرما» بەرىپتى-ءمىس. شامەنوۆ سول كۇنى ءتورت كومپانيا باسشىسى مەن قايىرىمدىلىق قورىنىڭ اتقارۋشى ديرەكتورى س.ابدراحيموۆانىڭ كەزدەسۋىن ءوز كەڭسەسىندە ۇيىمداستىرادى.

بىراق سوت بارىسىندا ا.شامەنوۆ «ءتورت كومپانيا باسشىسىن كىم شاقىردى» دەگەن سۇراققا ناقتى جاۋاپ بەرگەن جوق. ەسەسىنە، سول كەڭسەدە وتىرىپ، ءتورت كومپانيا باسشىسى س.ابدراحيموۆانىڭ اتىنا 80 ملن تەڭگەنى الۋعا ءوتىنىش حات جازادى. بۇل ءتورت حات جۇمىلدىرۋ باسقارماسىنىڭ زاڭگەرى بورانباەۆ ارقىلى ازىرلەنىپ، سول جەردە قور باسشىسى س.ابدراحيموۆاعا تاپسىرىلادى.

بولماعان قۇرىلتاي

سوتقا دەيىنگى تەرگەۋدە ا.شامەنوۆ «سول جەردە س.ابدراحيموۆا قاتىسقان قور قۇرىلتايشىلارىنىڭ جيىنى ءوتىپ، 4 كومپانياعا 20 ملن تەڭگەدەن قارجى اۋدارۋ تۋرالى شەشىمگە كەلدى» دەسە، سوت بارىسىندا «بۇل وقيعا ەسىمدە قالماپتى» دەپ جالت بۇرىلدى. شامەنوۆتى دە «تۇسىنۋگە» بولادى. ويتكەنى، سوتتاعى تالقىلاۋ كەزىندە 08.08.2019 جىلى قايىرىمدىلىق قورىنىڭ ەشقانداي جيىن وتكىزبەگەنى، ال حاتتامانىڭ كەيىن جاسالىپ، ارتقى كۇنمەن قول قويىلعانى انىقتالدى. ونى قور باسشىسى س.ابدراحيموۆا دا سوتتا راستادى. سوتتا تاعى ءبىر قىزىق نارسەنىڭ باسى اشىلدى. شامەنوۆتىڭ ايتقاندارى قور باسشىسى س.ابدراحيموۆانىڭ ايتقاندارىنا مۇلدەم قاراما-قايشى بولىپ شىقتى. ابدراحيموۆانىڭ ايتۋىنشا، ول شامەنوۆكە جولىقپاس بۇرىن، سول باسقارماعا كەلىپ، «باق-بەرەكە» كومپانياسىنىڭ ديرەكتورى ايبەك ەرنازاروۆپەن كەزدەسەدى. ەرنازاروۆ وعان 80 ملن تەڭگە سۇراعان ءوتىنىش حاتتى بەرەدى. ودان سوڭ، قور باسشىسى وبلىستىق قۇرىلىس باسقارماسىنىڭ باسشىسى مۇحامەديسا السەرىكوۆكە تەلەفون سوعىپ، الگى حات جايىندا ايتادى. م.السەرىكوۆ 20 ملن تەڭگەدەن ءتورت كومپانياعا قارجى اۋدارۋىن سۇرايدى. سونداي-اق، كۋاگەرلەر كورسەتكەندەي، س.ابدراحيموۆا جۇمىلدىرۋ باسقارماسىنداعى كەزدەسۋگە م.السەرىكوۆتىڭ ايتۋىمەن كەلىپتى.

