سەنبى, 8 مامىر 2021
1120 1 پىكىر 12 ءساۋىر, 2021 ساعات 15:53

جىل باسىنان بەرى ازىق-تۇلىك باعاسى 3,2% - عا ءوستى

بۇگىن ۇكىمەت وتىرىسىندا ساۋدا جانە ينتەگراتسيا ءمينيسترى باقىت سۇلتانوۆ الەۋمەتتىك ماڭىزى بار ازىق-تۇلىك تاۋارلارىنا باعانىڭ وسۋىنە جول بەرمەۋ جاعدايى تۋرالى ايتىپ بەردى.

اعىمداعى جىلدىڭ باسىنان بەرى الەۋمەتتىك ماڭىزى بار ازىق-تۇلىك ونىمدەرىنىڭ باعاسى 3,2% - عا ءوستى. بۇل رەتتە، وتكەن جىلدىڭ ۇقساس كەزەڭىندە باعالار 4,8% - عا ءوستى، ونىڭ 4,1 پايىزدىق تارماعى كارانتيننىڭ ەنگىزىلۋىنە بايلانىستى بولدى.

مينيستر ايتىپ وتكەندەي، ءامات باعاسىن تۇراقتاندىرۋ بويىنشا قابىلدانعان جول كارتاسى شەڭبەرىندە جەدەل ءىس-شارالار ناتيجەسىندە تۇراقتاندىرۋ مۇمكىن بولدى. سوڭعى ءۇش اپتادا ءامات باعاسى 0,2% - عا ءوستى.

بۇل رەتتە، «اينالىم سحەماسى» جىل باسىنان بەرى 30% - عا ارتىپ، 24,3 ملرد.تەڭگەنى قۇرادى. سونداي-اق، ۆەدومستۆو باسشىسى قوسىمشا 8,3 ملرد.تەڭگە ءبولۋ جوسپارلانعانىن حابارلادى.

- سونىمەن قاتار، كەيبىر وڭىرلەردە ءالى كۇنگە دەيىن جوعارى ءوسىم بايقالادى. 6 ساۋىردەگى جاعداي بويىنشا ەڭ جوعارى باعا جامبىل وبلىسىندا 4,2% - عا جانە اتىراۋ وبلىسىندا 3,8% - عا ءوستى. ەڭ تومەنگى ءوسىم 2,9%-عا شىعىس قازاقستان جانە اقمولا وبلىستارىندا تىركەلدى, - دەپ اتاپ ءوتتى باقىت سۇلتانوۆ.

بۇگىن وتىرىستا مينيستر كەلەسى شارالاردى ۇسىندى:

- باعالاردىڭ بارىنشا وسۋىنە جول بەرگەن اكىمدەردىڭ جەتەكشىلىك ەتەتىن ورىنباسارلارىنا تارتىپتىك شارالار قولدانۋ;

- باسەكەلەستىكتى قورعاۋ جانە رەتتەۋ اگەنتتىگى ۇستەم بيزنەس سۋبەكتىلەرىنىڭ باعالىق ءسوز بايلاسۋىنا جول بەرمەۋ ماسەلەسىن تۇراقتى باقىلاۋدا ۇستاسىن;

- ورتالىق جانە جەرگىلىكتى اتقارۋشى ورگاندار كارانتيندىك شارالاردى ەسكەرە وتىرىپ، باقىلاۋدى كۇشەيتىپ، الەۋمەتتىك ماڭىزى بار تاۋارلارعا، اسىرەسە يمپورتقا تاۋەلدى جانە ەكسپورتقا باعدارلانعان ونىمدەرگە باعانىڭ وسۋىنە جول بەرمەۋ جونىندە ءتيىستى ءىس-قيمىل جاساۋى قاجەت;

- بۇل باعانى تەجەۋدىڭ نەعۇرلىم ءتيىمدى تەتىگى «اينالىم سحەماسى» بولىپ تابىلاتىنىن ەسكەرە وتىرىپ، ونى قارجىلاندىرۋدى 50 ملرد.تەڭگەگە دەيىن جەتكىزۋ قاجەتتىلىگى.

ايتا كەتەيىك، اعىمداعى جىلدىڭ 11 ناۋرىزىندا ۇكىمەت وتىرىسىندا باعانى تۇراقتاندىرۋ بويىنشا 45 ءىس-شارادان تۇراتىن جول كارتاسى ماقۇلداندى. جول كارتاسى مىناداي ءىس-شارالاردى قامتيدى: تەكسەرۋلەر مەن كومپلاەنس، ساۋدا شارالارى، ءوندىرىستى ۇلعايتۋ جانە كاسىپورىنداردى قولداۋ، سونداي-اق زاڭنامالىق وزگەرىستەر.

Abai.kz

1 پىكىر