وتكەن اپتادا ا.مامين باسشىلىق ەتەتىن ۇكىمەت پەن ن.گودۋنوۆا حانىم تىزگىنىن ۇستاعان ەسەپ كوميتەتى بىلتىرعى جىلدى قورىتىندىلاپ ەسەپ بەرىپ، بيۋدجەت قاراجاتىنىڭ قالاي ءھام قانداي ماقساتتارعا جۇمسالعانى جايلى ايتقانى بەلگىلى.

ولاردىڭ ءبىرسىپىراسىن Abai.kz اقپاراتتىق پورتالىندا جاريالادىق. قاراڭىز: ەسەپ كوميتەتىنىڭ ءتورايىمى ناتاليا گودۋنوۆا حانىم: «مەملەكەت 2020 جىلى ۇلتتىق قورعا تۇسكەن قارجىنىڭ 96%-ىن جۇمسادى»، - دەپ سويلەگەن. قور قاراجاتىنىڭ ماكسيمالدى دەڭگەيدە جۇمسالۋىنىڭ ءبىر سەبەبى رەتىندە كۆازيمەملەكەتتىك سەكتور سۋبەكتىلەرىنىڭ بيۋدجەتكە دەر ۋاعىندا اۋدارىم جاساماۋى دەپ كورسەتكەن. تەك قانا قاراشىعاناق پەن سولتۇستىك كاسپي سەرىكتەس كومپانيالارىنىڭ ءوزى 664 ميلليارد تەڭگە بەرەشەك ەكەندىگىن مىسال ەتكەن. ونان سوڭ، وسى كۆازيمەملەكەتتىك سەكتورعا جاسالعان اۋديت كەزىندە 60-قا جۋىق قارجىلىق زاڭبۇزۋشىلىقتار انىقتالعانى، 340 ميلليارد تەڭگەنىڭ ءتيىمسىز باسقارىلعانى جايلى ءھام ەل قارىزىنىڭ ءوسىپ كەلە جاتقانىن ايتقان.

ۇكىمەتتەگى باسشى-قوسشىنىڭ ەسەپ-قيساپتارىن تىڭداعان ءماجىلىس ءبىرشاما ەسكەرتۋلەر جاساپ، اتقارۋشى بيلىك جۇمىسىنا باعا بەرگەن. سپيكەر نۇرلان نىعماتۋلين: «بيۋدجەت قاراجاتىن يگەرۋدىڭ ۇتىمدىلىعىنىڭ، ناتيجەلىلىگىنىڭ جانە تيىمدىلىگىنىڭ جەتكىلىكسىزدىگى ءالى دە وزەكتى كۇيىندە قالىپ وتىر. وسى ورايدا پروبلەمالاردى شەشۋدىڭ جۇيەلى ءتاسىلى عانا ازاماتتاردىڭ ءومىر ءسۇرۋ ساپاسىن ارتتىرۋ بويىنشا ەل باسشىلىعى قويعان بارلىق مىندەتتەردى تولىققاندى ورىنداۋعا مۇمكىندىك بەرەدى»، - دەپ سويلەگەن.

وسى جيىنداعى قوعام نازارىن اۋدارعان تاعى ءبىر اڭگىمە – ماجىلىستەگى «اق جول» فراكتسياسىنىڭ كوتەرگەن ماسەلەلەرى بولدى. راس، ۇكىمەتتىڭ ەسەبىن تىڭداۋعا ءماجىلىستىڭ ءۇش فراكتسياسى دا قاتىستى. ءۇش پارتيانىڭ وكىلدەرى دە وزدەرىنىڭ وي-پىكىرلەرىن ورتاعا سالدى. الايدا، ولاردىڭ دەنى «بۋحگالتەرلىك باياندامالارعا» ۇقساس ەستىلىپ جاتقانى جانە شىندىق. سول تۇرعىدان، دەپۋتات پەرۋاشەۆ باستاعان «اق جول» فراكتسياسىنىڭ ەكونوميكالىق سيپاتى جاعىنان ناقتىلى جانە مەملەكەتتىك بيۋدجەت پروبلەمالارىن قاراپايىم تىلمەن ايتىلعان پىكىرىنە از-كەم شولۋ جاساماقپىز...

