قالام ۇستاعان قازاق زيالىلارىنىڭ رۋحاني-مورالدىق داعدارىسى 1937 جىلعى قۋعىن سۇرگىن جىلدارىندا ايقىن كورىندى. 1937 جىلى ادەبي كوركەم شىعارمالارىمەن ەلگە تانىلعان قازاق زيالىلارىن ايىپتاۋ مەن قۋعىنداۋ ەتەك الىپ، ولاردىڭ شىعارمالارىنىڭ ءار جولىنان، ايتىلعان وي پىكىرلەرىنەن ۇلتشىلدىق پەن بايشىلدىقتى، كەڭەس ۇكىمەتىنە قارسىلىقتى، تەرىس نيەتتىلىكتى كورۋگە تىرىسۋشىلار شىقتى. تاريح ساحاناسىنان كەتكەن الاشورداشىلاردى ايىپتاۋ، بۇرىندارى ازدى كوپتى بايلانىستا بولعاندار مەن ولارعا جىلى قاباق تانىتقانداردى الاشوردامەن بايلانىسىن ۇزبەگەن، الاشوردانىڭ اگەنتتەرى، نيەتتەرى ءبىر دەپ كىنا تاعۋ قالىپتى ىسكە اينالدى. جازۋشىلار شىعارمالارىنان كۇماندى دەگەن وي-پىكىر تاۋىپ، پارتيا باعىتىنان، تاپ جولىنان اۋىتقىدى دەپ ايىپتادى. سىنشىلار وسىلاي جاساۋ ارقىلى، ءبىر جاعىنان، تاپ جاۋلارىن، حالىق جاۋلارىن اشكەرلەۋگە ۇلەس قوستى. ەكىنشىدەن، پارتيا ساياساتىن، باعىتىن قولداۋ ۇستىندە دەگەن ءوزى جونىندە جاعىمدى پىكىر تۋعىزۋ ماقساتىن كوزدەدى. تاپ جاۋلارىن اشكەرلەۋ ىسىنەن، جالپى ەلدى قامتىعان ناۋقاننان قاراپايىم حالىقتان باستاپ، وكىمەت بيلىگىندەگى تۇلعالار دا تىس قالمادى.

قالام ۇستاعان قازاق زيالىلارىنىڭ رۋحاني-مورالدىق داعدارىسى 1937 جىلعى قۋعىن سۇرگىن جىلدارىندا ايقىن كورىندى. 1937 جىلى ادەبي كوركەم شىعارمالارىمەن ەلگە تانىلعان قازاق زيالىلارىن ايىپتاۋ مەن قۋعىنداۋ ەتەك الىپ، ولاردىڭ شىعارمالارىنىڭ ءار جولىنان، ايتىلعان وي پىكىرلەرىنەن ۇلتشىلدىق پەن بايشىلدىقتى، كەڭەس ۇكىمەتىنە قارسىلىقتى، تەرىس نيەتتىلىكتى كورۋگە تىرىسۋشىلار شىقتى. تاريح ساحاناسىنان كەتكەن الاشورداشىلاردى ايىپتاۋ، بۇرىندارى ازدى كوپتى بايلانىستا بولعاندار مەن ولارعا جىلى قاباق تانىتقانداردى الاشوردامەن بايلانىسىن ۇزبەگەن، الاشوردانىڭ اگەنتتەرى، نيەتتەرى ءبىر دەپ كىنا تاعۋ قالىپتى ىسكە اينالدى. جازۋشىلار شىعارمالارىنان كۇماندى دەگەن وي-پىكىر تاۋىپ، پارتيا باعىتىنان، تاپ جولىنان اۋىتقىدى دەپ ايىپتادى. سىنشىلار وسىلاي جاساۋ ارقىلى، ءبىر جاعىنان، تاپ جاۋلارىن، حالىق جاۋلارىن اشكەرلەۋگە ۇلەس قوستى. ەكىنشىدەن، پارتيا ساياساتىن، باعىتىن قولداۋ ۇستىندە دەگەن ءوزى جونىندە جاعىمدى پىكىر تۋعىزۋ ماقساتىن كوزدەدى. تاپ جاۋلارىن اشكەرلەۋ ىسىنەن، جالپى ەلدى قامتىعان ناۋقاننان قاراپايىم حالىقتان باستاپ، وكىمەت بيلىگىندەگى تۇلعالار دا تىس قالمادى.

بۇرىنعى كوزدەن تاسا بولا باستاعان «الاشورداشىلار ءىسى» 1937 جىلدىڭ باسىندا تاعى كوتەرىلدى. قازاق كسر حالىق اعارتۋ كوميسسارى، قازاقستان ولكەلىك پارتيا كوميتەتىنىڭ بيۋرو مۇشەسى ت.جۇرگەنوۆتىڭ «مادەنيەت مايدانىن تالقاندالعان ۇلتشىلدىقتىڭ قالدىقتارى مەن سارقىنشاقتارىنان تازارتايىق» [1] دەگەن ماقالا جاريالاۋى، مادەنيەت سالاسىندا ءالى دە ۇلتشىلداردىڭ قالدىقتارى مەن ولارعا نيەتتەستەر بار دەگەن پىكىردىڭ جاندانۋىنا سەبەپشى بولىپ، ۇلتشىلداردى، ولاردىڭ سارقىنشاقتارىن ىزدەۋدى ونان سايىن كۇشەيتتى. اراعا ءبىر اپتا سالىپ ر.جامانقۇلوۆتىڭ «قىراعىلىقتى كۇشەيتەيىك» [2] اتتى ماقالاسىنىڭ جارىق كورۋى ادەبيەتتەگى احۋالدى عانا ەمەس، ەل ىشىندەگى ساياسي-يدەيالىق احۋالدى دا ودان سايىن ۋشىقتىردى. ر.جامانقۇلوۆ الاشورداشىلاردى «تاپ جاۋى» دەپ اتادى. سونىمەن قاتار، ولاردىڭ اگەنتتەرى ءالى دە بار دەپ جازدى. بۇل «تاپ جاۋى» الاشورداشىلارعا نيەتتەس، پىكىرلەس، ۇندەس اقىن-جازۋشىلاردى ىزدەۋ مەن اشكەرلەۋدىڭ جاڭا قارقىندى كەزەڭىن باستاپ بەردى. قازاق ولكەلىك پارتيا ۇيىمىنىڭ دا ۇستاعان باعىتى مەن ءىس شارالارى بۇل ىسكە ەكپىن قوستى.

