جۋىردا دەمپارتيا جەتەكشىسى جانبولات ماماي «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك تۋرالى زەرتتەۋ ماتەريالىن جاريالاعان بولاتىن.

اتالعان ماتەريالدا باۋىرجان بايبەكتىڭ الماتى قالاسىنىڭ اكىمى بولىپ تۇرعان تۇستا (2015-2019 ج.ج) «قازاقفيلم» كينوستۋدياسى، اتاكەنت، كوكجايلاۋ جەرلەرىن جانە «Esentai city» تۇرعىن ءۇي كەشەنى ورنالاسقان اۋماقتى يەمدەنگەنى تۋرالى اقپارات ايتىلادى.

سونىمەن قاتار، الماتىدا اكىم بولعان ءتورت جىلعا جۋىق ۋاقىت ىشىندە باۋىرجان بايبەكتىڭ وتباسىنىڭ قارجىلىق جاعدايى ءبىر ميلليارد دوللاردان استى دەگەن دەرەك كەلتىرە وتىرىپ، ونىڭ جاقىندارى يەمدەنگەن كومپانيا اتتارى اتالادى.

ودان بولەك، باۋىرجان بايبەك الماتىدا باسشى بولعان تۇستا قالانىڭ اۆتوبۋس پاركىن قالاي جاڭارتقانىن جانە ونىڭ سەرىكتەسى دىنمۇحامەت ىدىرىسوۆ ەكەۋى قىتايدىڭ «Zhongtong bus» كومپانياسىنان اۆتوبۋستار ساتىپ الۋ ارقىلى 11 ميلليون اقش دوللارىن ءوز قالتاسىنا باسقانى تۋرالى ايتىلعان. ياعني، قالا بيۋدجەتىنەن ءار اۆتوبۋسقا كەم دەگەندە 55 مىڭ اقش دوللار ارتىق تولەنگەن. ال، مۇنداي ارتىق تولەنگەن شىعىنداردىڭ جالپى سوماسى 11 ميلليون اقش دوللارىن قۇرايدى-مىس. «ول ارتىق اقشا بايبەك پەن سەرىكتەسىنىڭ قالتاسىنا كەتكەن»، - دەيدى الگى زەرتتەۋدە. سونىمەن قاتار، بايبەكتىڭ قوعام بەلسەندىلەرىن قۋدالاپ، ادام قۇقىعىن تاپتاعانى تۋرالى دا ايتىلادى.

بۇل ماتەريالعا قاتىستى باۋىرجان بايبەك بۇرىن ماجىلىستە دەپۋتات بولعان، بلوگەر تاڭىربەرگەن بەردىوڭعاروۆتىڭ «You tube» كانالى ارقىلى جاۋاپ بەرىپتى. بايبەكتىڭ ايتۋىنشا، جانبولات ماماي كەلتىرگەن دەرەكتەردىڭ ەشبىرى شىندىققا سايكەس كەلمەيدى. سەبەبى، ول «Uzun Qulaq» دەگەن فەيك تەلەگرام-كانالدىڭ دەرەكتەرىن كەلتىرەن. سوندىقتان دا ءوزىنىڭ ار-نامىسىنا تيگەنى ءۇشىن الداعى ۋاقىتتا دەمپارتيا جەتەكشىسىن سوتقا بەرەتىنىن ايتىپتى.

«ەلباسى ۇنەمى ايتاتىن: ەگەر سەنىڭ ارىڭ تازا بولسا، جالا جاپقانداردى سوتقا بەر دەپ. ءبىز دەموكراتيالىق مەملەكەت قۇرىپ كەلەمىز. ءاربىر ادام ءوز قۇقىعى، ابىرويى ءۇشىن كۇرەسۋى ءتيىس. مەن دە وسى ەلدىڭ ازاماتىمىن، باۋىرجان بايبەك دەگەن ەسىمىمنىڭ بىلعانعانى ماعان ۇنامايدى. الگى ۆيدەونى مەنىڭ انام دا كورەدى، مىسالى. ماماي سياقتى باسقا دا وتىرىكشىلەر مەن جالا جاپقىشتارعا ساباق بولسىن – مەن مامايدى سوتقا بەرەمىن! مەنىڭ جاسىراتىن تۇگىم جوق، ادال، تازا اداممىن»،- دەپتى بايبەك مىرزا.

باۋىرجان بايبەك سونداي-اق، وزىنە تيەسىلى دەگەن 100 كومپانيا تۋرالى دا تۇسىنىكتەمە بەرىپتى. «جانبولات ماماي ايتقان 100 كومپانيانىڭ ىشىندە تەك 10-عا جۋىق كومپانيا مەنىڭ وتباسىما تيەسىلى دەپ ايتا الامىن. ونى جوققا شىعارمايمىن»، - دەگەن «نۇر وتاننىڭ» ءبىرىنشى ورىنباسارى اتالعان كومپانيالاردىڭ جارتىسى بانكروتقا ۇشىراعانىن ايتىپتى.

«بيزنەس – تاۋەكەل. ءسىز تاۋەكەل ەتىپ، بيزنەس اشاسىز، ول بىردە بولادى، بىردە بولماي قالادى. مەنىڭ وتباسىمنىڭ ءبىر دە بىرەۋى مەملەكەتتىك قىزمەتتە جۇمىس ىستەمەيدى. بۇل كومپانيالار جەكەشەلەندىرۋگە قاتىسقان جوق، كەيبىر كاسىپورىنداردى ارزانعا ساتىپ العان جوق. بۇل – ينتەللەكتۋالدى كاسىپورىندار جانە ولاردىڭ الماتىداعى قىزمەتىمە ەش بايلانىسى جوق، بۇل ەڭ باستىسى. ول جەردە ءىرى جوبالار جوق»، - دەيدى بايبەك.

2015 جىلى باۋىرجان بايبەك الماتى قالاسىنىڭ اكىمى بولىپ تۇرعان تۇستا باق پەن الەۋمەتتىك جەلىدە باۋىرجان قادىرعاليۇلىنىڭ «باي وتباسى» تۋرالى دەرەكتەر جاريا بولعان.

ايتا كەتەيىك، باۋىرجان بايبەكتىڭ ايەلى جانار كەنجەقاراقىزى بايبەك ەكس-پرەزيدەنت ن.نازارباەۆتىڭ 2018 جىلدىڭ 9 قازانداعى No768 جارلىعىنا سايكەس استانا قالالىق سوتىنىڭ سۋدياسى بولىپ تاعايىندالعان بولاتىن.

نۇربيكە بەكسۇلتانقىزى

Abai.kz