ازات پەرۋاشەۆ باستاعان پارلامەنتتىك پارتيا («اق جول» پارتياسى) «بيۋدجەتتى تولىقتىرۋدىڭ كوزى رەتىندە دە، قوعامداعى ورتا تاپتىڭ الەۋمەتتىك تىرەگى رەتىندە دە بيزنەستىڭ مۇددەلەرىنە اسەر ەتەتىن بىرقاتار ماسەلەلەرگە» نازار اۋدارعان ەكەن. قاراڭىز:

سالىق جيناۋ: مەجە – 257 ملرد. ورىندالعانى – 25 ملرد تەڭگە

بيۋدجەت كىرىستەرى تۋرالى جازىلعان بايانداما تسيفرلارىندا كاسىپكەرلەرگە 257 ميلليارد تەڭگەگە جۋىق سالىق سالىنعانىمەن، جينالعان سالىق مولشەرى 25 ميلليارد تەڭگەنىڭ توڭىرەگىندە بولعان ەكەن. ياعني مەجەلى سومانىڭ 10%-دان از بولىگى عانا جينالعان. بۇل ءوز كەزەگىندە ەلىمىزدەگى سالىق ورگاندارىنىڭ قاعازداعى «جەتىستىكتەرىنىڭ»  شىنايى كورسەتكىشى بولماق.

دەپۋتات ازات پەرۋاشەۆ: «بۇل قوسىمشا ەسەپتەۋلەر نە ويدان شىعارىلعان دەگەن ءسوز. نەمەسە اتالعان سالاداعى كولەڭكەلى سحەمالاردى انىقتاۋ مەحاينزمىنىڭ دۇرىس جۇمىس جاساي المايتىندىعىنىڭ دالەلى. الايدا [سالىق ورگاندارى جۇمىسىنىڭ] تيىمدىلىك 10%-عا تومەن بولسا دا، بيزنەسكە قاتىستى اكىمشىلىك قىسىم كەرى پروپورتسيونالدى تۇردە، قوسىمشا ەسەپتىلىك پەن حابارلامالار ەنگىزۋ ەسەبىنەن 100%-عا ءوستى.

جاقىندا «اتامەكەن» ۇكپ-دا وتكەن كاسىپكەرلەر فورۋمىندا 5 جىل ىشىندە كاسىپكەرلەردىڭ جازالانۋ سانى ەكى ەسەگە ارتقانى، 500 مىڭ شوب سۋبەكتىسى اكىمشىلىك جاۋاپكەرشىلىككە تارتىلعانى، ياعني ءاربىر ءۇشىنشى تۇلعا اكىمشىلىك جاۋاپكەرشىلىككە تارتىلعانى حابارلاندى. ولاي بولسا كىم جۇمىس ىستەيدى؟..», - دەيدى.

قازاقستاندا كەدەيلەر سانى 1,5 ملن ادام

ايتپاقشى، «اق جولدىقتار» ۇكىمەت ەسەبىنە دەيىن كاسىپكەرلەردىڭ پروبلەمالارى تۋرالى ايتىپ، جاۋاپتى شەندىلەرگە اعىمداعى جىلعا ارنالعان بيۋدجەتتى ناقتىلاۋ كەزىندە «ۆاكتسيناتسياعا جاۋاپتى ادامداردىڭ نەمقۇرايلى ارەكەتىنىڭ ناتيجەسىندە ەكونوميكاعا جانە حالىققا كەلتىرىلگەن زالالدى باعالاۋ، سونداي-اق پاندەميا سالدارىنان جۇمىسىنان جانە تابىس كوزىنەن ايىرىلعان ازاماتتارعا وتەماقى ماسەلەسىن پىسىقتاۋدى ۇسىنعان ەدى.