«كوركەم ادەبيەتتەگى ۇلتشىل-فاشيستەردىڭ زيانكەستىگىن ءتۇپ-تامىرىمەن قۇرتايىق»[3] دەگەن تاقىرىپپەن شىققان ماقالا ادەبيەتشىلەر ىشىنەن ۇلتشىل جاۋلاردى ىزدەۋگە جاڭا قارقىن قوستى. اقيقاتىندا، ماقالا الاشورداشىلاردى قالىپتاسقان تارتىپپەن اياۋسىز سىناعانىمەن، نەگىزىنەن ولارمەن نيەتتەس، پىكىرلەس، كوزقاراستارى ءبىر، بۋرجۋازياشىل-ۇلتشىلدارمەن اۋىز جالاسقان «ۇلتشىل-فاشيستەر» دەپ ساكەن، ءىلياس، بەيىمبەتتى ايىپتادى.

ساكەن، ءىلياس جانە بەيىمبەتتىڭ كۇنى وتە باستاعانىن سەزدى مە الدە ادەبيەت ساحناسىنان ءبىرجولا شىعارىپ تاستاۋ ماقساتىن ۇستاندى ما، ۇشەۋىنە قارسى جازىلعان ماقالالار باسپوزدەن تۇسپەدى. وسى كەزدە رەداكتسيا تاراپىنان جازىلعان «كوركەم ادەبيەتتەگى قاتەلەر مەن ساپاسىزدىقتار تۋرالى»[4]، «قازاق جازۋشىلارى اراسىنداعى دەرتتەرگە قارسى [5] دەپ اتالعان ماقالالاردا، «... جازۋشىلار شىعارمالارىندا قاتەلىكتەر بار، جۇمىسشىلاردىڭ، كولحوزشىلاردىڭ ءومىرىن بىلمەيدى، ەسكى تاقىرىپتان شىعا الماي ءجۇر، حالىقتىڭ دۇشپانى تروتسكيدى ماقتايدى» دەگەن كەمشىلىكتەردى ۇشەۋىنىڭ بەتىنە باستى[6, 210 ب]. ساكەننىڭ 1923 جىلى جازىلعان «قارا بۇركىت» (ارىستان ءداۋىتۇلى - لەۆ داۆيدوۆيچ تروتسكيگە) دەپ اتالعان ولەڭى[7,113 ب] ءۇشىن ۇزاق جىلدار بويى ونى ۇزدىك سوزدىق كىنالاۋ، ايىپتاۋ تۇرعىسىندا ءبىر باسىلىپ، ءبىر كوتەرىلىپ جالعاسا بەردى. ەلدەن الاستاتىلىپ، شەتەلگە كەتكەن تروتسكيگە ارنالعان ولەڭ ساكەن ءۇشىن ەسكى جارانىڭ ورنىنداي بولدى. قايتا قايتا سىزداپ، جانىنا باتتى. ساكەن شىعارماشىلىعىنا سىن ايتقان سىنشىلار ۇمىتىرا بەرىپ تروتسكيگە قايتا سوقتى، قايتا ەسكە ءتۇسىردى. بۇل جاي ساكەندى دە مازاسىزداندىردى.

وسى ۋاقىتتاعى ەل ىشىندەگى ساياسي-يدەيالىق احۋال شىعارماشىلىق ينتەلليگەنتسيانى رۋحاني داعدارىسقا دۋشار ەتتى. ءبىر بىرىنە سەنبەستىك ورىن الىپ، ولار ءبىر بىرىنە عانا ەمەس، ءوز شىعارمالارىنا دا كۇدىكتەنە قارادى. «قاشان، قالاي ايىپتاۋعا ءتۇسۋىمىز مۇمكىن» دەگەن قورقىنىش پەن ۇرەيدىڭ جەتەگىندە ءجۇردى. ۇرەي مەن قورقىنىش، جالتاقتىق ولاردىڭ بەلسەندىلىگىن تومەندەتتى. ساياسات جونىندە ءسوز ايتۋدان قاشقاقتادى. شىعارماشىلىق جۇمىسقا سەلقوستىق تۋدى. پارتيا مەن ۇكىمەت تاراپىنان بەرىلگەن ارنايى تاپسىرمالاردى ورىنداۋمەن شەكتەلدى. بىراق، بۇل دا قىراعى سىنشىلار نازارىنان تىس قالمادى.

س.سەيفۋللين ءوز ءومىرىنىڭ وسى تۇسىن بىلاي سيپاتتادى: «مەن ءدال وسى كەزدە ساياسات تۋرالى سويلەسۋدەن بەزدىم، ءتىپتى كەيبىر جولداستارمەن جولىعىسۋدان قاشقاقتايتىن بولدىم. جالعىز-اق ادەبيەت ماسەلەسىمەن ارالاسقىم كەلدى. مۇنان دا بىرقادار شىقپادى. بۇل جولىم دا بىرتە-بىرتە مەنى سىرتقا شىعارىپ، ەشنارسەگە ارالاسپاي قالۋعا اينالدىردى. بۇل سارىۋايىمشىلدىق پەن ۋپادنيچەستۆوعا يكەمدەدى. مەنىڭ بۇل حالىمە كەڭەس وكىمەتىنىڭ جاۋلارى «شوق، شوق» دەپ تابالاپ ماساتتانىپ تۇرعانداي كورىندى. وسى ويلار مەنى تومەن تارتتى، دۇشپانداردىڭ قىڭقىل سوزدەرى مەنى سارىۋايمشىلدىققا سالدى. مەنىڭ كەيبىر شىعارمالارىمدا پارتيا جولىنا قيعاش كەتكەن جەرلەر تاپ وسى كەزدىڭ، وسى سەكىلدى جاعدايدىڭ جەمىسى ەدى»، - دەپ جازدى[8,138-139 بب].

اقىن-جازۋشىلاردى شىعارمالارىنان، جەكە باستارىنان ىلىك تابۋ ارقىلى كىنالاۋ، ساياسي-يدەيالىق ايىپتاۋعا ۇلاستى، ناۋقانعا اينالىپ كەتتى.

1937 جىلدىڭ مامىرىندا «سوتسياليستىك قازاقستان» گازەتى بىرنەشە رەت باسپاسوزدە جاريالاعانداي س.سەيفۋلليندى 5-7 ساۋىردەگى قالامگەرلەر شىعارمالارىنداعى كەمشىلىكتەردى جويۋ جونىندە وتكەن جازۋشىلار جينالىسىنا قاتىسپادى، وسىلاي ىستەۋ ارقىلى جازۋشىلار اراسىنداعى قاتەلىكتەردى جويۋ ىسىنە ارالاسپاي وتىر دەپ كىنالادى.

