قر پرەزيدەنتى جارلىعىمەن شارىن شاتقالىندا وقۋشىلاردى قۇتقارۋ كەزىندە قازا تاپقان مۇعالىم مەرەي يبراگيموۆقا «ەرلىگى ءۇشىن» مەدالى بەرىلدى. 

«ادام ءومىرىن ساقتاپ قالۋعا بايلانىستى قيىن-قىستاۋ جاعدايدا كورسەتكەن ەرجۇرەكتىگى مەن جانقيارلىعى ءۇشىن الماتى قالاسى «№ 199 مامانداندىرىلعان گيمنازيا» كمم مۇعالىمى مەرەي نۇرعازىۇلى يبراگيموۆ «ەرلىگى ءۇشىن» مەدالىمەن ناگرادتالسىن (مارقۇم)»، دەلىنگەن قۇجاتتا.

الماتى قالاسى ءبىلىم باسقارماسىنىڭ مالىمەتىنشە، 26 جاستاعى مەرەي يبراگيموۆ كوركەمونەر پاندەرىنەن ساباق بەرگەن. ەڭبەك ءوتىلى – 5 جىل. كەيىنگى 3 جىلدا ول №199 گيمنازيادا جۇمىس ىستەگەن.

ەستەرىڭىزگە سالا كەتسەك، 29 مامىر كۇنى الماتى وبلىسىنىڭ شارىن شاتقالىندا سەل ءجۇرىپ، 2 ادام مەرت بولعانى، تاعى بىرەۋىنىڭ ءىز-ءتۇزسىز جوعالعانى حابارلانعان بولاتىن.

كەيىن ءبىلىم جانە عىلىم مينيسترلىگى اتالعان وقيعا سالدارىنان 1 وقۋشى مەن 1 مۇعالىمنىڭ قازا تاپقانىن، تاعى ءبىر وقۋشىنى ىزدەۋ جۇمىسى جۇرگىزىلىپ جاتقانىن ءمالىم ەتكەن ەدى.

Abai.kz