قازاقستاندىق «بايقوڭىر» عارىش ايلاعىن رەسەيگە جالعا بەرۋ مەرزىمى ۇزارتىلادى. بۇگىن ءماجىلىس دەپۋتاتتارى «بايقوڭىر كەشەنىن جالداۋ كەلىسىمىنە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن قابىلدادى. 

بۇعان دەيىن قازاقستان رەسپۋبليكاسى مەن رەسەي فەدەراتسياسى
اراسىنداعى «بايقوڭىر»  كەشەنىن جالداۋ تۋرالى شارتتىڭ 4 بابىندا عارىش ايلاعىنىڭ كورشى مەملەكەتكە 20 جىلعا جالعا بەرىلەتىنى ايتىلعان. ال، بۇگىنگى قابىلدانعان زاڭعا سايكەس، جالداۋ مەرزىمى 2050 جىلعا دەيىن ۇزارتىلماق.

تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات ءمۋسيننىڭ ايتۋىنشا، رەسەي كەشەندى پايدالانۋ ءۇشىن جىل سايىن رەسپۋبليكالىق بيۋدجەتكە 115 ميلليون دوللار كولەمىندە قارجى تولەپ وتىر. كەشەندى جالعا العان 27 جىل ىشىندە رەسپۋبليكالىق بيۋدجەتكە 3 ميلليارد اقش دوللارىنان استام قاراجات ءتۇسىپتى.

الايدا، رەسەيلىك تاراپ 2018 جىلى «سويۋز» زىمىران تاسىعىشىمەن بولعان اپات ءۇشىن وتەماقىنى ءالى تولەمەگەن. بۇل جونىندە ءماجىلىستىڭ جالپى وتىرىسىندا «سويۋز-2» زىمىران تاسىعىشتارىن ۇشىرۋ ءتارتىبىن انىقتايتىن كەلىسىمدى راتيفيكاتسيالاۋدى تالقىلاۋ كەزىندە ايتىلدى.

راتيفيكاتسيالاۋ قۇجاتىن تالقىلاۋ بارىسىندا دەپۋتاتتار سويۋز تيپىندەگى زىمىران تاسىعىشتاردىڭ ۇشىرىلۋىنان كەلتىرىلگەن زياندى وتەۋ ماسەلەسىنە توقتالدى. ولار وسىعان بايلانىستى كەلىسىمدەر بۇرىن بولدى ما جانە ولار قانشالىقتى ءتيىمدى جۇمىس ىستەۋدە دەگەن سۇراقتارعا توقتالعان. مىسال رەتىندە 2018 جىلى اتالمىش تيپتەگى زىمىراننىڭ اپاتقا ۇشىراپ، ودان كەلگەن زياندى رەسەي ءالى وتەمەگەنى ايتىلدى. سىرتقى ىستەر ۆيتسە-ءمينيسترى مارات سىزدىقىوۆ جەكە كەلىسىم بويىنشا، رەسەي تاراپى كەلتىرىلگەن زالالدى وتەۋگە كەپىلدىك الادى، بىراق، تاجىريبە كورسەتكەندەي بۇل پروتسەسس ۇزاق جىلدارعا سوزىلاتىنىن مالىمدەدى.

ايتا كەتەيىك، بۇعان دەيىن رەسەيلىك روسكوسموس باسشىسى روگوزين دميتري ماسكەۋ وبلىسىندا وتكەن «ارميا-2018» اتتى حالىقارالىق فورۋمدا «بايقوڭىر» عارىش ايلاعىن جالعا بەرۋ مەرزىمى ۇزارتىلعانىن، ەندى 2050 جىلعا دەيىن كەشەن رەسەيدىڭ مەنشىگىندە بولاتىنىن ايتقان ەدى.

Abai.kz