جازۋشىلار وداعى باستاۋىش پارتيا ۇيىمىنىڭ ەسەپ بەرۋ سايلاۋ جينالىسىنا قاتىسىپ سويلەگەن ءسوزى دە ءوز باسىنا قيىندىق تۋعىزدى. جينالىسقا قاتىسقان ساكەن، ءىلياس جانە بەيىمبەت ءوز شىعارماشىلىقتارى مەن سىنشىلار سىنىنا ىلىككەن جىبەرىلدى دەلىنگەن قاتەلىكتەر جونىندە سويلەدى. ابدەن سىنعا ۇشىراعان ساكەن اقتالىپ: «بانديتكە (بۇل ارادا ل.د.تروتسكي ايتىلىپ وتىر. - ق.د.) ساكەن ولەڭ ارنادى دەيدى. ول ۋاقىتتا ول بانديت ەمەس ەدى، پوليتبيۋرو مۇشەسى ەدى. ونىڭ بانديت ەكەنىن بىلسەم جازام با؟ سىنشىلارىمىز وسى جاعىن ەسكەرمەيدى. سونىمەن قاتار «دومبىرا» تۋرالى ءسوز بولدى. «باندى» دەگەن كىنانى جۋ ءۇشىن 1924 جىلى «دومبىرانى» تروتسكيگە ارناپ باستىم. 1928 جىلى قاتە ەكەنىن ايتىپ ءوزىم ماقالا جازدىم. جۋرنالعا دا جازدىم. 1932 جىلى كازپي-دە ايتىلدى. 1932 جىلى جامانقۇلوۆتىڭ بايانداماسىندا دا ايتىلدى. پارتيا سايلاۋىندا دا بيىل ارىز بەردىم. قىستى كۇنى كرايكومعا دا ارىز بەردىم. سوندىقتان سىنشىلار داتانى ەسكەرۋى كەرەك ەدى. ەندى سول ءۇشىن ۇرا بەرۋى كەرەك پە» ەدى دەپ اشىنا ايتتى.[6,211 ب]. س.سەيفۋللين جان داۋسى شىعىپ، ادىلەتسىز سىننان اقتالا سويلەدى. بىراق، بايقاعانىمىزداي ىلىك ىزدەگەن سىنشىلار وسى جينالىستا سويلەگەن سوزدەرىندە «ساكەن جولداس كۇنى بۇگىنگە دەيىن ءوز قاتەلىكتەرىن كورمەي وتىر» دەپ العان بەتتەرىنەن قايتپادى.

ءىلياس پەن بەيىمبەت ءىستىڭ بەت الىسى ۋشىعىپ كەتكەلى تۇرعاندىعىن بايقاندىقتان دا بولار ءوز «قاتەلىكتەرىن» مويىندادى. بەيىمبەت «مەندە ۇلكەن قاتەلەر بولعانى راس. ...تۇزەتۋگە شارالار ىزدەيمىن» دەۋگە ءماجبۇر بولدى. جينالىستا قابىلدانعان قاۋلى باپتارىنا ۇشەۋىنە جەكە جەكە باپتار ارنالىپ، ەگەر الداعى ۋاقىتتا وسىنداي قاتەلىكتەر جىبەرىلەتىن بولسا، قاتاڭ شارا قولدانىلاتىندىعى ەسكەرتىلدى. قاۋلىعا ولاردىڭ ء(ىلياس، بەيىمبەت، ساكەننىڭ) زياندى كىتاپتارىن تاراتۋدان الىپ تاستاۋ جونىندە باپ ەندى [9].

ماۋسىم-شىلدە ايلارىندا دا ساكەندى ايىپتاعان بىرنەشە ماقالا جاريالاندى. «حلەستاكوۆتىڭ كوركەم ادەبيەتتەگى ءتاسىلىن» قولدانىپ ءوز بەينەسىن «رەۆوليۋتسيا ءىسى جولىنداعى كۇرەسكەر» رەتىندە كورسەتىپ، «حالىق جاۋلارى» ءوز دوستارى رىسقۇلوۆ، نۇرماقوۆ، سادۋاقاسوۆ، اسىلبەكوۆتى جاعىمدى جاعىنان كورسەتىپ جازدى. ءوزىن-ءوزى جانە جاۋلاردى كوككە كوتەرىپ ماقتاۋ ماقساتىندا «تار جول، تايعاق كەشۋ»، «دومبىرا» ت.ب. - «كونترەۆوليۋتسيالىق شىعارمالارىن» جاريالادى، - دەپ ايىپتادى[10]. ساكەنگە اشىق تۇردە «رەۆوليۋتسياعا قارسى» شىعارما جازدى دەپ ايىپ تاعا باستادى. «ۇلتشىل-فاشيست» دەگەن اتاۋعا دا ىلىكتى.

سونىمەن قاتار، سىننان كوز اشپاعان ساكەندى «شىعارما جۇمىسى شابانداپ كەتتى، سوڭعى جىلدارى كورنەكتى ەشتەڭە جازبادى، جۇرتشىلىقپەن قاتىناسى ازايدى» دەپ ايىپتادى. قازاق زيالىلارى، ونىڭ ىشىندە جازۋشىلار اراسىندا ءبىرىن ءبىرى ساياسي-يدەيالىق جاعىنان ايىپتاۋ، كىنالاۋ كۇشەيىپ قارقىن العان كەزدە، ءوزى سىنالىپ جاتقانىنا قاراماستان ساكەن، «حالىق جاۋى» دەپ ايىپتالعاندارعا قارسى ەشتەمە جازا قويمادى. بىراق، بۇل دا نازاردان تىس قالمادى.

«ساكەن جولداس حالىق جاۋلارىمەن كۇندەلىكتى كۇرەسۋدىڭ ورىنىنا، ولاردىڭ قىلىقتارىنا شەكتەن اسقان شىدامدىلىق ىستەپ ۇندەمەي وتىر. قازىردە، قازاق ۇلتشىلدىعى ەڭ باستى قاۋىپ بولىپ وتىرعاندا، بۇرىنعى ۋكلوندار، پارتياعا قارسى جىكتەر ءبىر ارناعا قۇيىلىپ، ۇلتشىل-فاشيستكە اينالىپ وتىرعاندا، ساكەننىڭ تىم-تىرىس ۇندەمەي وتىرعانى، پارتيا ۇيىمىنا جاردەم بەرمەي وتىرعانى - پارتيالىق مىندەتىن تولىق اتقارماي وتىرعانى»، - دەپ ايىپتادى[11].

