تاجىكستان ەلشىلىگى رەسەيدىڭ سىرتقى ىستەر مينيسترلىگىنە 21 جاستاعى اميرشو حۋسەينوۆتىڭ سكينحەدتەرمەن توبەلەستەن سوڭ ۇستالۋىنا بايلانىستى نارازىلىق نوتاسىن جولدادى. حۋسەينوۆتىڭ تۋىستارى ونى جابىرلەنۋشى دەپ سانايدى، الايدى رەسەي بيلىگى تاجىك ازاماتىن بۇزاقىلىق جاسادى دەپ ايىپتاعان. بۇل تۋرالى centralasian.org-كە سىلتەمە جاساپ Abai.kz حابارلايدى. 

تاجىكستاننىڭ رەسەيدەگى ەلشىسى يمومۋددين ءساتتوريدىڭ 29 ماۋسىمدا وزودي راديوسىنا حابارلاۋىنشا، ەلشىلىك جولداعان نوتادا رەسەي بيلىگىنەن وقيعانى ءادىل تەكسەرۋىن سۇراعان.

كۋاگەرلەردىڭ ايتۋىنشا، 23 ماۋسىمدا كەشكە سكينحەدتەر تولبۋحين كوشەسىندە "رەسەي ورىستار ءۇشىن، ماسكەۋ ماسكەۋلىكتەر ءۇشىن!" دەپ ۇرانداتىپ، باسقا ۇلت وكىلدەرىنىڭ نامىسىنا تيگەن. سكينحەدتەرمەن داعىستانتاندىقتار مەن تاجىك ازاماتى توبەلەسكەن. پوليتسيا بىرنەشە ادامدى ۇستاعان، ولاردىڭ اراسىندا اميرشو حۋسەينوۆ تە بار.

تاجىك ەلشىسىنىڭ حابارلاۋىنشا، ەلشىلىك حۋسەينوۆتى قورعايتىن ادۆوكات جالداعان. ەلشىلىك وكىلدەرى رەسەيدىڭ تەرگەۋ كوميتەتى قىزمەتكەرلەرىمەن كەزدەسىپ، وقيعانىڭ ءمان-جايىن سۇراستىرعان. "قاماۋداعى تاجىك ازاماتىنا كومەك كورسەتىلەدى", دەدى ساتتوري.

رەن تۆ تەلەارناسىنىڭ حابارلاۋىنشا، توبەلەستە جارالانعان بىرنەشە ۇلتشىل اۋرۋحاناعا تۇسكەن.

تانىمال ادام قۇقىقتارىن قورعاۋشى ۆالەنتينا چۋپيك پوليتسيا سكينحەدتەردى بوساتىپ جىبەرگەنىن، ال ۇلتشىلدىققا قارسى شىققانداردىڭ ۇستىنەن قىلمىستىق ءىس قوزعالدى دەپ جازدى.

حابارلارعا قاراعاندا، تاجىكستان ازاماتى اميرشو حۋسەينوۆ قازىر ماسكەۋدەگى تەرگەۋ يزولياتورىندا وتىر.

Abai.kz