پارلامەنتتەگى دەموكراتتار («اق جول» دەموكراتيالىق پارتياسى) اتاپ وتكەندەي، دۇنيەجۇزىلىك بانكتىڭ باعالاۋى بويىنشا، پاندەميا كەزىندە قازاقستاندا كەدەيلەر سانى 1,5 ملن ادامعا ارتقان.

كەدەيلەر كوبەيگەنى - بۇل فانتاستيكا ەمەس شىندىق!

«بۇل - ەڭ الدىمەن، جۇمىسى كۇيرەگەن كاسىپكەرلەر مەن ولاردىڭ بۇرىنعى قىزمەتكەرلەرى. ولار بۇل كالكۋلياتسيانى «اتامەكەن» پالاتاسىنىڭ ستاتيستيكاسىمەن دە راستاپ وتىر، وعان سايكەس پاندەميا كەزىندە 430 مىڭ شوب نىسانى جۇمىسىن توقتاتتى نەمەسە تولىعىمەن جابىلدى.

بۇل جاعداي ەلدەگى تۇراقتىلىقتى شيەلەنىستىرەدى. بۇل ادامدار بۇگىندە قيىن جاعدايدا، ولاردا كۇنكورىس كوزى جوق. بۇل فانتاستيكا ەمەس، كەرىسىنشە شىندىق. الايدا ولار ءبىزدىڭ ازاماتتارىمىز جانە ءبىز مەملەكەت رەتىندە ولاردى قولداۋعا ءتيىسپىز. كەز-كەلگەن مەملەكەتتىڭ نەگىزگى مىندەتى بايلار مەن كەدەيلەر اراسىنداعى الەۋمەتتىك الشاقتىقتى ازايتۋ بولۋى كەرەك. ازىرلەۋشىلەر ۇسىنىلعان بيۋدجەتتى ناقتىلاۋدا [2021 جىل] مۇنداي تاپسىرمانى مۇلدەم كورسەتپەيدى، ال ءىس جۇزىندە حالىق پەن شوب كۇيرەگەن كەزدە الەۋمەتتىك الشاقتىق ارتىپ، ءار ءتۇرلى سالالارداعى بانكتەر مەن مونوپوليستەر نەگىزسىز بايۋدا»، - دەيدى ازات پەرۋاشەۆ.

ءبىزدىڭ كۇشىمىز – شەنەۋنىكتەر ەمەس، ىسكەر ادامدار!

5 مامىردا ءماجىلىستىڭ پلەنارلىق وتىرىسى وتكەن. وندا «اق جول» پارتياسىنىڭ توراعاسى ازات پەرۋاشەۆ ەلىمىزدەگى بايلار مەن كەدەيلەر اراسىنداعى الەۋمەتتىك الشاقتىقتى ازايتۋدىڭ ەڭ ءتيىمدى تەتىگى – جەكە كاسىپكەرلىكتى قولداۋ ءھام دامىتۋ ەكەنىن ايتقان. ۇكىمەتتىڭ ەسەپ بەرۋ جيىنىندا دا ازات پەرۋاشەۆ وسى ماسەلەنى جانە ءبىر مارتە كوتەرگەن.

«ءبىزدىڭ كۇشىمىز – شەنەۋنىكتەر دە، ۇلتتىق كومپانيالار دا، باقىلاۋشىلار دا ەمەس. ءبىزدىڭ كۇشىمىز - بۇل مەملەكەتتەن ەشتەڭە سۇراماي جانە ءبىر-ءبىرىن قولداي وتىرىپ ءومىر سۇرەتىن، ىسكەر جانە قامقور ادامدار. ولارعا اقشا تابۋعا، ءوز ءىسىن جۇرگىزۋگە كەدەرگى جاساماي، كەرىسىنشە ءومىرىن جاقسارتۋعا مۇمكىندىك بەرۋ كەرەك. قول جەتىمدى قارجىلاي قولداۋ كورسەتىڭىز جانە ءار قادامىن «اڭدىماي» ەركىندىك بەرىڭىز. بولدى»، - دەدى دەپۋتات پەرۋاشەۆ.