وسى كەزدە وڭ سولىن ءالى تولىق تانىماعان، وزىندىك وي-پىكىرى، دۇنيەتانىمى مەن كوزقاراسى قالىپتاسپاعان، جاس اقىن-جازۋشىلار عانا ەمەس، قازاق ادەبيەتىنىڭ تانىمال تۇلعالارى دا السىزدىك كورسەتتى، پەندەشىلىك جاسادى. سوناۋ، 1928 جىلى باستالعان س.مۇقانوۆ پەن ءى.جانسۇگىروۆ اراسىندا ءوزارا سىن، پىكىر ايتۋدان تۋعان جاي، 1937 جىلى شيەلەنىسىپ، ۋشىعىپ كەتتى. ءسال شەگىنىس جاساساق، 1928 جىلى قازاق باسپاسىنىڭ باس رەداكتورى س.مۇقانوۆ باسپادان شىعارعان ءى.جانسۇگىروۆتىڭ ولەڭدەر جيناعىنا «بەتاشار» جازىپ، «تاپتىق بەتى ايقىن ەمەس» دەپ سىن ايتتى. وعان نارازى بولعان ءىلياس «بەتىم اناداي ەمەس، مىناداي» [12] دەپ كولەمدى ماقالا جازدى. بۇدان كەيىن دە بىرنەشە جىل بويى ۇزدىك سوزدىق ءبىرىن ءبىرى سىناعان، كىنالاعان بىرنەشە ماقالالار جازىلىپ، ەكى جاق تا ءبىرىن ءبىرى جىكشىل، ۇلتشىل دەپ ايىپتادى.

بىراق، زامانا بەتىنىڭ قايدا بۇرىلىپ بارا جاتقاندىعىن بايقادى ما، سابيتپەن ءتۇسىنىسۋ نيەتى بار ەكەندىگىن ءبىلدىرىپ ءى.جانسۇگىروۆ «قاتەلەسۋگە قارسى بولشەۆيكتىك سىندى كۇشەيتەمىز» [13] دەگەن ماقالا جازدى. ماقالادا «ءوز ولەڭدەرىندە بايشىلدىققا، كەيدە ۇمىتسىزدىككە سالىنعانىن، كەيدە جاڭا ءومىردىڭ جاقسى جاعىن كورە الماعان «قاتەلىكتەرىن» مويىندادى. ءسابيتتىڭ ءوزىنىڭ قاتەلىكتەرىن كورسەتكەندە ارتىق كەتكەنىمەن بىرگە، دۇرىس ايتقاندارى دا بولدى دەپ ونىمەن تۇسىنىسۋگە قادام جاسادى. ءوزارا سالقىندىق لەبى سەيىلگەن سەكىلدى بولعاندا، 1937 جىلى زۇلمات باستالعاندا س.مۇقانوۆ ي.جانسۇگىروۆكە قايتا ءتيىستى، اياۋسىز شۇيلىكتى. شىعارماشىلىعى عانا ەمەس، جەكە باسى دا تالقىعا ءتۇستى. «تاريحي قاۋلىدان كەيىن» [14] دەپ اتالاتىن ماقالاسىندا «جانسۇگىروۆتىڭ رەداكتسياسىمەن 1935 جىلى ءسۇيىنبايدىڭ ۇلتشىلدىق كىتابى شىقتى. ول كىتاپتىڭ ىشىندە قازاقتى قىرعىزعا وشىكتىرىپ ايداپ سالدى» دەپ ونىڭ شىعارماشىلىعىنا ايىپ تاقسا، جازۋشىلاردىڭ جينالىسىندا «...جانسۇگىروۆ ەكى بالاسىمەن ايەلىن قويا بەردى. جىبەرىپ قانا قويماي، بالالارىنا ءتيىستى زاڭدى اقشاسىن تولەپ تۇرۋدى مىندەتىم دەپ تە بىلمەدى» [15] دەپ ونىڭ جەكە باسىنا، وتباسىلىق ىسىنە ارالاسىپ كىنا تاقتى. بۇل ازداي-اق س.مۇقانوۆ «كيروۆتىڭ ولىمىنە ارناپ جازعان ولەڭىندە ساياسي قاتە جىبەردى. ول قاتەنىڭ ءوزى دە اناۋ مىناۋ قاتە ەمەس، ۇلكەن قاتە» دەپ ساياسي ايىپ تاعىپ، ءىلياستى بۇل قاتەسىن جوندەمەدى دەپ سىنادى[16].

ءى.جانسۇگىروۆتى ايىپتاۋ ساياسي سيپات الىپ، ونىڭ شىعارمالارىنان جاۋلىق كوزقاراس ىزدەۋدىڭ كۇشەيگەنى سونشالىق، كوركەم شىعارمالارى دا بۇرمالانىپ تالقىعا ءتۇستى. كارىجان داۋكەنوۆ دەگەن ءى.جانسۇگىروۆ جيناعىنا ەرەكشە شۇيىلىكتى. ول: «جيناقتىڭ ىشىنە ەرتە كەزدە ۇلتشىلدىق يدەولوگياسىندا جازعان «مەرگەن مەن بوكەن» دەگەن اڭگىمەسىن كىرگىزىپ جانسۇگىروۆ قازاق ەڭبەكشىلەرىنە سوۆەت ۇكىمەتىن جامانداپ، قۇبىجىق ەتىپ كورسەتەدى...  قازاق ۇلتشىلدارىنىڭ ىقپالىنا جانسۇگىروۆ تە مىقتاپ تۇسكەن. ءسويتىپ قازاق ەڭبەكشىلەرىن «بوكەن»، سوۆەت وكىمەتىن «مەرگەن» ەتىپ سۋرەتتەگەن. ءسوز جوق، بۇل - بارىپ تۇرعان كونتررەۆوليۋتسيالىق، سوۆەت وكىمەتى مەن قازاق ەڭبەكشىلەرىنىڭ اراسىنا دۇشپاندىق وتىن جاقپاقشى بولعان الاشورداشىلاردىڭ ارەكەتىنەن تۋعان نارسە.

