قالتاەۆا قازاقستاندا 20 جىلدان استام ۋاقىت بويى ينكليۋزيا ماسەلەلەرىمەن جانە مۇگەدەكتىگى بار ادامداردىڭ قۇقىقتارىن قورعاۋمەن اينالىسىپ كەلەدى.

قازاقستان وكىلى ءلاززات قالتاەۆا 2027–2030 جىلدارعا ارنالعان بۇۇ-نىڭ مۇگەدەكتەر قۇقىقتارى جونىندەگى كوميتەتىنىڭ مۇشەسى بولىپ سايلاندى. مۇگەدەكتەردىڭ قۇقىقتارى تۋرالى كونۆەنتسياعا (CRPD) قاتىسۋشى مەملەكەتتەر كونفەرەنتسياسىنىڭ 19-سەسسياسى اياسىندا وتكەن سايلاۋدا ول 157 مەملەكەتتىڭ قولداۋىنا يە بولىپ, بارلىق ۇمىتكەرلەر اراسىنداعى ەڭ جوعارى ناتيجەنى كورسەتتى.

قازاقستان وكىلىمەن بىرگە كوميتەت قۇرامىنا ارمەنيا، بەنين، يوردانيا، قىتاي, ليتۆا، پالاۋ، ساموا جانە ەفيوپيا ەلدەرىنىڭ كانديداتتارى دا سايلاندى.

20 جىلدان استام ۋاقىت بويى مۇگەدەكتىگى بار ادامداردىڭ قۇقىقتارىن قورعاۋمەن اينالىسىپ كەلەدى.

ءلاززات قالتاەۆا – قازاقستانداعى ينكليۋزيا جانە مۇگەدەكتىگى بار ادامداردىڭ قۇقىقتارىن قورعاۋ سالاسىنداعى ەڭ تانىمال قوعام قايراتكەرلەرىنىڭ ءبىرى.

2024 جىلعى قازان ايىنان باستاپ ول قازاقستان رەسپۋبليكاسى پارلامەنتى سەناتى توراعاسىنىڭ كەڭەسشىسى جانە سەنات جانىنداعى ينكليۋزيا جونىندەگى كەڭەستىڭ ءتورايىمى قىزمەتىن اتقارىپ كەلەدى. بۇعان دەيىن قازاقستان رەسپۋبليكاسى پارلامەنتى سەناتىنىڭ دەپۋتاتى بولىپ, الەۋمەتتىك-مادەني دامۋ جانە عىلىم كوميتەتىنىڭ مۇشەسى بولدى.

ءلاززات قالتاەۆا جيىرما جىلدان استام ۋاقىت بويى «شىراق» مۇگەدەكتىگى بار ايەلدەر قاۋىمداستىعى قوعامدىق بىرلەستىگىن باسقاردى. سونداي-اق ول الماتى قالاسىنىڭ مۇگەدەكتەر ۇيىمدارى قاۋىمداستىعىنىڭ ءتورايىمى بولىپ تابىلادى.

بۇدان بولەك, قالتاەۆا قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قۇرامىنا كىرەدى.

بۇۇ-نىڭ مۇگەدەكتەر قۇقىقتارى جونىندەگى كوميتەتى – مەملەكەتتەردىڭ مۇگەدەكتەردىڭ قۇقىقتارى تۋرالى كونۆەنتسيا تالاپتارىن ورىنداۋىن قاداعالايتىن جانە مۇگەدەكتىگى بار ادامداردىڭ قۇقىقتارىن حالىقارالىق دەڭگەيدە ىلگەرىلەتۋگە ىقپال ەتەتىن تاۋەلسىز ساراپشىلار ورگانى.

Abai.kz