«اق جول» پارتياسىنىڭ توراعاسى مەملەكەت جۇمىس ورىندارىن اشىپ، سالىق تولەپ، ەكونوميكانى دامىتىپ جۇرگەندەرگە قولداۋ كورسەتۋى ءتيىس ەكەنىن ايتا وتىرىپ، پرەزيدەنت قاسىم-جومارت توقاەۆتىڭ بيزنەستى «تازا بەتتەن» باستاۋعا كوشۋ تۋرالى ۇسىنىسى، سونداي-اق مىڭداعان ارىپتەستەرىمىزدىڭ امان قالۋىنا كومەكتەسكەن كاسىپكەرلەردى قولداۋدىڭ 8 ۇسىنىمى تۋرالى وڭ پىكىر ءبىلدىردى.

«بىراق ماسەلە تەك رەتتەۋدە عانا ەمەس، ونىڭ تۇراقتىلىعىندا. 28 مامىردا «اق جول» فراكتسياسى گرۋزيا رەفورمالارىنىڭ تاجىريبەسىن پايدالانۋ جانە سالىق جانە ينۆەستيتسيالىق رەجيمدەردىڭ تۇراقتىلىعىنا، مەملەكەتتىك كاسىپورىندار مەن بيۋدجەتتەن تىس قورلاردىڭ بيۋدجەتتەرىن قوسا العاندا، مەملەكەتتىك بيۋدجەتتىڭ بىرتۇتاستىعىنا، ەكونوميكانى مونوپولياسىزداندىرۋعا جانە كرەديتتەر بويىنشا پايىزداردى تومەندەتۋگە كەپىلدىك بەرەتىن ۇلتتىق ەكونوميكالىق ەركىندىك اكتىسىن قابىلداۋ تۋرالى دەپۋتاتتىق ساۋال جولدادى»، - دەيدى پەرۋاشەۆ مىرزا.

ناتيجەلى ەسەپ – دەرەكسىز ساندار ەمەس، ەلدىڭ ءال-اۋقاتى!

ازىرگە اسقار مامين ۇكىمەتى «اق جول» فراكتسياسىنان جىبەرىلگەن بۇل ۇسىنىستارعا جاۋاپ بەرمەگەن ەكەن.

بيۋدجەتتىڭ ادامي ولشەمىنە باسا نازار اۋدارۋ ارقاشان ماڭىزدى. ول - دەرەكسىز ساندار ەمەس، ازاماتتاردىڭ ءومىرى مەن ءال-اۋقاتى. دەموكراتتار فراكتسياسى 2020 جىلعى بيۋدجەتتى باعالاي وتىرىپ، وتكەن جىلعى كونوناۆيرۋس ىندەتىنەن قايتىس بولعان قازاقستان ازاماتتارىن ەسكە العان. مارقۇمداردىڭ وتباسىلارىنا كوڭىل ايتىپ، ىندەتپەن كۇرەسىپ جۇرگەن ازاماتتارعا العىستارىن جەتكىزگەن. ەسكەرتۋ ءۇشىن. ءماجىلىستىڭ جالپى وتىرىسىنا قاتىسقان وزگە فراكتسيا وكىلدەرى بۇل تاقىرىپ تۋرالى «ءلام-ميم» دەمەگەن. تەك بولعانى، ستاتيستيكالىق باياندامالارمەن شەكتەلگەن.

پەرۋاشەۆ باستاعان دەپۋتاتتار وتكەن جازدىڭ قيىندىققا تولى ايلارىندا شەنەۋنىكتەردىڭ نازارىنسىز قالعان بوس ورىندى ءوز ەڭبەگىمەن تولتىرعان مىڭداعان ۆولونتەرلەرگە دە العىس ايتتى.