بۇل كىتاپ وقۋشىلارىمىزعا ەشبىر پايدا بەرمەيدى، پايدا بەرۋى بىلاي تۇرسىن، وقۋشىنى تەرىس پىكىرگە، الاشورداشىل كونتررەۆوليۋتسيالىق يدەياعا قاراي تارتادى. مۇنىمەن قاتار پارتيامىزعا جاۋ ەلەمەنتتەرگە قۇرال بولاتىن جيناق»، دەپ جازدى[17]. ماقالا ءى.جانسۇگىروۆتى سوۆەت وكىمەتىنە قارسى، كونتررەۆوليۋتسيالىق شىعارما جازىپ الاشورداشىل يدەيانى حالىق ىشىندە ناسيحاتتاپ وتىرعان سەنىمسىز كۇدىكتى ادام رەتىندە عانا ەمەس، بەتى اشىق «حالىق جاۋى» رەتىندە كورسەتتى.  بۇل سول زۇلمات جىلدارى وتە اۋىر ساياسي ايىپتاۋ ەدى. ءىلياس جار شەتىندە تۇردى. ارادا ەكى اپتا وتكەندە تامىزدىڭ 13 ىنەن 14 نە قاراعان ءتۇنى ءىلياس تۇتقىندالدى.

قازاق ادەبيەتىنىڭ دامۋىنا ازدى كوپتى ۇلەسىن قوسىپ بەلگىلى بولىپ قالعان كورنەكتى اقىن جازۋشىلاردى، ەندى قادام باسقان جاس ادەبيەتشىلەردى دە تاپ جاۋلارىنا ءىش تارتادى، تاپ جاۋلارىمەن بايلانىسىن ۇزبەگەن، شىعارمالارى زياندى، كەڭەستىك قوعامعا جات دەگەن سيپاتتا باسپاسوزدە اشكەرلەيتىن ماقالالار جاڭبىرشا جاۋدى. وعان جازۋشىلاردىڭ وزدەرى دە بەلسەنە ارالاستى.

جاس جازۋشى قالماقان ابدىقادىروۆ م.اۋەزوۆتى: «مۇحتار سوۆەت جازۋشىلارى قاتارىنا كىرگەلى 5 جىل بولدى. سوۆەت جازۋشىسىنا ىستەلىنەتىن جاردەم وعان تۇگەل بەرىلدى. مۇحتار ءۇش تورتتەگەن ءتاۋىر ەڭبەك تە بەردى. سونىمەن قاتار، ەسكى ۋاقىتتا، ۇلتشىل، الاشورداشىل پىكىردە ءجۇرىپ جازعان زياندى شىعارمالارىن جيناق قىلىپ باسقىزىپ وتىر. ول تۋرالى ءوزى جۇمعان اۋىزىن اشقان جوق. سونىمەن قاتار، بۇرىنعى الاشورداشىل ۇلتشىلدار ءفاشيزمنىڭ اگەنتى بولىپ بەتى اشىلعاندا، سولاردىڭ سىرىن اشارلىق ءىس ىستەمەي، ۇندەمەي وتىرۋىنىڭ ءوزى - كۇدىك. مەنىڭشە، ولاردىڭ كوپ سىرىن مۇحتار بىلۋگە ءتيىس ەدى. بەتى اشىلعان جاۋدىڭ تامىرىن قوپارا اشۋعا مۇحتار ات سالىسۋى كەرەك ەدى. بىراق، ونى مۇحتار ىستەمەي وتىر» دەپ بۇرىن الاشورداشىلارمەن ءبىر بولعان مۇحتاردىڭ ولاردى ايىپتاپ ەشتەڭە جازباي، ءۇنسىز وتىرۋىنا كۇدىك كەلتىرىپ سىنادى[18].

وسى ماندەس ماقالا ارادا شامالى ۋاقىت وتكەن سوڭ، «قازاق ادەبيەتى» گازەتىندە رەداكتسيا اتىنان تاعى باسىلدى. «اۋەزوۆتىڭ ءسوزى مەن ءىسى نەگە ءبىر جەردەن شىقپايدى» دەپ الدى دا، «اۋەزوۆتىڭ سوۆەتكە كەلگەنىنە، سوۆەت جازۋشىسى بولعانىنا بەس جىلدان اسا ۋاقىت ءوتتى. بىراق، اۋەزوۆتىڭ بۇگىنگە دەيىن شىن سوۆەتتىك باعىتتا جازىلعان ءىلىپ الارلىق ءبىر شىعارماسىن كورە الماي وتىرمىز. ول ءالى 1932 جىلعى ۋادەسىن قايتالاقتاپ، «مەنى ىستە سىناڭدار، مەن ۇلتشىلدىق، بايشىلدىق پىكىردەن مۇلدەن قول ۇزگەن اداممىن» دەۋمەن ءجۇر. ...اۋەزوۆتىڭ 1932 جىلدان بەرى جازعان شىعارمالارىنان ءىلىپ الارلىق، سوۆەتتىك دەرلىگى ...«تۇنگى سارىنى» دا سول بۇرىنعى «سارىنىن» سوۆەت ساحناسىنا شىعارۋعا تىرىسقاندىعى. ال... «الما باعىندا»، «تاس تۇلەك» پەسالارى بارىپ تۇرعان سوۆەت جاستارى ومىرىنە جالا جاپقاندىق. سوۆەت شىندىعىنا، جاستار جۇرتشىلىعىنا سۋىق قول سۇققاندىق... اۋەزوۆتىڭ بۇل پەسالارىندا استارلاپ وتىرىپ، سوۆەت جاستارىنا كۇيە جاعىپ، جاۋدىڭ سويىلىن سوعۋعا تىرىساتىندىعى ايقىن كورىنەدى. بۇل بۇرىنعى اشىق بايشىلدىعىنىڭ، ۇلتشىلدىعىنىڭ بەتىن بۇركەمەلەپ، سوۆەتتىك شىعارمانىڭ اتىن پايدالانعاندىق... اۋەزوۆ ءبىرلى-جارىم شىعارماسىندا عانا «قاتەلەسىپ» وتىرعان جوق، سوۆەت جۇرتشىلىعىنا، سوۆەت جاستارىنا جالا جاۋىپ، ەسكىلىكتى دارىپتەگەنىن ونىڭ بارلىق شىعارمالارىنان كورەمىز» [19].

بۇل - م.اۋەزوۆتى بۇرىنعى الاشورداشىل بەتىنەن قايتپاعان، بۇرىنعى ۇلتشىلدىق سارىنى، ءبىر سارىن، سوندىقتان ونى  ا.بايتۇرسىنوۆ، م.دۋلاتوۆ، ج.ايماۋىتوۆ باسقا دا ۇلتشىل، الاشورداشىل دەپ تاڭبا تاڭىلعان قازاق زيالىلارى ارتىنان جىبەرۋدى كوزدەگەن ماقالا ەدى.

