ەۋروپالىق وداقتىڭ مەملەكەت جانە ۇكىمەت باسشىلارى بريۋسسەلدەگى سامميتتە گەرمانيا كانتسلەرى انگەلا مەركەلدىڭ رەسەي پرەزيدەنتى ۆلاديمير پۋتينمەن كەزدەسۋ تۋرالى ۇسىنىسىن قابىلدامادى. 

ەۋروپالىق وداقتىڭ 10-عا جۋىق ەلى يدەيانىڭ ءوزىن دە، ونىڭ قۇرىلىمىن دا قابىلداماعان. كەيىنىرەك مەركەل جۋرناليستەرگە كەلىسسوزدەردىڭ ءبىرىنشى كۇنىنەن كەيىن ەو ەلدەرى باسشىلارىنىڭ رەسەيمەن سامميت تۋرالى كەلىسىمگە كەلە الماعاندارىن ايتتى.

23 ماۋسىمدا Financial Times مەركەلدىڭ ۇسىنىسى تۋرالى حابارلاعان ەدى. ماقالادا ايتىلعانداي، بەرلين ءپۋتيننىڭ اقش پرەزيدەنتى دجو بايدەنمەن جەنەۆادا كەزدەسۋى رەسەيمەن قارىم-قاتىناستى جانداندىرۋ ءۇشىن جاقسى سەبەپ دەپ سانايدى. باستامانى فرانتسيا پرەزيدەنتى ەممانۋەل ماكرون دا قولداعان.

پۋتينمەن ورتاق سامميتكە قارسى بولعانداردىڭ اراسىندا ليتۆا مەن لاتۆيا باسشىلارى بولدى. نيدەرلاند پرەمەر-ءمينيسترى مارك ريۋتتە مۇنداي كەزدەسۋگە قاتىسۋعا نيەت بىلدىرمەگەنىن، بۇعان 2014 جىلى دونباسس قالاسىندا MH17 ۇشاعىنىڭ اپاتقا ۇشىراپ، 192 گوللانديالىق ازاماتتىڭ قازا بولۋىنا بايلانىستى ەكەنىن ايتقان. حالىقارالىق تەرگەۋ توبىنىڭ مالىمەتىنشە، بۇل ىسكە قازىر رەسەيدە جۇرگەن بىرنەشە ادامنىڭ قاتىسى بار.

ليتۆا پرەزيدەنتى گيتاناس ناۋسەدا: «ەۋروپا ليدەرلەرى دەڭگەيىندە رەسەي-ەو كەزدەسۋى بولمايدى. ءبىز اراقاتىناستارىمىزدىڭ كۇردەلەنىپ بارا جاتقانىن، رەسەيدىڭ اگرەسسيۆتى ارەكەتتەرىن كورىپ وتىرمىز»، - دەپتى.

ال يدەيا اۆتورى بولعان گەرمانيا كانتسلەرى انگەلا مەركەل كەشە ەو ەلدەرىنىڭ پۋتين مەن كەزدەسۋگە قاتىستى ورتاق كەلىسىمگە كەلە الماعانىن مالىمدەگەن.

«جەكە باسىم، قانداي دا ءبىر باتىل قادامنىڭ بولعانىن قالار ەدىم. بىراق، بۇل دا جامان ەمەس. ءبىز جۇمىس ىستەپ جاتىرمىز»، - دەپتى انگەلا مەركەل.

ال لاتۆيا پرەمەر-ءمينيسترى كريشيانيس كارينش: «كرەمل تەك كۇشتىڭ ءتىلىن تۇسىنەدى. كرەمل ەرىكتى جەڭىلدىكتەردى كۇشتىڭ بەلگىسى دەپ سانامايدى. وسىنىڭ ءبارى مىنانى بىلدىرەدى: رەسەي كىرىمدى اننەكتسيالايدى، رەسەي دونباستا سوعىس جۇرگىزەدى، ال ەۋروپا موينىن بۇعىپ، رەسەيمەن ديالوگ تۋرالى ءسوز ەتەدى»، - دەپتى.

ەو باسشىلارى جيىن سوڭىندا ەۋرووميسسيا مەن ەۋروپالىق ديپلوماتيا باسشىسى جوزەپ بوررەلگە رەسەيدەگى ازاماتتىق قوعامدى قولداۋ تۋرالى ۇسىنىس ازىرلەۋدى تاپسىرىپتى. ونان سوڭ، رەسەي مەن ونىڭ باسشىلىعى تاراپىنان قانداي دا ءبىر اگرەسسيۆتى ارەكەتتەر بولسا، وعان قاتىستى شەكتەۋ شارالارىن، سونىڭ ىشىندە جاڭا ەكونوميكالىق سانكتسيالار ازىرلەۋدى تاپسىرعان.

Abai.kz