مەن كەيدە كورشى ەلدەردەگى ازاماتتاردىڭ وتان سۇيگىشتىگىنە، مەملەكەتشىلدىگىنە تاڭ قالامىن. قىزىعامىن. ءبىز قازاقتار نەگە سونداي ەمەسپىز دەپ وكىنەتىن كەزدەرىمدە كوپ.

ماسەلەن كەشە عانا باستالعان فۋتبولدان ەۋروپا چەمپيوناتىندا ۋكراينا فۋتبول قاۋىمداستىعى كيەتىن كيىمنىڭ ديزاينى ەرەكشە بولدى. فورمادا «ۋكراينا جاساسىن» دەگەن جازۋ مەن قىرىم تۇبەگى قوسا بەينەلەنگەن كارتا بار. بۇعان قوسا «باتىرلاردىڭ داڭقى ارتا بەرسىن!» دەگەن جازۋدا تۇر. بىراق ونى ەۋروپا فۋتبول قاۋىمداستىقتارى وداعىنىڭ تالابى بويىنشا الىنىپ تاستالدى. مەيلى. ءبىر سوزدە تۇرعان ەشتەڭڭە جوق. ەڭ باستىسى «ۋكراينا جاساسىن!» دەگەن سوزبەن كارتا قالدى. وسىنىڭ ءوزى-اق ۋكرايندىقتاردىڭ وتان سۇيگىشتىگىن كورسەتەدى.

2014 جىلى رەسەي انەكتسيالاپ العان قىرىمدى ۋكراين فۋتبولشىلارى «ءوزىمىزدىڭ جەر» دەپ فۋتبول ارقىلى جاھانعا جار سالىپ كورسەتۋىدە نامىستىڭ، قايرات، جىگەردىڭ كورىنىسى. رەسەيگە سەس كورسەتۋ. ءتۇبى «جەرىمىزدى قايتارىپ الامىز» دەگەن باتىلدىق. بىزدە شە؟ وزىمىزگە كەلگەندە داۋىسىمىز قۇمىعىپ شىعادى.

ءبىز ۇلتتىق، مەملەكەتتىك ماسەلەگە كەلگەندە ۇتىلىپ جاتقان ەلمىز. ءتىپتى مەملەكەتتىك ءتىل دەپ اسپەتتەپ وتىرعان انا ءتىلىمىزدىڭ ءوزى، ءوز ەلىمىزدە وگەي بالانىڭ كۇنىن كەشۋدە. باسقاسىن ايتپاي - اق قويالىق. ءبىز كوبىنە وتكەن تاريحپەن «ءبىزدىڭ بابالارىمىز اناداي بولعان، مىناداي بولعان» دەگەن ميفپەن ءومىر ءسۇرىپ جۇرگەن، تەك وتكەنمەن ماقتانىپ جۇرگەن ۇلتپىز. راس، بۇرىنعى اتا-بابالارىمىز باتىر بولعان، نار بولعان. وعان داۋ جوق.

ال بۇگىنگى ۇرپاقتارى بىزدەر كىمبىز؟ بىزدەر ىنجىق، نامىسسىز، جىگەرسىز، جاعىمپاز، بوسبەلبەۋ، ماقتانشاق، كورسەقىزار، ەلىكتەگىش، ءبىر-ءبىرىمىزدى جامانداعىش، وسەكشىل، ءبىر-بىرىمىزگە ور قازعىش حالىقپىز. ال مۇنداي ۇلتتا ۇلتتىق نامىس، مەملەكەتتىك مۇددە دەگەن بولماسى حاق. سودان بولار ءبىز التىن كومبەنىڭ ۇستىندە وتىرساقتا كەدەيمىز. بيلىكتىڭ ايتقانىنا باس شۇلعي بەرەتىن، ءوز قۇقىن قورعاي المايتىن بوسبەلەۋ ۇلتپىز. بىزگە باعىت-باعدار بەرەدى، مەملەكەتتى وركەنيەتكە جەتەلەيدىڭ دەگەن بيلىكتىڭ ءوزى جەمقور، حالىقتىڭ نەسىبەسىنە قول سۇعىپ وتىرعان الاياقتار. حالىق قورعانسىز. قازاق حالقى ءدۇر سىلكىنىپ وياناتىن كەزى كەلدى. ءوز ءتىلىن قاستەرلەۋدى، ءوز ۇلتىنىڭ مۇددەسىن جوعارى قويۋدى وسى ۋكرايندىقتاردان ۇيرەنگەن دۇرىس-اۋ.

ازاماتحان ءامىرتايدىڭ جازباسى

Abai.kz