س.مۇقانوۆ تاعى ءبىر ماقالاسىندا س.سەيفۋلليننىڭ «قاتەلىكتەر جىبەرىپ، سۇرىنگەنىن»، مايلين مەن دونەنتاەۆتىڭ رەۆوليۋتسيانىڭ الدىڭعى جىلدارىندا حالىق جاۋى الاشوردانى ماقتاپ قاتەلەسۋىن، «ءمايليننىڭ قاتەسى سەيفۋلليننەن تەرەڭىرەك» بولعانىن، ال «ءسابيت دونەنتاەۆ الاشوردا ماسەلەسىندە مايليننەن دە اۋىر اداسىپ»، سوۆەت ادەبيەتىنە كەلگەندىگىن ايتىپ كەلەدى دە، ... بىلاي تۇجىرىمدايدى:

«مۇحتار اۋەزوۆتىڭ سوۆەتتىك تاريح الدىنداعى كىناسى بۇلاردان الدەقايدا اۋىر. ەگەر ونىڭ 1932 جىلى ءباسپاسوز بەتىندە جاريالانعان حاتىنا سەنسەك اتالعان جىلعا دەيىن ول ماركسيزم-لەنينيزم جولىنا سانالى تۇردە قارسى بوپ، سول جولدىڭ وركەندەۋىنە بوگەت بولۋعا تىرىسقان كىسى» دەگەن پىكىردى ۇستاندى[20,119 ب; 192-194 ب.].

ايىپتاعان، سىناعان ماقالالار گازەت-جۋرنالداردا كۇن قۇرعاتپاي باسىلدى. ديحان ابىلەۆ تە «...زيانكەس ەلەمەنتتەردەن ءباسپاسوز ورىندارى ءالى دە تۇگەل ارىلىپ بىتكەن جوق» دەپ زيانكەستەردىڭ اتىن اتاپ، ءتۇسىن تۇستەدى[21]. سونىمەن قاتار ول «مۇحتار ءوزىنىڭ «ەسكىلىك كولەڭكەسىندە» دەگەن قاتە اڭگىمەلەر جيناعىن باستىرىپ، ءىرى قاتە جاسادى. بۇل قاتەسىن مۇحتار ىسىمەن تۇزەتۋى كەرەك» دەپ م.اۋەزوۆتى دا سىناپ ءوتتى[8,83 ب].

ح.جۇسىپبەكوۆ تە قىراعىلىق تانىتتى. «...سوڭعى كەزگە دەيىن جازۋشىلار ۇيىمىنىڭ، كوركەم ادەبيەت باسپاسىنىڭ ساياسي بەيقامدىعىن، اشىقاۋىزدىعىن پايدالانىپ، حالىق دۇشپاندارى سۇلتانبەكوۆ، جۇماباەۆتار كوركەم ادەبيەت اۋدارماسىن الىپ كەلگەن. ۋالياحمەتوۆ، قوڭىراتباەۆ، ايساريندەر ءبىر كەزدە جازۋشىلار ۇيىمىنىڭ باسقارۋشى ىسىنە دەيىن ارالاسىپ جۇرگەن. بەكوۆ، گاتاۋليندەر ادەبيەت ماڭىندا بولىپ كەلگەن. وسى جاۋىزداردىڭ كوركەم ادەبيەتكە ىستەگەن قاسكۇنەمدىكتەرى از ەمەس. سوندىقتان ءبىزدىڭ ەڭ باستى مىندەتىمىز - كونتررەۆوليۋتسياشىل قازاق ۇلتشىلدىعىمەن، وعان ىمىراشىلدىق جاساۋمەن ەشبىر اياۋسىز كۇرەسىپ وتىرۋىمىز كەرەك» دەپ ۇلتشىلداردى اشكەرلەۋ ىسىنە ارالاستى[22].

زاماننىڭ ىزعارلى جەلىنەن قورقىپ بەلسەندىلىك تانىتقىسى كەلدى مە، الدە باسقا ىشكى ەسەبى بولدى ما جۇماعالي ساين ودان دا قاتتى كەتتى. «حالىق جاۋلارى، ءفاشيزمنىڭ قارعىلى توبەتتەرى شارۋاشىلىق، مادەنيەت قۇرىلىسىمىزدىڭ ءبىر عانا بولىگىنە زيان جاساپ قويعان جوق، ولار وزدەرىنىڭ ەكىجۇزدىلىك سۇرقيالىلىعىن پايدالانىپ، ءار جەرگە-اق قانات جايعىسى كەلدى. ولاردىڭ سۇر كۇشىكتەرى توعجانوۆ، جانسۇگىروۆتەر وسى كۇنگە دەيىن كوركەم ادەبيەت مايدانىندا ورىن الىپ كەلدى» دەپ توعجانوۆ پەن جانسۇگىروۆتى اشىق تۇردە «حالىق جاۋى» قىلىپ شىعاردى[23].