ال شامەنوۆ بولسا، تەرگەۋ بارىسىندا «باسقارماعا ءبارىن شاقىرعان قۇرىلىس باسقارماسىنىڭ قىزمەتكەرى» دەپ جالعان ايتقان بولىپ شىقپاي ما؟ الدە، شامەنوۆ «قۇرىلىس باسقارماسىنىڭ قىزمەتكەرى» دەپ م.السەرىكوۆتى ايتىپ وتىر ما؟ ەندەشە، سوت بارىسىندا ءبارىن ۇمىتىپ، نەگە «ەسىنەن تانىپ» وتىر؟ سوت تالقىسىندا سۋديا بۇل ماسەلەلەرگە نەگە ءمان بەرمەگەن؟

ا.شامەنوۆ ايتقانداي، 08.08.2019 جىلى مۇرات يماندوسوۆتىڭ كابينەتىندە جيىن جاساماعانى، ونىڭ 31.07.2019 -18.08.2019 جىل ارالىعىندا ارىس قالاسىندا ءىسساپاردا جۇرگەنى ناقتى قۇجاتتارمەن دالەلدەندى. ال «كابينەتتە جيىن جاسادى» دەگەن 08.08.2019 جىلى شىمكەنت قالاسىنداعى قوناقۇيدە تۇنەگەن. ونىڭ دا قۇجاتتارى ءىس-قاعازدارىندا تىركەلگەن. قۇرىلىس كومپانيالارىن تاڭداۋعا دا مۇرات يماندوسوۆتىڭ مۇلدەم قاتىسى بولماعان. ونى ا.شامەنوۆپەن بەتتەستىرۋ كەزىندە دە دالەلدەگەن. قورعاۋشىلار «تىڭعىلىقتى ءمان بەرىلمەگەن بۇل جاعداي سوتتىڭ مۇرات يماندوسوۆقا قاتىستى ادىلەتسىز ۇكىم شىعارۋىنا ءماجبۇر ەتتى» دەگەن پىكىردە.

بىراق «تەرگەۋدە جالعان كۋالىك بەرگەنى ءۇشىن ا.شامەنوۆ قىلمىستىق جاۋاپكەرشىلىكتەن قالاي سىتىلىپ كەتتى؟» دەگەن زاڭدى سۇراق تۋادى. ونىڭ جاۋابى تومەندەگى ماسەلەلەردە سەكىلدى.

ديكتوفونداعى «ديۆەرسيا»

«اپپەلياتسيالىق تالقىلاۋ كەزىندە تاعى ءبىر سۇمدىق وقيعا بەلگىلى بولدى. ول جايىندا ادۆوكات ءلاززات كەندەبايقىزى فەيسبۋكتاعى پاراقشاسىندا بىلاي جازدى:

«انتيكوردىڭ “اكىمدەر ىسىنە” بايلانىستى تاعى ءبىر قيتۇرقى وپەراتسياسى تۋرالى.

ق.ىسقاقوۆتى تورعا ءتۇسىرۋ ءۇشىن تەرگەۋ جۇرگىزگەن سىبايلاس جەمقورلىققا قارسى كۇرەس اگەنتتىگىنىڭ قىزمەتكەرلەرى ونىڭ ەكى ورىنباسارى م.يماندوسوۆ پەن م.دەلمۇحانوۆتى دا وبلىس باسشىسىنا قارسى “پوكازانيا بەرۋگە وبرابوتكا” جاسايدى..

ىسكە دالەلدەمە رەتىندە تىركەلگەن اۋديجازبا وسىنى كورسەتەدى.

ءىستىڭ 14-ءشى تومىنىڭ 65-ءشى بەتىندە ەكى ورىنباساردىڭ 01.04.2019 جىلعى اڭگىمەسى ديكتوفونعا جازىلىپ قالعان ديسك بار.

ول جەردە م.دەلمۋحانوۆقا م.يماندوسوۆ انتيكوردىڭ قىزمەتكەرلەرى وزىنە “اكىم تاپسىرما بەردى دەپ ايت، وبناليچيۆات ەتىپ اكەلىپ بەر دەپ تاپسىرما بەردى دەپ ايت”-دەپ قىسىم كورسەتىپ جاتقانىن اتاپ كورسەتەدى.

سونداي-اق، م.يماندوسوۆ ولارعا ولاي وتىرىك ايتا المايتىنىن ايتقانىن، وعان تەرگەۋ ورگانى قىزمەتكەرلەرىنىڭ رەنجىپ جاتقاندىعىن ايتادى.

