بۇگىن الماتىنىڭ اۋەزوۆ اۋداندىق №2 سوتىندا بەلسەندى جانبولات ماماي مەن ونىڭ ايەلى ينگا يمانبايعا قاتىستى ازاماتتىق ءىستىڭ سوتالدى دايىندىعى اياقتالدى. ەرلى-زايىپتىلار بيىل ساۋىردە Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەكتى ايىپتايتىن بىرنەشە ۆيدەوماتەريال جاريالاعان بولاتىن.

ايتا كەتۋ كەرەك، بۇعان دەيىن وتكەن ەكى وتىرىستا جاۋاپ بەرۋشى تاراپ ونلاين-بايلانىستىڭ ناشار ەكەنىن، پروتسەسكە جۋرناليستەردىڭ از قاتىسىپ جاتقانىن ايتىپ شاعىمدانعان بولاتىن. بۇگىنگى وتىرىس جانبولات ماماي مەن ونىڭ ادۆوكاتتارى سۇراعان ZOOM پلاتفورماسىندا ءوتتى. سونداي-اق، باق وكىلدەرىنىڭ كەز كەلگەنى ءۇشىن پروتسەسس اشىق بولدى. تىلشىلەرگە تەك eGov پورتالى ارقىلى تىركەۋدەن ءوتۋ تالابى قويىلعان.

اتالعان پروتسەستە باۋىرجان بايبەكتىڭ مۇددەسىن زاڭگەر ايجان تاشەنوۆا قورعاپ جاتقانى بەلگىلى. ول جانبولات ماماي مەن ينگا يمانبايدىڭ دالەل قۇجاتتارىن ايتىلعان مەرزىمدە تاپسىرماي، سوت تالابىن ورەسكەل بۇزعانىن اتاپ ءوتتى. جاۋاپ بەرۋشىلەر 2 مىڭ بەتتەن تۇراتىن جاۋاپتى سوتقا ءبىر كۇن قالعاندا، ياعني 3 ماۋسىم كۇنى كەشكە عانا وتكىزگەن.

تاشەنوۆانىڭ پىكىرىنشە، 2 مىڭ بەتتەن تۇراتىن جاۋاپ قۇجاتتارىنىڭ ىشىندە ماماي مەن يمانبايدىڭ ءسوزىن رەسمي راستايتىن بىردە-ءبىر قۇجات جوق.
«مەن جاۋاپ بەرۋشى تاراپتىڭ جاۋاپ قۇجاتتارىمەن تانىسىپ شىقتىم. الايدا، ولاردىڭ بىردە-بىرىندە دالەل جوق. قۇجات دەگەن قول قويىلعان، ءمور باسىلعان قاعاز نەمەسە ەلەكتروندى ۇلگىدەگى قۇجات بولۋى ءتيىس. ونىڭ ورنىنا تۇسىنىكسىز جازبالار، ينتەرنەت-رەسۋرستارعا سىلتەمەلەر، باق بەتتەرىنەن الىنعان تسيتاتالار عانا بار. سونداي-اق، ءمور باسىلعان قاعاز دا كوپ، بىراق ولاردىڭ ەشبىرى ءبىزدىڭ ىسكە قاتىستى ەمەس»، - دەدى زاڭگەر ايجان تاشەنوۆا.
ول سونداي-اق، ۆيدەودا كورسەتىلگەن دەرەكتەردىڭ ءاربىرى شىندىققا جاناسپايتىنى تۋرالى رەسمي قۇجاتتاردى سوتقا تاپسىرعانىن مالىمدەدى. اتاپ ايتقاندا، «بايبەكتىڭ تۋىستارىنا تيەسىلى 100 كومپانيا»، «اتاكەنتتىڭ»، «قازاقفيلمنىڭ»، «ەسەنتايدىڭ» جەرلەرى، سونىمەن قاتار الماتىداعى اقىلى اۆتوتۇراقتار جانە وزگە دە ماسەلەلەرگە قاتىستى جەكە-جەكە توقتالىپ، اربىرىنە جاۋاپ بەردى.

جانبولات ماماي پروتسەسس بارىسىندا سۋديا رايحان سارتاەۆانىڭ دا، زاڭگەر ايجان تاشەنوۆانىڭ دا ءسوزىن بىرنەشە رەت ءبولدى. سونداي-اق، سوتقا ارقاۋ بولعان تاقىرىپتان اۋىتقىپ، قازاق تىلىنە، باۋىرجان بايبەكتىڭ تۇرعىلىقتى مەكەن-جايىنا قاتىستى تاقىرىپتا سويلەدى. تيىسىنشە، سۋديا وعان بىرنەشە رەت ەسكەرتۋ جاساپ، سوت ءتارتىبىن تاعى بۇزسا پروتسەستەن قۋاتىنىن ايتتى.
ەسكە سالايىق، بۇعان دەيىن وتكەن ەكى وتىرىستا دا سۋديا جانبولات مامايعا ءدال وسىنداي بىرنەشە ەسكەرتۋ جاساعان بولاتىن.

زاڭگەر ايجان تاشەنوۆا دا جانبولات مامايدىڭ ءسوزى مەن ءىسى قابىسپايتىنى، ونىڭ سوت تورەلىگىنە مۇلدەم قۇرمەت كورسەتپەيتىنىن ايتتى.
«جانبولات ماماي ءوزىنىڭ ۇندەۋلەرىندە ەۋروپالىق، حالىقارالىق ستاندارتتاردى ءجيى مىسالعا كەلتىرەدى، سوت تورەلىگى ۇستەم قۇرۋ كەرەگىن ايتادى. بىراق، ءوزى شىن ومىردە بۇل ايتقاندارىن ىستەي بەرمەيدى. ماسەلەن، سوتتا ايقايلايدى، سوتتىڭ جابىق ءوتىپ جاتقانىن ايتىپ شۋ شىعارادى، سوتتاعى نەگىزگى تاقىرىپتى بۇرىپ، باسقا ماسەلە قوزعايدى، دالەل بەرەتىن مەرزىمدى كەشىكتىرەدى. ياعني، زاڭ ۇستەمدىگى بۇلار ءۇشىن بوس ءسوز. مەن ءوزىم ەۋروپادا سوتتا تاجىريبەدەن ءوتتىم. ول جاقتا بىرەۋدىڭ سىرتىنان نەگىزسىز جالا جابۋعا ەشكىمگە رۇقسات ەتىلمەيدى. ويتكەنى، ءاربىر ادام، ونىڭ ىشىندە ءوزىن جۋرناليست نەمەسە ساياساتكەر سانايتىن ءار تۇلعا بىلەدى – بىرەۋگە قاتىستى ايتقان ءار سوزىڭە دالەلىڭ بولۋى شارت. ولاي بولماعان جاعدايدا سەنىڭ ايتقانىڭ بوس جالا جانە سول ءۇشىن سوتتا جاۋاپ بەرەسىڭ»، - دەدى ا.تاشەنوۆا.

سوت ەكى تاراپتى دا تىڭداپ، سوتالدى دايىندىقتىڭ وتكەنىن، ەندى نەگىزگى پروتسەسس 14 ماۋسىمدا باستالاتىنىن حابارلادى. سۋديا رايحان سارتاەۆا العاشقى وتىرىستىڭ ۋاقىتىن ساعات 10:00-گە بەكىتكەن. الايدا، جاۋاپ بەرۋشى تاراپ بۇل ۋاقىتتى 9.30-عا قويدى سۇرادى. سۋديا ولاردىڭ ءوتىنىشىن ماقۇل كوردى.

Abai.kz