كولىگىنە كۇشى ساي سلاۆيان ءناسىلدى ازامات اتاقتى «التىن وردا» بازارىنا كەلدى. ونىڭ مايدا اقشامەن قولما قول تولەم جاساۋدى تالاپ ەتكەن پاركوۆششيك قازاق جىگىتىمەن توبەلەسى الدىڭعى اكىم باۋىرجان بايبەكتىڭ الماتىنىڭ كولىك تۇراقتارىن مودەرنيزاتسيالاۋ جوباسىنىڭ قالا ىرگەسىنە جەتپەگەنىن، تولىق جۇزەگە اسپاعانىن كورسەتتى. بازار اكىمشىلىگىنىڭ كولىك تۇراعىن اۆتوماتتاندىرماعانى بىلاي تۇرسىن، ونلاين تولەم جۇيەسىن دە جولعا قويماعانى، قىسقارتىپ ايتقاندا تسيفرلانباعانى ءمالىم بولدى. قالتاسىنا ءبۇتىن جيىرما مىڭ سالعان ورىس جىگىتى دە، كاسپي گولدى جوق قازاق جىگىتى دە بۇل فاكتىنى قاپەرىنە المادى. انىعىندا ءبىر - بىرىنە تۇسىندىرگىلەرى كەلمەدى. سەزىمگە بوي الدىردى. كرۋتوي كيلەنت قوعامدىق ورتادا ءوزىن ۇيىندە، «چاستنىي تەرريتوريا»دا جۇرگەندەي ۇستاسا، تۇراق قاراۋشى پاركوۆششيكتىڭ ەڭ باستى قاعيداسى «ليۋبوي دۋراك پەن ايقايلاسپاۋ كەرەك» ەكەنىن ۇمىتتى.

قالادا ەپيدەميالىق احۋال ۋشىعىپ، كارانتين كۇشەيگەن ۋاقىتتا «التىن وردا» دا ساۋدانىڭ عانا ەمەس، توبەلەستىڭ دە قىزىپ تۇرعانى ەل نازارىن اۋداردى. قوعامدىق بەلسەندىلىگى الەۋمەتتىك جەلىدە پوست جازۋدان ارى اسپايتىن ءسوزۋار جۇرت ءجۇز تەڭگەدەن تۋىنداعان توبەلەسكە ۇلتتىق ، ساياسي سيپات بەرىپ سان ساققا جۇگىرىتتى. كرۋتوي جىگىت ءوزىن بەلگىسىز بىرەۋلەردىڭ اڭدىپ جۇرگەنىن ايتىپ، وقيعانى شيەلەنىستىرە ءتۇستى. ەڭ قىزىعى ءبۇل توبەلەستىڭ باستالۋىنان اياقتالۋى تەز بولدى. الەم جەلى بەلسەندىلەرى بازارداعى توبەلەسكە قوعامدىق ادۋاكات بولىپ، ەكى تاراپتىڭ ارەكەتىنە  زاڭدىق تۇرعىدان ءتۇرلى سيپاتتاما بەرىپ ، قىزىل كەڭىردەك بولىپ ايتىسىپ جۇرگەندە، مىنا جاقتا توبەلەسكەن ەكى تاراپ تاتۋلاسىپ ۇلگىرىپتى. كرۋتوي كليەنتتىڭ بۇلىنگەن ماشيناسىنىڭ، پاركوۆششيك جىگىتتىڭ سىنعان مۇرىنىن قۇنىن كىم تولەيتىنى كوپشىلىكە بەلگىسىز كۇيىنلە قالدى.

وسىلايشا قازاقستاننىڭ الماتى قالاسىنىڭ اتاقتى «التىن وردا» بازارىنداعى 100 تەڭگەدەن تۋعان توبەلەستى ارقاۋ ەتكەن مەلودراما شارىقتاۋ شەگىنە جەتپەي، توسىننان اياقتالدى.«وسپەيتىن ەلدىڭ بالاسى ونبەيتىن داۋدى قۋادى» دەگەن بابالاردان قالعان ءسوزدىڭ جانى بار - اۋ، تەگىندە؟!

ەسبول ۇسەنۇلىنىڭ جازباسى

Abai.kz