سوزبەسوزكەلتىرسەك:

د: - “ۆى دولجنى زاششيششاتسيا ۆدۆوەم” دەپ ايتىپ جاتىر (انتيكور قىزمەتكەرلەرى)

ي: - جوق ەندى، زاششيشاتسيا ەتكەندە، نە دەپ زاششيششاتسيا ەتەمىز؟ وتىرىك ايتامىز با ەندى؟ ەرتەڭ ونى زا لوجنىە پوكازانيا دەپ تارتىپ كەتەدى عوي.. پەشەنەمىزگە كورىنىپ تۇرعان شىعار، كورەمىز ونى، كونەچنو، وڭاي ەمەس (بالاعات ءسوز)

سونىڭ بارىنە قۇداي قۋات بەرسىن. قازىر وتىرىك ايتىپ سۆوبودادا جۇرگەن كەزدە، جۇرە المايسىڭ عوي..

د:-جىبەرمەيدى دەيسىز عوي؟

ي:- كونەچنو...

بۇل جەردە مۇرات يماندوسوۆ تەرگەۋ ورگانى تاراپىنان قالاي ۇگىتتەسە دە، وتىرىك ايتىپ، جالعان جاۋاپ بەرە المايتىنىن ايتىپ وتىر..» (اۆتوردىڭ جازۋ ءستيلى مەن ورفوگرافياسى ساقتالدى).

اۋديوجازبادان بايقاعانىمىزداي، سىبايلاس جەمقورلىققا قارسى كۇرەس باسقارماسىنىڭ قىزمەتكەرى مۇرات يماندوسوۆقا «قۋانىش ىسقاقوۆقا قارسى كۋالىك بەرسەڭىز، ءسىزدى بوستاندىققا شىعارامىز» دەپ وتىر. بىراق مۇرات يماندوسوۆ ار الدىندا ادال بولىپ قالعىسى كەلگەن. سوندىقتان، جالعان كۋالىك بەرۋدەن باس تارتىپتى.

«قىلمىستىق ءىستىڭ» اناتومياسى: شامەنوۆ كىمنىڭ شىكاراسى؟

جالپى، وسى «قىلمىستىق ءىستىڭ» اناتومياسىن ءتۇسىنۋ ءۇشىن الدىمەن كۋالىكتەرىن تەرگەۋ سايىن وزگەرتكەن ەكى-ءۇش كۋاگەردىڭ ءومىر جولىنا از-كەم كوز تاستاپ وتەلىك. مۇرات يماندوسوۆقا قارسى تۇسىنىك بەرگەن اسىلبەك شامەنوۆ 1978 جىلى جالاعاش اۋدانىندا دۇنيەگە كەلگەن. اكەسى ومىربەك شامەنوۆ كەزىندە كەڭشار ديرەكتورى، اۋدان باسشىسى، ودان كەيىن قىزىلوردا وبلىستىق جولاۋشىلار كولىگى جانە اۆتوموبيل جولدارىباسقارماسىن باسقارعان. وبلىس جۇرتشىلىعى الدىندا بەدەلدەن كەندە ەمەس. جالعىز ۇلى اسىلبەكتى قاتارىنان كەم قىلعان جوق. بىلەتىندەردىڭ ايتۋىنشا، وقىتتى، توقىتتى، جالعىز ۇلدى «ادام قىلۋ ءۇشىن» ارىن دا سالدى، بارىن دا سالدى. ناتيجەسى جامان ەمەس. اسىلبەك شامەنوۆ كارەرالىق ءوسۋ جولىندا اكەسىن «شاڭ قاپتىردى». قىسقاشا دوسەسىنە زەر سالساق:

2007-2012 جىلدارى قىزىلوردا وبلىسىنىڭ مەملەكەتتىك ساۋلەت-قۇرىلىس باقىلاۋ، سونداي-اق وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارمالارىندا جاۋاپتى قىزمەتتەر اتقارعان.

2012-2015 جىلدارى قىزىلوردا وبلىسىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى.

2015-2018 جىلدارى، پالەن جىلدان بەرى تاپجىلماي قىزىلوردا قالاسىن باسقارىپ وتىرعان قىزىلوردا قالاسىنىڭ اكىمى ن.نالىباەۆقا ورىنباسار بولعان.

