26 ماۋسىم كۇنى الماتى قالاسىندا دۇركىرەگەن كونتسەرت ءوتتى. ءيا، قاتە وقىمادىڭىز. كارانتيندىك شارالار كۇشەيىپ، ۆيرۋس جۇعۋ قارقىنى ارتقان ساتتە الماتى اكىمدىگى كونتسەرتتىڭ وتۋىنە رۇقسات ەتكەن. "الماتى ارەنانىڭ" الدىندا، مىڭداعان ادامدى جيناعان كونتسەرت ساليۋت اتۋمەن اياقتالعان. قۇددى ءبىر پاندەميا جوق كەزەڭدەگىدەي. 

كونتسەرتتى "2Rar" اتتى لاقاپ اتىمەن جاستار اراسىندا تانىمال جاس ءانشى تۇرار ىدىرىس وتكىزگەن. ونىڭ ءان كەشىنە ءوزىنىڭ جازۋى بويىنشا 3,5 مىڭ ادام قاتىسقان. بۇل تۋرالى ول ينستا پاراقشاىندا جازدى. كونتسەرتتە جاس ءانشى ءوز رەپەرتۋارىنداعى جانە باسقا دا تانىمال اندەردى ورىندادى. "الماتى ارەناعا" جينالعان جۇرتشىلىق ءانشىنىڭ العاشقى كونتسەرتىن بارىنشا قولداپ، جاستار جاعى قوسىلىپ ءان شىرقاعان. سونداي-اق ونىڭ ءان كەشىندە امىرە، سادراددين، ميراس جۇگىنىسوۆ، تاسپاي، ت.ب. ورىنداۋشىلار كەلىپ ونەر كورسەتكەن. ال كونتسەرتتى بەلگىلى بلوگەرلەر جانسەرىك قادىرباەۆ پەن رازيۋشا جۇرگىزگەن.

ارينە بۇل كونتسەرتتە جاستار ىعى-جىعى بولىپ تۇرعانى ايتپاسا دا تۇسىنىكتى. ەشقانداي دا الەۋمەتتىك اراقاشىقتىقتى ساقتاۋ دا بولماعان. ىركەسە-تىركەسە تۇرعان جاستار قوسىلا ءان سالعان ساتتە اۋا ارقىلى ۆيرۋستىڭ تاراۋى ەسەلەپ ارتاتىنى اقىماققا دا تۇسىنىكتى جايت. كوپشىلىگىندە نە ماسكا، نە انتيسەپتيك بولماعانىن ۆيدەودان اڭعارۋ قيىن ەمەس. قانشاسى ۆاكتسينا العانى نەمەسە الماعانى دا بەلگىسىز. ونداعان ادام ەمەس، مىڭداعان ادام.

الماتى قالاسىنىڭ اكىمدىگى قاتاڭ كارانتيندىك تالاپتاردى ۇستانىپ، كوپشىلىك جينالاتىن ورىنعا بارماۋعا شاقىرادى. ۆاكتسينا الۋعا ۇگىتتەپ، ماسكانى تاستاماڭدار دەيدى. 50-60 ادام جينالعان تويلاردى انىقتاپ، ايىپپۇلدى اياماي سالادى. "كارانتيندى ساقتاۋ جولىندا" دەپ قاتاڭ سويلەيدى. الايدا وسىنىڭ ءبارىن جاساي وتىرىپ، مىڭداعان ادام جينالعان كونتسەرتكە رۇقسات ەتەدى. بۇل قالاي؟ لوگيكا قايدا؟ قاراپايىم حالىق پەن انشىگە ارنالعان ەكى ءتۇرلى ستاندارت بار ما؟ ءۇندى شتامى كەلىپ، تمد ەلدەرىن ابىگەرگە سالىپ جاتقاندا، قاۋىپ ارتىپ، قاتەر كوبەيگەندە كونتسەرتكە رۇقسات ەتۋ اقىماقتىق قوي.

اتالمىش كونتسەرت جايلى اكىمدىك تۇسىنىكتەمە بەرمەدى. قالانىڭ باس سانيتارى جانداربەك بەكشيندە ءۇنسىز. كورمەگەن، اڭعارماعان، ەستىمەگەندەي.

اكىمدىك "اشىق اسپان استىندا ءوتتى" دەپ اقتالۋ جاعىن قاراستىرىپ جاتقان بولار. ونداي جاعدايدا اشىق اسپان استىندى توي وتكىزۋگە، قۋانىشتارىن اتاپ وتۋگە دە رۇقسات ەتىلۋى ءتيىس. ءسوزى مەن ءىسى ءبىر جەردەن شىقپايتىن اكىمدىكتىڭ ارەكەتىن تۇسىنە الماي دال بولۋدامىز.

Abai.kz