30 جىلداردىڭ ەكىنشى جارتىسىندا قازاق ادەبيەتىنە وزىندىك قول تاڭبالارىن قالدىرعان كورنەكتى تۇلعالاردىڭ ءوزى رۋحاني مورالدىق داعدارىسقا ءتۇستى. بۇرىن ءبىرىن ءبىرى شىعارمالارىنداعى تاپتىق، ساياسي-يدەيالىق كوزقاراستارى بويىنشا سىناسا، ەندى ءبىر بىرىنە اشىق تۇردە جالا جاپتى، كىناسىز ەكەندىگىن بىلە تۇرا ايىپتادى. اقيقاتىندا، ارقايسىسى ءوز قارا باستارىن قورعاۋعا جانالاستى. بۇل ادامدار اراسىنداعى جامان قاسيەتتەردى پرينتسيپسىزدىكتى، جالتاقتىقتى، جاعىمپازدىقتى، جانى اشىماستىقتىقتى ءورشىتتى. 1937 جىلعى رەپرەسسيا بۇرىننان بىقسىعان شالانى ۇرلەدى. بۇرىنعى جىكشىلدىك، جەرشىلدىك، رۋشىلدىق، باقتالاستىق جاڭا ساتىعا كوتەرىلدى. ەندى ءوز قىزمەتتەستەرىنە ساياسي ايىپ تاعۋعا، قۋعىنداۋعا تىكەلەي ارالاستى. رەپرەسسيانى قولدادى، جازالاۋ شارالارىنا باسپاسوزدە ءۇن قوستى. بۇگىن بىرەۋدى ايىپتاعاندار، ەرتەڭ وزدەرى ايىپتالدى. ولاردى ۇستالامىن-اۋ دەگەن ۇرەي مەن قورقىنىش بيلەدى. ادامدى باسقالار نە بولسا و بولسىن، قالاي بولسا دا ءتىرى قالسام  دەگەن قۇلدىق پسيحولوگيا جەڭدى. اسىرەسە، «جالاقورلار ... باسساۋعالاۋ قامىندا بولدى. «قىراعىلىعىڭ كەم» دەگەن ايىپتاۋعا ۇشىراپ، كرەسلودان سىپىرىلىپ قالارمىن دەپ قورىقتى. اتاق ءۇشىن نەدەن بولسا دا تارتىنبادى، ادال ادامداردى جابىرلەۋگە، جىلاتۋعا، ايداتىپ، اتتىرۋعا باردى. باسقالاردى اشكەرلەپ، ەڭبەك ءسىڭىرىپ جۇرگەن ادام رەتىندە كورىنىپ، قولدى بولماۋعا، لاۋزىمىنان ايرىلماۋعا تىرىستى. ءسويتىپ، ءوز باستارىنىڭ اماندىعىن قاراستىردى»[24,92 ب]. ايىپتاۋ مەن جازالاۋ شارالارى قازاق ينتەلليگەنتسياسىن ابدەن ۇرەيدىڭ جەتەگىنە جەكتى. ولار قياناتتى كورە تۇرسا دا ۇندەمەدى، ءبىرىن ءبىرى كىناسىز ەدى دەپ اقتاۋعا، قارسىلىق ءبىلدىرىپ داۋىس كوتەرۋگە قورىقتى. اكادەميك، تاريحشى ر.ب.سۇلەيمەنوۆتىڭ «30-شى، 50-ءشى جىلدارداعى رەپرەسسيانىڭ تابى بۇگىنگى كۇنىمىزدەن دە سەزىلەتىنى - شىندىق. ءجونسىز، جوسىقسىز قۋدالاۋ ءبىزدىڭ ينتەلليگەنتسيانى زارەزەپ قىلعاندىعى سونشا، ۇرەيدىڭ ءوزى مۇرا سياقتانىپ، ءبىر ۇرپاقتان ەكىنشىسىنە جالعاسىپ كەلەدى[25]» دەپ جازعانى تاريحتى تارازىلاۋ عانا ەمەس، اقيقات ەكەندىگى دە تالاس تۋدىرمايدى. ع.مۇسىرەپوۆتىڭ وزىنە «جيىرماسىنشى-وتىزىنشى جىلدار ... وڭاي سوقپاعان ءتارىزدى. ... بۇگىن بولماسا - ەرتەڭ، ەرتەڭ بولماسا - بۇرسىگۇنى ايدالىپ كەتەمىن دەپ ويلاعان. سوندىقتان، ءبىر-ەكى پار تازا كيىم، بەتورامال، شۇلىق، ۇستارا، سابىن، تاراق جانە باسقا اسا قاجەت دۇنيەلەر سالىنعان جول چەمودانىن بوساعاعا سۇيەپ قويىپ، ەكى كوزى ەسىكتە بولعان. ەرتە مە، كەش پە  - ۇستالا قالعان كۇندەرى تەرگەۋشىلەر جارماسادى-اۋ دەگەن تۋىندىلارىنان الدىن الا باس تارتىپ، كۇندەلىكتى جازبالارىندا ءوز پايداسىنا شەشىلەتىن پىكىرلەر جازىپ وتىرعان. ءبىر عاجابى، ەشقانداي داۋ تۋعىزباۋ ءۇشىن، بۇرمالاپ اۋدارماۋ ءۇشىن كەيبىر پىكىرلەرىن، «مويىنداۋلارىن» ورىس تىلىندە جازعان. مىسالى، لاتىن ارىپىمەن باسىلعان «قىز جىبەك» دراماسىنىڭ ءۇشىنشى بەتىندە ءوز قولىمەن جازىلعان مىناداي سوزدەر بار: «پروشۋ ۆسەح، مۋجچين ي جەنششين، ناستوياششيح ي بۋدۋششيح ، ت.ە. نىنە زدراۆستۆۋيۋششيح ي بۋدۋششەم روجدايۋششيحسيا، ەسلي ەتا گلۋپەيششايا ۆەشش پوپاداەت كومۋ-نيبۋد ۆ رۋكي، نە چيتايتە ەە دالشە ەتوي سترانيتسى. ناپيسانى مەرزكو، گلۋپو، بەزدارنو، داجە بەسسوۆەستنو!» اۆتور مۋسرەپوۆ»[26,42-43 بب]. بۇگىن بولماسا ەرتەڭ ۇستالام دەگەن قاۋىپ پەن ۇرەي تەك قانا ع.مۇسىرەپوۆتىڭ ەمەس، بارلىق قازاق زيالىلارى باسىنان ءوتتى.

اقيقاتىندا، 30 جىلدارى جازالاۋ شارالارى قارقىن العاندا جالپى قازاق ينتەليگەنتسياسى، ونىڭ ىشىندە شىعارمالارىمەن تانىلىپ كوزگە كورىنىپ قالعان، ايىپتاۋ نىساناسىنا ىلىككەن شىعارماشىلىق ينتەلليگەنتسيا قورقىنىش پەن ۇرەيدىڭ جەتەگىندە ءجۇردى. قايتسەم امان قالام دەگەن پەندەلىك سۇراق باستى ورىنعا شىقتى. سونىمەن قاتار، شىنىمەن «حالىق جاۋى» شىعار، پارتيا مەن نكۆد قاتەلەسپەيدى دەگەن تۇسىنىك تە بولدى. سودان دا، شىعار تروتسكيشىلەردى ايىپتاۋعا قازاق ينتەلليگەنتسياسى وكىلدەرى دە ءۇن قوستى.

موسكۆادا 1937 جىلدىڭ 23-30 قاڭتارىندا «انتيسوۆەتتىك تروتسكيستىك ورتالىق» ءىسى بويىنشا پياتاكوۆ، سوكولنيكوۆ، رادەك ت.ب. سوتى ءوتىپ، ولار اتىلۋ جازاسىنا كەسىلدى. وسى كەزدە ءى.جانسۇگىروۆ پياتاكوۆتىڭ ءولىم جازاسىنا كەسىلگەنىن قولداپ:

بارەكەلدى، حالقىم سوتى، جاقسى ايتتىڭ!