2018 جىلدىڭ مامىرىنان قىزىلوردا وبلىسىنىڭ جۇمىلدىرۋ دايىندىعى باسقارماسىنىڭ باسشىسى، ال 2020 جىلدىڭ ناۋرىز ايىنان باستاپ جالاعاش اۋدانىنىڭ اكىمى قىزمەتىن اتقارىپ كەلەدى.

وسى جەردە مىنا نارسەنى ەستە ساقتاڭىز: اسىلبەك شامەنوۆتىڭ «اكىمدەر ءىسى» بارىسىندا تەرگەۋ ورگانىنا ءبىر رەت-اق رەت بارعان، ياعني ءبىر-اق رەت تۇسىنىكتەمە بەرگەن. مۇنداي ماڭىزدى فيگۋرانتتىڭ السەرىكوۆ، رۇستەموۆ جانە باسقا «كۋاگەرلەر» سىقىلدى تەرگەۋ ورگانىنىڭ تابانىن توزدىرماۋىندا نە گاپ بار؟..

ايتپاقشى، ەسكە سالا كەتەيىك، اسىلبەك شامەنوۆتىڭ شامەنوۆ شامۇرات ايتمۇراتۇلى دەگەن 1980 جىلعى نەمەرە ءىنىسى بار ەكەنىن كوبى بىلە بەرمەيدى. ءوزى دە اتى-ءجونى مەن ءومىربايانى جارىققا شىققانىن قالامايدى. قاراپايىم ادامنىڭ تىلىمەن ايتقاندا، ول «ماسەلە شەشەتىن» قىزمەت اتقارادى. شامۇرات شامەنوۆ قر سىبايلاس جەمقورلىققا قارسى ءىس-قيمىل اگەنتتىگىنىڭ قىزىلوردا وبلىسى بويىنشا دەپارتامەنتىندە تەرگەۋ بولىمىنە باسشىلىق جاسايدى. نەگىزىندە، قۇقىقتىق قوعامدا مۇنداي ءىس بىتكەنشە كۇدىكتى نەمەسە كۋاگەردىڭ تۋىستارى جاۋاپتى قىزمەتتەن ۋاقىتشا الاستاتىلۋى كەرەك ەدى. بىزدە ءبارى كەرىسىنشە...

ءسىز كىمسىز، س. حانىم؟

«اكىمدەر ءىسىنىڭ» تاعى ءبىر كۋاگەرى – «سىر مەيىرىمى» قايىرىمدىلىق قورىنىڭ اتقارۋشى ديرەكتورى ساپۋرا ابدراحيموۆا حانىم. بۇل كىسى جايلى ماعلۇمات تام-تۇم. وسى داۋلى وقيعا باستالعان ساتتە-اق، فەيسبۋكتەگى پاراقشاسىنداعى سۋرەتتەرى مەن كوپتەگەن مالىمەتتەردى ءوشىرىپ تاستاعان. ازىرگە بەلگىلىسى – ساپۋرا ابدراحيموۆا بۇرىنعى پروكۋروردىڭ قىزى. قىزىلوردا قالاسىنداعى پەداگوگيكالىق ينستيتۋتتى بىتىرگەن. بىراق پەداگوگيكادان گورى، قايىرىمدىلىق شاراسىمەن اينالىسۋدى ءجون كورگەن سەكىلدى. باستاپقىدا وبلىس اكىمدىگىندە ىشكى ساياسات سالاسىندا قىزمەت اتقانعان. ءوزىنىڭ ايتۋىنشا، 1995 جىلى بەردىبەك ساپارباەۆ قىزىلوردا وبلىسىنا اكىم بولىپ كەلگەننەن كەيىن ساپۋرا حانىمدى قايىرىمدىلىقپەن اينالىسۋعا ۇسىنىس جاساعان. ءسويتىپ، 1997 جىلى ەلباسىنىڭ تاپسىرماسىمەن قور قۇرىلدى دەيدى ابدۋراحيموۆا. مىنە، سودان بەرى ول وسى سالادا جۇمىس ىستەپ كەلەدى.