«كاسىپكەرلەر مەن ستۋدەنتتەر، ءۇي شارۋاسىنداعى ايەلدەر مەن فەرمەرلەر، زەينەتكەرلەر مەن پوليتسيا قىزمەتكەرلەرى چات قۇرىپ، بەيتانىس ادامدارعا ءدارى-دارمەك ىزدەدى، وتتەگى اپپاراتتارىن ساتىپ الدى، مۇقتاج ادامدارعا ازىق-تۇلىك جەتكىزدى. «ءار قازاق مەنىڭ جالعىزىم»، «قانىمىز ءبىر» سىندى ۇراندار سول ايلاردا جالپىعا ورتاق بولدى»، - دەيدى ازات پەرۋاشەۆ.

مەملەكەتتىك ورگانداردىڭ باسقارۋ جۇيەسىنە بەرگەن ەلدىڭ باعاسى ءادىل!

دەموكراتتاردىڭ ليدەرى دەنساۋلىق ساقتاۋ، تسيفرلاندىرۋ، ءبىلىم بەرۋ جانە الەۋمەتتىك قامتاماسىز ەتۋدەگى ولقىلىقتاردىڭ ورنىن تولتىرعان قاراپايىم ادامداردىڭ ءىس-ارەكەتتەرى جايلى: «قازىر جۇكتى ايەلدەردەن قايتارۋدى تالاپ ەتىپ جاتقان 42500 تەڭگە ەسەپتەلگەن بيۋروكراتيا مەن ادىلەتسىزدىككە توتەپ بەرۋگە ءدال وسى بىرلىك كومەكتەستى. بۇل ىنتىماقتاستىق بىزگە جانە ءبىزدىڭ بالالارىمىزعا قاشىقتىقتان وقىتۋعا، عالامتوردىڭ قولجەتىمسىزدىگىنە جانە ميللياردتاعان جانە ميللياردتاعان تەڭگە جۇمسالعان باسقا دا «تسيفرلاندىرۋعا» قاتىستى ەلدىڭ كوزىن اشتى. ءوز كۇشىنە دەگەن بۇل سەنىم كاسىپكەرلەرگە جۇمىس ىستەۋگە جانە جۇمىسشىلاردىڭ جالاقىسىن تولەۋگە جول تابۋعا كومەكتەسەدى. شوب-تەگى كوپتەگەن ۇجىمدار ناعىز وتباسىلارعا اينالىپ ۇلگەرگەن دەسەم قاتەلەسپەيمىن. ويتكەنى جۇمىستىڭ ۇزاق ۋاقىت توقتاپ قالۋىنا قاراماستان، ولار ءوز قىزمەتكەرلەرىن جۇمىستان بوساتقان جوق. ءومىر سۇرۋگە دەگەن وسى ەرىك-جىگەر، ەشقاشان بەرىلمەۋ جانە وزىنە سەنۋ قابىلەتى - ءبىزدى بولاشاققا سەنىممەن قاراۋعا يتەرمەلەيدى»، - دەدى ول.

بىرقاتار مەملەكەتتىك ورگانداردىڭ باسقارۋ جۇيەسىنە بەرگەن ەلدىڭ باعاسىمەن كەلىسپەۋ قيىن: «وتكەن جىلى قوعام دەنساۋلىق ساقتاۋ جۇيەسى سالاسىنداعى، الەۋمەتتىك جانە مەديتسينالىق ساقتاندىرۋ قورىنىڭ، «سك-فارماتسيا» كومپانياسىنىڭ، باسقا دا كوپتەگەن ۆەدومستۆولاردىڭ جۇمىسىنداعى قۇلدىراۋدىڭ كۋاسى بولدى. كوروناۆيرۋستان جانە سىبايلاس جەمقورلىق پەن شەنەۋنىكتەردىڭ قاتەلىكتەرى سالدارىنان جۇزدەگەن, مىڭداعان قازاقستاندىق زارداپ شەكتى، 6,5 مىڭنان استام ادام قايتىس بولدى، سونىمەن قاتار تاعى 30 مىڭعا جۋىق وتانداسىمىزدىڭ ءومىر مەن ءولىم اراسىنداعى ادامداردىڭ تىزىمىنە ەنگىزىلدى. ونىڭ ىشىندە مەديتسينالىق بەكەتتەردە وزدەرىنىڭ كاسىبي بورىشتارىن وتەۋ بارىسىندا 200-دەن استام دارىگەر قازا تاپتى»، - دەپ اتاپ ءوتتى «اق جول» ليدەرى.

