نۇر-سۇلتاننىڭ ەسىل اۋداندىق سوتىندا مەملەكەتتىك اۋرۋحانالارعا ءدارى-دارمەك جەتكىزەتىن بىرىڭعاي ديستريبيۋتور "سك-فارماتسيا" كومپانياسىنىڭ بۇرىنعى باسشىسى بەرىك ءشارىپتىڭ ۇستىنەن قوزعالعان ءىس بويىنشا سوت ءوتىپ جاتىر.

Tengrinews سايتىنىڭ حابارلاۋىنشا، وعان ەكى باپ بويىنشا ايىپ تاعىلعان: "قىزمەتتىك وكىلەتىن اسىرا پايدالانۋ" (361-باپ، 4-تارماق 3-پۋنكت) جانە "زاڭسىز قارۋ-جاراق ساقتاۋ، الۋ، تاسىمالداۋ" (287-باپ 2-تارماق 3-4 پۋنكتەر).

ايىپتاۋ تارابىنىڭ بولجامىنشا، بەرىك ءشارىپ ء"بىر رەتتىك قورعانىش كيىمدەرىن ساتىپ الۋ بويىنشا باسقا تاسىمالداۋشىلارعا قاراعاندا قىمباتىراق باعا ۇسىنىپ، سونىڭ وزىندە ءونىمدى ۋاقىتىندا جەتكىزبەگەن كومپانياعا باسىمدىق بەرگەن". پروكۋراتۋرا وكىلدەرىنىڭ ايتۋىنشا، بىلتىر ىندەت ورشىگەن شاقتا – ءساۋىر-مامىر ايلارىندا رەسپۋبليكالىق ماڭىزى بار قالالار مەن ايماقتاردا سونىڭ سالدارىنان قورعانىش كيىم تاپشىلىعى تۋىنداپ، ناتيجەسىندە دارىگەرلەر جاپپاي كوروناۆيرۋسقا شالدىققان. سوتتا دەنساۋلىق ساقتاۋ مينيسترلىگىنەن كۋالىك رەتىندە كەلگەن ادام سول ارالىقتا ەلدە 2 مىڭعا جۋىق مەديتسينا قىزمەتكەرىنە كوروناۆيرۋس جۇققانىن ايتقان.

پروكۋرورلاردىڭ ايتۋىنشا، بەرىك ءشارىپ 2007 جىلى وڭتۇستىك قازاقستان وبلىسىنىڭ (قازىرگى تۇركىستان وبلىسى) دەنساۋلىق ساقتاۋ دەپارتامەنتىندە قىزمەت ىستەپ جۇرگەن كەزدە دۇكەننەن قارۋ-جاراق ساتىپ الىپ، ونى زاڭدى تۇردە تىركەتپەگەن. بىلتىر تامىز ايىندا ءتىنتۋ كەزىندە سول ارەكەتى اشكەرەلەنىپ، تاركىلەنگەن. وعان "قارۋ-جاراقتى زاڭسىز ساقتاۋعا" بايلانىستى ايىپ وسى ارەكەتىنە بايلانىستى تاعىلىپ وتىر.

ازىرگە قورعاۋ تارابىنىڭ ۋاجدەرى جاريالانبادى.

بىلتىر شىلدە ايىندا ەلدە كوروناۆيرۋس ىندەتى ءورشىپ تۇرعان شاقتا پرەزيدەنت قاسىم-جومارت توقاەۆ "سك-فارماتسيا" مەن "الەۋمەتتىك مەديتسينالىق ساقتاندىرۋ قورى" باسشىلارىن قىزمەتىنەن الىپ، قاجەت بولسا تەرگەۋ جۇرگىزۋدى تاپسىرعان. توقاەۆ سول كەزدە "سك-فارماتسيا" توڭىرەگىندە "قانداي دا كلانداردىڭ مۇددەسى بار" دەپ تە ايتقان.

2020 جىلى 12 شىلدەدە "سك-فارماتسيا" جشس-ءىنىڭ باسقارما توراعاسى بولىپ ەرحات ەسقاليەۆ تاعايىندالعان.

21 ءساۋىر كۇنى وتكەن العاشقى سوت تىڭداۋىندا قورعاۋ تارابى بەرىك ءشارىپتى ۇيقاماققا جىبەرۋدى سۇراعان، بىراق ءوتىنىشى قاناعاتتاندىرىلماعان.

Abai.kz