بىلتىرعى العاشقى سوتتا بەرگەن تۇسىنىكتەمەلەرىنە قاراعاندا، قۋانىشبەك ىسقاقوۆ باستاعان توپتىڭ ۇستىنەن نۇر-سۇلتان قالاسىنداعى سىبايلاس جەمقورلىققا قارسى كۇرەس اگەنتتىگىنە ارىز جازعان. بىراق ءبىر «قىزىعى»، ءتيىستى قۇجاتتارسىز ءتورت كومپانياعا زاڭسىز قارجى اۋدارعان ساپۋرا ابدراحيموۆا قىلمىستىق ىستەن شەت قالدى. بىلتىرعى سوتتا ساپۋرا حانىم «وبلىستىق قۇرىلىس باسقارماسىنىڭ باسشىسى مۇحامەديسا السەرىكوۆ پەن اكىمنىڭ بۇرىنعى ورىنباسارى مۇرات يماندوسوۆ «80 ملن تەڭگەنى العان ءتورت فيرما دا قاجەتتى قۇجاتتاردى اكەپ بەرەدى دەپ اۋىزشا سەندىردى» دەپ جاۋاپ بەرگەن. ەگەر، مۇرات يماندوسوۆقا ساپۋرا ابدراحيموۆانىڭ وسى ءسوزى ايعاق بولىپ، سوتتاۋعا نەگىز بولسا، مۇحامەديسا السەرىكوۆ قالايشا «امان» قالدى؟

تاعى ءبىر «قىزىق» فاكت. 2020 جىلى 10 ناۋرىزدا ساپۋرا ابدراحيموۆا ديكتوفونىن قۇشاقتاپ، مۇرات يماندوسوۆتىڭ كابينەتىنە دە كىرگەن. قۇپيا جازىلعان اۋديودا ساپۋرا حانىم ارىسقا اۋدارىلعان قارجى بويىنشا ءتورت مەكەمە ءتيىستى قۇجاتتارىن تاپسىرماي جاتقانى تۋرالى بايانداعاندا مۇرات سامۇراتۇلى كوپ ماسەلەدەن حابارسىز بولىپ شىعادى. مۇندا، ءتورت كومپانياعا اقشا اۋدارىلعانىن بىلمەيتىنىن ايتا كەلە، ءمان-جايدى مۇحامەديسا السەرىكوۆتىڭ وزىنەن سۇراۋعا جانە قۇرىلىس كومپانيالارىنان ورىندالعان قىزمەت اكتىسىن الۋعا، ايتپەسە سوتقا جۇگىنۋگە كەڭەس بەرەدى. ال ساپۋرا زايتجانقىزىنىڭ ەكى ءسوزىنىڭ ءبىرى «ماعان مۇحامەديسا ايتتى» بولعان. قىسقاسى، ەكەۋارا ديالوگتا قور ديرەكتورى السەرىكوۆتىڭ ينسترۋكتسياسىمەن ءجۇرىپ-تۇرعانى بايقالادى. بالكىم، ءوزىنىڭ قيتۇرقى قادامىن ىسكە اسىرۋ ءۇشىن «باستىقتىڭ»، «اكىمنىڭ» اتىن جامىلىپ، «سول ايتتى» دەگەن ميف تۋدىرىپ، ساپۋرا حانىمدى قۇرىققا ءتۇسىردى مە ەكەن، كىم ءبىلسىن؟! ءبىر انىعى، قور ديرەكتورى مۇرات سامۇراتۇلىنان قانشا ىلىك ىزدەگىسى كەلگەنىمەن ءبارىبىر ونىسىنان تۇك شىقپايتىن. سەبەبى، مۇرات يماندوسوۆتىڭ قارجىعا قاتىستى تۇسىنىكسىز، يا بولماسا جىمىسقى تىرلىكتەن مۇلدە حابارى جوق ەدى.