570 ملرد. تەڭگە ءتيىمسىز جۇمسالعان. بۇل انتيرەكورد!

ول سونداي-اق اتقارۋشى بيلىك جۇمىسىنداعى تيىمسىزدىك پەن اشىق ۇرلىقتىڭ باسقا دا مىسالدارىن اتاپ كورسەتتى: «ەسەپ كوميتەتى 570 ملرد. تەڭگەگە جۋىق بيۋدجەت قاراجاتىن ءتيىمسىز پايدالانۋدا تاريحي انتيرەكوردتى، جۇمىسپەن قامتۋ باعدارلامالارىن ىسكە اسىرۋدا جالعاندىق پەن تىكەلەي ۇرلىقتى جانە تاعى باسقالاردى انىقتادى»، - دەدى پەرۋاشەۆ.

ءماجىلىس تاراپىنان مينيسترلەر كابينەتىنە كەلىپ تۇسكەن باسقا دا شاعىمداردىڭ اراسىندا قحر-مەن ساۋدا دەرەكتەرىندەگى سايكەسسىزدىكتەر تۋرالى كەدەننىڭ شەشىلمەگەن پروبلەماسى كورسەتىلگەن، سونىڭ سالدارىنان بيۋدجەت شىعىندارى شامامەن 380 ملرد. تەڭگەنى قۇراپتى.

ازات پەرۋاشەۆ اتالعان ماسەلەگە قاتىستى: «بۇل پروبلەمانىڭ كونتراباندالىق ولشەمى عانا ەمەس. زاڭدى اينالىپ ءوتىپ اكەلىنگەن تاۋارلار وتاندىق ءونىمنىڭ جوسىقسىز جانە قاۋىپتى باسەكەلەستىگىن قۇرايدى. قازاقستاندىق وندىرۋشىلەردىڭ ەكونوميكاسىنا نۇقسان كەلتىرەدى»، - دەيدى.

ول يندۋستريالاندىرۋ باعدارلاماسىنىڭ (يدمب) جىبەرىپ العان مۇمكىندىكتەرى تۋرالى ايتىپ، ىسكە اسىرىلعان 72 جوبا ناتيجەسىز بولعاندىعىن، ءتىپتى 20-عا جۋىق جوبا ەكونوميكالىق تيىمدىلىگىن تولىق جوعالتقانىن ايتتى.

«اقجولدىقتار» وسى ۋاقىتقا دەيىن تولىق ىسكە قوسىلماعان تاعى ءبىر رەزەرۆ رەتىندە كۆازيمەملەكەتتىك سەكتوردى اتاعان. جوعارىدا ايتقانىمىزداي، ەسەپ كوميتەتىنىڭ دەرەكتەرى بويىنشا، ۇلتتىق كومپانيالار مەن كۆازيمەملەكەتتىك كاسىپورىندار وتكەن جىلى بيۋدجەتكە ءوز تابىسىنىڭ تەك 7%-ىن جىبەرگەن. بۇل رەتتە سول دەرەكتەر بويىنشا كۆازيمەملەكەتتىك سەكتورداعى زاڭبۇزۋشىلىقتاردىڭ سوماسى – 340-380 ملرد تەڭگەدەن اسادى. «اق جول» فراكتسياسى، ەگەر مەملەكەتتىك كاسىپورىن قۇرىلعاننان كەيىن 3-5 جىلدان كەيىن رەنتابەلدىلىككە شىقپاسا، مەملەكەتكە پايدا اكەلمەسە، وندا مۇنداي كاسىپورىننىڭ قىزمەتى تۋرالى ماسەلەنى مايشاممەن قاراۋ كەرەكتىگىن ايتىپتى.

