سەنبى, 8 مامىر 2021
جاعىمدى جاڭالىق 2761 14 پىكىر 7 ءساۋىر, 2021 ساعات 13:31

تاۋەلسىزدىككە تارتۋ: كەرەكۋدەگى 23 كوشەنىڭ اتاۋى قازاقشالاندى

كەرەكۋ (پاۆلودار) قالاسىنداعى 23 كوشەنىڭ اتاۋى قازاقشالاندى. بۇل تۋرالى اقىن، ءتىل جاناشىرى، قوعام قايراتكەرى ارمان قاني رەداكتسيامىزعا حابارلادى. 

ارمان مىرزانىڭ ايتۋىنشا، قالالىق ءماسليحات دەپۋتاتتارى بۇل باستامانى ءبىراۋىزدان قولداعان.

«ءسۇيىنشى! پاۆلودار قالالىق ءماسليحات دەپۋتاتتارى الگى ازىردە 23 كوشەنىڭ اتاۋىن ەگەمەن ەلدىگىمىزگە لايىق اتاۋلارعا اۋىستىرۋ جونىندەگى ماسەلەنى داۋىسقا سالۋ بارىسىندا 100 پايىز قولدادى! قۋانىش ۇزاعىنان بولسىن!»،- دەپ جازدى ارمان قاني.

سونىمەن، كەرەكۋدەگى كەيبىر كەڭەستىك اتاۋلار ەندى تاۋەلسىز ەل بولمىسىنا ساي وزگەرمەك.

سونىمەن:

1. مير كوشەسى - ولجاباي باتىر،

2. ەرماكوۆ كوشەسى - مۇستافا شوقاي،

3. نابەرەجنايا - شون بي،

4. ۋريتسكي كوشەسى - گەنەرال (ۇكىمەت) سماعۇلوۆ،

5. تسيولكوۆسكي كوشەسى - باۋىرجان مومىشۇلى،

6. روزا ليۋكسەمبۋرگ كوشەسى - قازاق راديوسى،

7. تەپلوۆ كوشەسى - بوگەنباي باتىر،

8. 1-يا يۋجنايا كوشەسى - بىرلىك،

9. 2-يا يۋجنايا كوشەسى - كاۋكەن كەنجەتاەۆ،

10. پاركوۆايا كوشەسى - مۇقاعالي ماقاتاەۆ،

11. دونەتسكايا كوشەسى - ماعجان جۇماباەۆ،

12. كۋبانسكايا كوشەسى - قالمۇقان يساباەۆ،

13. سوۆحوزنايا كوشەسى - رافيعا نۇرتازينا،

14. تاگانروكسكايا كوشەسى - قازانعاپ بي،

15. انگارسكايا كوشەسى - ناعىمبەك نۇرمۇحاممەدوۆ،

16. چيتينسكايا كوشەسى - امانجول شامكەنوۆ،

17. دەكابريستوۆ كوشەسى - قامار قاسىموۆ،

18. مولودەجنايا كوشەسى - جاستار كوشەسى،

19. يۋنناتوۆ كوشەسى - ديحان ءابىلوۆ،

20. 1-يا سوۆەتوۆ كوشەسى، 2-يا سوۆەتوۆ كوشەسى - گەنەرال باكىروۆ،

21. زىريانوۆسكايا كوشەسى - قابدىكارىم ىدىرىسوۆ،

22. سايانسكايا كوشەسى - الما اجيباەۆا،

23. لەسنايا كوشەسى - اعايىندى دۇيسەمبينوۆتەر بولىپ قايتا اتالاتىن بولدى.

ءبىز اتالعان وزگەرىس تۋرالى ارمان مىرزاعا حابارلاسىپ، پىكىرىن بىلگەن ەدىك.

بۇل - پاۆلودار ءۇشىن ۇلكەن جەڭىس!

ارمان قاني:

- قالا كوشەلەرىن وزگەرتۋ تۋرالى قالالىق ءماسليحاتتىڭ وتىرىسى بۇگىن ءوتتى. وعان ساناۋلى عانا ازاماتتار قاتىستى. ولاردىڭ دەنى ءماسليحات دەپۋتاتتارى. ءسويتىپ، قالاداعى 23 كوشەنىڭ اتاۋىن تاۋەلسىزدىكتى اسپەتتەيتىن، قازاقي اتاۋلارعا بەرۋ تۋرالى شەشىم ءبىراۋىزدان قابىلداندى. نەگىزى جوسپاردا 30 كوشەنىڭ اتىن قازاقشالاۋ ۇسىنىلعان. بىراق، ءماسليحات دەپۋتاتتارى ءبىراۋىزدان 23 كوشەگە كەلىستى. 7 كوشەنى كەيىنگە قالدىردى. سەبەبى، كوشە اتاۋىنا ۇسىنىلعان ازاماتتاردىڭ ەسىمىن جالپى كوپشىلىككە ناسيحاتتاۋ جۇمىستارى ءجۇرۋى كەرەك، ال، كەيبىر كوشەلەر تىم قىسقا بولعاندىقتان تۇلعالاردىڭ ەسىمىن بەرۋگە لايىق ەمەس دەپ تانىلدى. سوندىقتان بۇل ماسەلە كەيىنگە قالدىرىلدى. 

بۇل جۇمىستىڭ ءوزى ۇلكەن كۇرەسپەن جاسالعانىن ايتا كەتۋ كەرەك. سەبەبى، بۇعان قارسى توپتار بولدى. ولار اكىمدىككە ارىز جازىپ، قارسىلىق ءبىلدىردى. بىلتىر 13 كوشەنىڭ اتىن قازاقشالاعاندا دا وسىنداي ۇلكەن داۋ بولعان. 

جالپى، پاۆلودار، قوستاناي سەكىلدى وڭىرلەردە مۇنداي پروتسەستەر وتە كۇردەلى جۇرەدى. سوندىقتان، 23 كوشەنىڭ اتىن قازاقشالاۋ پاۆلودار ءۇشىن ۇلكەن جەڭىس. 

ال، پاۆلودار قالاسىنىڭ اتىن وزگەرتۋ تۋرالى تاۋەلسىزدىك العالى بەرى ايتىلىپ كەلە جاتىر.تەك پاۆلودار ەمەس، ورىس اتاۋلارىمەن اتالاتىن وسكەمەن، سەمەي، پەتروپاۆل سەكىلدى قالالار دا وزگەرۋى ءتيىس ەدى. وكىنىشكە قاراي بۇل ماسەلە ءالى شەشىلگەن جوق. دەگەنمەن، 30 جىل ءوتتى، ەندى شەشىلەر دەگەن ءۇمىتىمىز بار. 

ايتا كەتەيىك، بۇگىندە پاۆلودار قالاسىنداعى 335 كوشەنىڭ  62-ءسى ء(بىر دەرەكتە 85-ءسى) عانا قازاق تىلىندە ەكەن. ەندى وعان 23 كوشە اتاۋى قوسىلماق. ال، قالاداعى كوشە اتتارىن قازاقشالاۋعا قارسى توپتار بار ەكەنىن بۇعان دەيىن دە جازعانبىز.

نۇربيكە بەكسۇلتانقىزى

Abai.kz

14 پىكىر