مۇحامەديسانىڭ «مۇرتىن بالتا شاپپايدى». نەگە؟

مۇحامەديسا السەرىكوۆ شيەلى وڭىرىندە دۇنيەگە كەلگەن. قىزىلوردالىقتاردىڭ ايتۋىنشا، مۇحامەديسانىڭ جۇلدىزىن جاققان قازىرگى قىزىلوردا قالاسىنىڭ اكىمى نۇرلىبەك نالىباەۆ. كەزدەيسوقتىق پا، كىم ءبىلسىن؟ 2008 جىلى شيەلى اۋدانىنا اكىم بولىپ بارعاننان كەيىن السەرىكوۆتى شيەلى كەنتىنە اكىم قىلدى. 2013 جىلدىڭ 13 اقپانىندا ن.نالىباەۆ بۇرىنعى وبلىس اكىمى قىرىمبەك كوشەرباەۆتىڭ وكىمىمەن قىزىلوردا قالاسىنىڭ اكىمى بولىپ تاعايىندالعانىندا، وزىمەن بىرگە مۇحامەديسانى دا الا كەلدى. ونى قىزىلوردا قالاسى قۇرىلىس جانە ساۋلەت باسقارماسىنىڭ باسشىسى عىپ تاعايىنداپ جىبەردى. مۇحامەديسا قىزىلوردا قالاسىندا ەل ريزا بولاتىنداي ەشتەڭە بىتىرگەن جوق. كەرىسىنشە، قولعا العان ەكى ءىسىنىڭ ءبىرى ۇيلىعىپ، پروگرەسس كورسەتە المادى. السەرىكوۆتىڭ «ءالسىز تۇسىن» ىزدەگەن جان قىزىلوردادا بىرنەشە جىل باتپاققا باتقان «ساياحات» مولتەكاۋدانىن ەسكە السا دا جەتىپ جاتىر. مەملەكەتتىك باعدارلامامەن سالىنعان جاڭا ۇيلەردىڭ ساپاسىز ەكەندىگى جايلى سيۋجەتتەر رەسپۋبليكالىق تەلەارنالار ەفيرىنەن تۇسكەن ەمەس. السەرىكوۆتىڭ جۇمىسىنداعى كەمشىلىكتەرگە قاراماستان، وبلىس اكىمى قىرىمبەك كوشەرباەۆ 2016 جىلى وبلىستىق قۇرىلىس باسقارماسىنىڭ تىزگىنىن ۇستاتادى. السەرىكوۆ ونى دا قاتىرمادى. جاڭاقورعان اۋدانىنداعى اققۇم اۋىلىنا قاراستى مەكتەپ قۇرىلىسى دەر كەزىندە اياقتالماي ءبىر شۋ بولسا، ارال ماڭىندا تاعى ءبىر وقۋ ورداسىنىڭ قۇرىلىسى قاڭتارىلىپ قالدى. ول جايىندا بۇقارالىق اقپارات قۇرالدارى جازۋداي-اق جازىپ جاتتى. بىراق مۇحامەديسانىڭ مۇرتىن بالتا دا شاپقان جوق. ءتىپتى، ونى بىلاي قويعاندا، «اكىمدەر ءىسى» بويىنشا كۇدىكتىلەر قاتارىنا قوسىلعان جوق. قورعاۋشىلاردىڭ ايتۋىنشا، جالعان كۋالىكپەن قاتارداعى كۋاگەرگە اينالىپ شىعا كەلدى. بۇل دا ءبىر تەرەڭ زەرتتەۋدى قاجەت ەتەتىن ماسەلە...

ءتۇيىن. اپپەلياتسيالىق سوت وتىرىسىندا بۇرىن كوزگە ىلىنبەگەن وسىنداي ماڭىزدى ماسەلەلەردىڭ ىشەك-قارىنى اقتارىلا باستادى. ەگەر، قازاقستاندىق فەميدا الجىعان، كورسوقىر بولماسا، ناقاق جالانىڭ قۇرباندارى اقتالۋى ءتيىس. قىزىلوردالىقتار وسىعان سەنەدى.

توقتار جاقاش

قوسىمشا: Abai.kz اقپاراتتىق پورتالى ەركىن اقپارات الاڭى. مۇندا وي جارىستىرىپ، پىكىر الماستىرۋعا اركىم قۇقىلى. الداعى ۋاقىتتا ماقالادا ەسىم-سويلارى اتالعان جەكەلەگەن ازاماتتار رەداكتسيامىزعا جاۋاپ بەرۋگە نيەتتى بولسا، ولاردىڭ دا پىكىرىن بەرۋگە ءازىرمىز. 

Abai.kz