ۇكىمەت «ەليتالىق» عيماراتتاردىڭ ەمەس، 3 اۋىسىمدى مەكتەپتەردىڭ ماسەلەسىن شەشۋ كەرەك

سونداي-اق، ماجىلىسمەندەردىڭ وتكەن جىلعى بيۋدجەتتىڭ شىعىس بولىگىنە قاتىستى نارازىلىقتارى دا كوپ ەكەن.

«اۋرۋحانالاردى، ستاديونداردى، مەكتەپتەردى، قوقىس پوليگوندارىن سالۋعا ارنالعان اكىمدىكتەردىڭ فانتاستيكالىق شىعىندارى تيپتىك جوبالاردان 5-6 ەسە قىمبات ەكەنى قوعامنىڭ تۇسىنبەۋشىلىگىن تۋىنداتۋدا. وسىلايشا، «اق جول» پارتياسىنىڭ دەپۋتاتتارى ەلوردا ءماسليحاتىندا ارقايسىسى 7,5 ملرد تەڭگە بولاتىن مەكتەپتەردى سالۋ جونىندەگى ۇسىنىستارعا قارسى داۋىس بەرگەن جالعىز فراكتسيا بولدى. بۇل جوبا داعدارىس جاعدايىندا جۇرتشىلىقتىڭ سىنىنا ۇشىراپ وتىر. قازىرگى جاعدايدا «ەليتالىق» مەكەمەلەردى سالىپ، الەۋمەتتىك تەڭسىزدىكتى كۇشەيتۋدەن گورى، ىرگەلەس اۋىلداردا ءۇش اۋىسىمدى مەكتەپتەردىڭ وزەكتى ماسەلەلەرىن شەشۋ ورىندى بولار ەدى. ءمجا جوبالارى بيۋدجەتتەن شىعىستارعا اكەپ سوقپايدى دەگەن سىلتەمەلەر ورىنسىز، ويتكەنى مۇنداي جوبالار كەز كەلگەن جاعدايدا مەملەكەتتىك مىندەتتەمەلەرمەن ىسكە اسىرىلادى جانە جەرگىلىكتى ورگانداردىڭ بورىشىنا اسەر ەتەدى. ەسەپ كوميتەتىنىڭ توراعاسى ءوز بايانداماسىندا ونىڭ سىني ءوسۋىن اتاپ ءوتتى», - دەيدى ازات پەرۋاشەۆ مىرزا.

ءماجىلىس دەپۋتاتى ءوز ءسوزىن قورىتىندىلاي كەلە، ەل دامۋىن جالعاستىرۋى كەرەك ەكەنىن، پاندەميانىڭ سالدارىن جەڭۋ، انىقتالعان قاتەلىكتەردى جويۋ، قاجەتسىز شىعىندار مەن ءتۇپسىز تەسىكتەردى اقشامەن تولتىرۋ ارەكەتتەرىنەن باس تارتۋ، باسىمدىقتاردى قايتا قاراۋ، بىرەۋدىڭ امبيتسياسى مەن تابەتىنە ەمەس، ۇلتتىق مۇددەلەرگە قىزمەت ەتەتىن، تەك ناتيجە مەن پايدا اكەلەتىن نارسەنى قارجىلاندىرۋ ماڭىزدى ەكەنىن اتاپ ءوتتى.

ءتۇيىن. الدىمىزدا تۇراقتى ەكونوميكانى قالپىنا كەلتىرۋ مىندەتى بار. وعان قوسا، الىس-جاقىن كورشى ەلدەردە كونوناۆيرۋستىڭ ءۇشىنشى تولقىنى باستالىپ كەتكەنى جانە راس. وسىنداي الاعاي دا، بۇلاعاي ۋاقىتتا اسقار مامين تىزگىنىن ۇستاعان ەلدىڭ مينيسترلەر كابينەتى نە ىستەمەك؟ شاماسى، وسى سۇراقتىڭ جاۋابىنا ۇكىمەتتىڭ تاعدىرى عانا ەمەس، ەلدىڭ الداعى جىلدارداعى بولاشاعى دا بايلانىستى…

نۇرگەلدى ابدىعانيۇلى

Abai.kz