بەلگىلى ەكونوميست، ساياساتكەر، جەر كوميسسياسىنىڭ مۇشەسى مۇحتار تايجان بۇگىن ءوزىنىڭ Facebook-تەگى جەكە پاراقشاسىندا بۇگىن وتكەن جەر كوميسسياسىنىڭ كەزەكتى وتىرىسىندا جەردى جەكە مەنشىككە بەرۋدى قولداپ سويلەگەن جەر كوميسسياسىنىڭ وزگە مۇشەلەرىنىڭ اتتارىن اتاپ كورسەتىپ، جازدى.

«بۇگىنگى جەر كوميسسياسىنىڭ وتىرىسىندا بۇل 5 ادام جەردى جەكە مەنشىككە ساتۋدى اشىق تالاپ ەتكەن، باسقالاردى سوعان ۇگىتتەپ ناسيحاتتادى. ناقتى كىم جەردى ساتۋعا يتەرىپ جاتقانىن ەل ءبىلۋ كەرەك دەپ سانايمىن.

1. الماسبەك سادىرباي، جۇرتقا تانىمال بولعان «قويشى».

2. راحيم وشاكباەۆ، قازىر ەكونوميست، «Talap» جەتەكشىسى، بۇرىنعى اتامەكەن ۆيتسە-پرەزيدەنتى.

3. بولاتبەك ناجمەدينۇلى، بۇرىنعى وقو وبلىس اكىمنىڭ ورىنباسارى، قازىر فەرمەر-كاسىپكەر.

4. ايداربەك قوجانازاروۆ، «ولجا اگرو»، ديرەكتور، قوستاناي وبلىسى. بۇرىنعى «يۆولگا» جەرلەرىن يگەرىپ جاتىر.

5. كەرىمحان ەگىزباەۆ، «ORDA اگروتەحنولوگيا» جاۋاپكەرشىلىگى شەكتەۋلى سەرىكتەستىگى، ديرەكتور. قىزىلوردا وبلىسى، جاڭاقورعان اۋدانى»، - دەپ جازدى.

ايتا كەتەيىك، بۇگىن جەر كوميسسياسىنىڭ كەزەكتى وتىرىسى وتكەن. وسىعان دەيىن كوميسسيا توراعاسى، قر ۆيتسە-پرەمەرى ەرالى توعجانوۆ ەكى جۇمىس توبى ەنگىزگەن ۇسىنىستار بويىنشا ناقتى شەشىم قابىلداۋدى سۇرادى جانە داۋىسقا سالدى.

«بىرىنشىدەن, قازاقستاندىقتارعا جالعا بەرۋدى جاڭا مەرزىمگە ۇزارتۋعا باسىمدىق قۇقىعىمەن اۋىل شارۋاشىلىعى جەرلەرىن 49 جىلعا دەيىن ۇزاقمەرزىمدى جالعا الۋ مۇمكىندىگىن بەرۋ بويىنشا ءتيىستى زاڭ نورمالارىنا وزگەرىستەر مەن تولىقتىرۋلار ەنگىزۋ ۇسىنىلسىن.

ەكىنشى، قازاقستاندىقتارعا اۋىل شارۋاشىلىعى جەرلەرىن جالداۋ قۇقىعىن مەملەكەتتەن ساتىپ الماي يەلىكتەن شىعارۋ مۇمكىندىگىن بەرۋ بويىنشا نورمالارىن ساقتاپ، ءتيىستى زاڭ اكتىلەرىنە وزگەرىستەر مەن تولىقتىرۋلار ەنگىزۋ ۇسىنىلسىن.

ۇشىنشىدەن، قر ۇكىمەتىنە ەلدى مەكەندەر اينالاسىندا جايىلىمدار تاپشىلىعى ماسەلەلەرى بويىنشا تالداۋ جۇرگىزىپ، ولاردىڭ جەتىسپەۋشىلىگى پروبلەمالارىن شەشۋ ۇسىنىلسىن.

تورتىنشىدەن، جەر كودەكسىنىڭ 50-بابىنىڭ 4-تارماعىنداعى اۋىل شارۋاشىلىعى ماقساتىنداعى جەر ۋچاسكەلەرىنىڭ شەكتى مولشەرىن بەلگىلەۋ نورمالارىن قاراستىرۋعا بايلانىستى لاتيفۋنديستەردى بولدىرماۋ تۋرالى ۇسىنىس. بۇل ماسەلەنىڭ زاڭنامادا شەشىمى بار بولعاندىقتان كوميسسيا قاراۋىنان الىپ تاستاۋعا ۇسىنىس ەنگىزىلدى.

بەسىنشى، مەملەكەتتىك ورگانداردىڭ شەشىمى بويىنشا، اكىمشىلىك شەكارالار وزگەرگەن جاعدايدا جەكە جانە زاڭدى تۇلعالارعا جەر ۋچاسكەلەرىن سايكەستەندىرۋ قۇجاتتارىن قايتا دايىنداۋ ءۇشىن بيۋدجەت قاراجاتىن كوزدەيتىن نورمانى زاڭنامالىق تۇردە بەكىتۋ ۇسىنىلسىن.

التىنشى، اۋىل شارۋاشىلىعى جەرلەرىن سۋبارەنداعا بەرۋ قولدانىستاعى زاڭنامادا قاراستىرىلماعانىنا بايلانىستى، بۇل سۇراق كوميسسيانىڭ كۇن تارتىبىنەن الىنسىن. ءبىر اپتا شەڭبەرىندە جۇمىس توپتارىندا وسى ماسەلەلەر تالقىلاندى، وعان ءبارىڭىز اتسالىستىڭىزدار. سوعان بايلانىستى سىزدەردىڭ كەلىسىمدەرىڭىز بويىنشا بۇگىن وسى ماسەلەلەر كوميسسيا وتىرىسىنا شىعارىلدى. سوندىقتان، داۋىس بەرۋگە ءبارىڭىزدى شاقىرامىن»، - دەدى ە. توعجانوۆ.

كوميسسيا وتىرسىندا مۇشەلەردىڭ كوپشىلىگى داۋىس بەردى، قارسى ەشكىم بولمادى جانە ءتورت ادام قالىس قالدى.

«شەشىم قابىلداندى. الدىمەن بارىڭىزگە راحمەت ايتقىم كەلىپ وتىر. اشىعىن ايتقاندا، بۇگىن ۇلكەن ماڭىزدى شەشىم قابىلداندى. بۇگىنگى قابىلدانعان شەشىم جەردى ەكونوميكالىق اينالىمعا ەنگىزۋگە تولىقتاي مۇمكىندىك بەرىپ وتىر دەپ ويلايمىن. سونى قولداعان، تۇسىنگەن ازاماتتار داۋىس بەرىپ قولداپ وتىر. سوندىقتان، ەلگە، حالىققا كەرەك شەشىممەن قۇتتىقتاۋعا رۇقسات ەتىڭىزدەر»، - دەپ قورىتىندىلادى ەرالى توعجانوۆ.

Abai.kz