بيلىگىڭمەن جۇرت اشۋىن جۇباتتىڭ.

حالقىم سۇيگەن ءستاليندى اتپاق بولعان

اسىرەسە پياتاكوۆتى جاقسى اتتىڭ! - دەپ ولەڭ جازدى[27]. ال، ارادا شامالى ۋاقىت وتكەن سوڭ ءى.جانسۇگىروۆتىڭ ءوزى دە «ۇلتشىل-فاشيست» دەپ ايىپتالىپ تۇتقىندالدى.

37 جىلدىڭ دۇربەلەڭى كەزىندە «حالىق جاۋلارى» ۇستالىپ، دۇركىن دۇركىن سوت ءوتىپ جاتقاندا باسپاسوزدە بۇل شارانى قولداعان ماقالالار، ولەڭدەر ءجيى جاريالاندى. حالىق جاۋلارىن اشكەرلەۋ مەن جازالاۋدى پارتيا ساياساتى دەپ تۇسىنگەن ينتەلليگەنتسيا قالىس قالمادى، قولداۋعا ءماجبۇر بولدى.  ج.جاباەۆ «كەكتى اشۋ» دەپ اتالاتىن جىرىندا تروتسكي، زينوۆەۆ، كامەنەۆتەردى «يت، قارا بەت، قاسقىر» دەپ نە ءبىر سوزدەرمەن توپەلەسە، جىردىڭ سوڭىندا ولاردى «اتىلسىن!»، «جاساسىن كۇنىم ستالين» دەپ اياقتادى. ال، «حالىق جاۋلارىن» تاۋىپ جازالاعان، كەيىن ءوزى دە وسى جازالاۋ ماشيناسىنىڭ قۇربانى بولعان ستاليندىك ناركوم ەجوۆقا ولەڭ ارنادى:

گۇل جايناپ، ءسان تۇزەگەن قالا، دالا

التىن زەر شاپان كيگەن ساي مەن سالا.

سۇيەدى ءسىزدى ءبارى ەجوۆ جولداس،

ەلىندە قازاقستان قارت پەن بالا.

مۇنىڭ ءوزى توتاليتارلىق كەزەڭنىڭ اششى شىندىعى بولۋمەن قاتار، قازاق زيالىلارىن تاعدىر تالقىسىنا، ءارى تالكەگىنە سالعان تاريحتىڭ قاسىرەتتى ءبىر كەزەڭى. ارينە، ءبىز 37 جىلدىڭ زۇلماتىنا بايلانىستى قازاق زيالىلارىنىڭ ءبىرىن اقتاۋ مەن ەكىنشىسىن كىنالاۋ، ايىپتاۋ ماقساتىن قويىپ وتىرعان جوقپىز. سولاي بولعانمەن، تاريحتىڭ دوڭعالاعى كەرى اينالمايدى. تاريحتىڭ وتكەنىن تارازىلاۋ، ودان ساباق الۋ بۇگىنگى كۇننىڭ ەنشىسىندە. سونىمەن قاتار، وتكەن 30-شى جىلداردىڭ قارالى تاريحىنان ازدى كوپتى حابارى بار جان «نەگە، بۇلاي بولدى» دەگەن سۇراققا جاۋاپ ىزدەيدى. بىزدە سوعان قوسىلامىز.

پايدالانعان ادەبيەتتەر:

1. كازاحستانسكايا پراۆدا. 1937, 11 يانۆار

2. قازاق ادەبيەتى. 1937, 18 قاڭتار

3. ادەبيەت مايدانى. 1937, №3

4. قازاق ادەبيەتى. 1937, 9 ءساۋىر

5. سوتسياليستىك قازاقستان. 1937, 28 ماۋسىم

6. بەيىسقۇلوۆ ت. جانتالاس ءومىر.-الماتى: «ارىس» باسپاسى، 2008.-320 ب.

7. ماحات د. قازاق زيالىلارىنىڭ قاسىرەتى. -الماتى: «سوزدىك-سلوۆار»، 2001.  -304 ب)

8. قوجاكەەۆ ت. قىم-قۋات ىزدەر. -وقۋ قۇرالى. الماتى، «سانات»، 1999. -400 ب.

9. قر پرەزيدەنتىنىڭ مۇراعاتى. ق.708. تىزبە 1. ءىس.931.

10. ادەبيەت مايدانى 1937, №7.

11. قازاق ادەبيەتى، 1937, 13 تامىز.

12. ەڭبەكشى قازاق. 1928, 5 ءساۋىر.

13. سوتسيالدى قازاقستان. 1932, 12 اقپان.

14. قازاق ادەبيەتى، 1937, 26 ءساۋىر.

15. قازاق ادەبيەتى، 1937, 23 مامىر.

16. لەنينشىل جاس. 1937, 12 ءساۋىر.

17. قازاق ادەبيەتى، 1937, 30 شىلدە.

18. قازاق ادەبيەتى. 1937, 13 تامىز

19. قازاق ادەبيەتى. 1937, 20 قازان.

20. كاكىشەۆ ت. شىعارمالارى. - الماتى: «انا ءتىلى» باسپاسى. -2007. - 336

بەت; كاكىشەۆ ت. ەسكەرمەيدى ەستەلىك. -الماتى: جازۋشى، 1994. -432 بەت.

21. قازاق ادەبيەتى. 1937, 28 تامىز.

22. قازاق ادەبيەتى. 1937, 14 شىلدە.

23. قازاق ادەبيەتى. 1937, 31 تامىز.

24. زاۋال. ماقالالار، ەستەلىكتەر. -الماتى: جازۋشى، 1991. -272 بەت.

25. سوتسياليستىك قازاقستان. 1988, 25 تامىز.

26. مىرزا ءالي قادىر. ءيىرىم. - الماتى: اتامۇرا، 2004. - 360 ب.

27. سوتسياليستىك قازاقستان، 1937, 2 اقپان.

اۆتور تۋرالى:  داركەنوۆ قۇرمانعالي عازەزۇلى - ت.ع.ك.، دوتسەنت. حالىقارالىق اقپاراتتانۋ اكادەمياسىنىڭ مۇشە-كوررەسپوندەنتى. قازاقستان رەسپۋبليكاسىنىڭ ءبىلىم بەرۋ ءىسىنىڭ قۇرمەتتى قىزمەتكەرى. حالىقارالىق قاتىناستار فاكۋلتەتى، ايماقتانۋ كافەدراسى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى. استانا قالاسى

«اباي-اقپارات»