استانامىزدا الاش كوسەمدەرىنە ەسكەرتكىش ورناتىلعانى -ساياسي ادىلەتتىلىك!!!
ويتكەنى، بيىل پارلامەنتتە ءبىز، و باستان الاش دەپ كەلە جاتقان “اق جول” پارتياسى فراكتسياسىنىڭ دەپۋتاتتىق ساۋالىن جاساعاندا: “الاش قايراتكەرلەرىن ۇمىت قالدىرۋ -ساياسي ادىلەتسىزدىك” دەپ جاريالاعان ەدىك.

ءيا، تاۋەلسىزدىگىمىزدىڭ 30 جىلىندا ەلوردامىزدا الاش كوسەمدەرىنە ەسكەرتكىش ورناتىلدى! الاش ارىستارى وزدەرى ارمانداعان تاۋەلسىز ەلدىڭ استاناسىنىڭ تورىنە جايعاستى! بۇل كۇنگە دە جەتتىك!

كەزىندە “الاش ەسكەرتكىشى تۇگىلى اتىن دا اتاتپايمىز” دەگەن، كەڭەستىك يدەيا سۇيەگىنە دەيىن قاتىپ قالسا دا، تاۋەلسىز ەل يدەولوگياسىن باسقارعان باسشىلار ەندى قايتتى ەكەن؟!. ىشتەي بولسا دا، الاش ارىستارىنىڭ ارۋاقتارىنان كەشىرىم سۇراي الدى ما ەكەن؟!. ءاي، قايدام…
الاش كوسەمدەرى ءاليحان بوكەيحان، احمەت بايتۇرسىنۇلى جانە مىرجاقىپ دۋلاتۇلى سەكىلدى ۇلتىمىزدىڭ ۇلى تۇلعالارىنا ارنالعان ەسكەرتكىشتى قر پرەزيدەنتى قاسىم-جومارت توقاەۆ اشتى.

سالتاناتتى شاراعا قاتىسۋشىلار الدىندا ءسوز سويلەگەن پرەزيدەنت
الاش ارىستارىنا ارنالعان ەسكەرتكىشتىڭ تاۋەلسىزدىگىمىزدىڭ 30 جىلدىعى مەن ەلوردا كۇنىنە وراي اشىلۋىنىڭ سيمۆولدىق ءمانى زور ەكەنىن اتاپ ءوتتى.
«ءاليحان – الاشوردا ۇكىمەتىن باسقارعان مەملەكەت قايراتكەرى. احمەت – حالقىمىزدى ءبىلىم مەن عىلىمعا جەتەلەپ، رۋحاني ۇستاز بولعان ايگىلى اعارتۋشى. مىرجاقىپ – ۇلت بىرلىگى ۇرانىنا اينالعان «ويان قازاق» پەن تۇڭعىش قازاق رومانىنىڭ اۆتورى، كورنەكتى قالامگەر. ءۇش قايراتكەر دە – بىرەگەي تاريحي تۇلعالار. بۇل ەسكەرتكىش – بارشا الاش ارداقتىلارىنا دەگەن قۇرمەتىمىزدىڭ كورىنىسى»، – دەدى مەملەكەت باسشىسى.

قاسىم-جومارت توقاەۆ قانشاما جىل حالىق جاۋى اتانىپ، قۋعىن-سۇرگىنگە ۇشىراعان الاش ارىستارىنىڭ ەڭبەكتەرى تاۋەلسىزدىكتىڭ ارقاسىندا لايىقتى باعاسىن الىپ، ولاردىڭ ەسىمدەرى قايتا جاڭعىرىپ جاتقانىن اتاپ ايتتى. “مەنىڭ جارلىعىممەن ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا قۇرىلدى» ، – دەدى.

ەسكە سالا كەتەيىك، “الاش يدەياسى -ۇلتتىق يدەيامىز” بولۋى كەرەك” دەپ مالىمدەگەن “اق جول” پارتياسى الاش ۇستانىمىن ساياسي باعدارلاماسىنا ەنگىزگەن جالعىز پارتيا. 2007 جىلدان بەرى تاۋەلسىز ەلىمىزدىڭ پارلامەنتى تاريحىندا تۇڭعىش رەت الاش ارىستارىن ۇلىقتاۋدى ۇسىنىپ، 2012 جىلى “اق جول” فراكتسياسى قۇرىلعالى بەرى ء“ححى عاسىرداعى الاشتىڭ اق جولى” جالپىۇلتتىق بايقاۋىن جانە جۇيەلى تۇردە ارناۋلى ءىس-شارالار وتكىزىپ كەلەدى.
تەك 2012 جىلدان -2020 جىلعا دەيىن الاشقا بايلانىستى 30 شاقتى دەپۋتاتتىق ساۋال جاسادىق. ول ءار ساۋالدى جاساۋ، جاساعان سوڭعى ونىڭ ىسكە اسۋىنداعى شەكەسى تار شەنەۋنىكتەرمەن تارتىستىڭ ءوزى ءبىر كىتاپقا جۇك بولادى.
تەك بيىل 2021 جىلعى ءماجىلىستىڭ جاڭا قۇرامىنىڭ وزىندە ۇمىت قالعان الاش ارىستارىنا ەسكەرتكىش ورناتىپ، ەسىمدەرىن ۇلىقتاۋ تۋرالى “اق جول” فراكتسياسى ءۇش رەت دەپۋتاتتىق ساۋال جاساعان بولاتىنبىز.

ونىڭ ءبىرى جوعارىدا اتاپ كەتكەندەي: ““الاش قايراتكەرلەرىن ۇمىت قالدىرۋ -ساياسي ادىلەتسىزدىك” دەپ اتالسا، ەكىنشىسى ءاليحان بوكەيحاننىڭ 155 جىلدىعىنا ارنالىپ، “ەلىمىزدە الاش كوسەمىنە لايىق ءبىر كوشە دە بولماۋى – ارۋاققا قيانات!”-دەپ اتالدى.
ءۇشىنشىسى ساياسي قۋعىن-سۇرگىن قۇرباندارىن تولىق اقتاۋ جونىندە مەملەكەتتىك كوميسسيا جۇمىسى تۋرالى دەپۋتاتتىق ساۋال.

بىراق، ءبىر تۇسىنىكسىزى پارلامەنتتە الاش ارىستارى ەسىمدەرىن ۇلىقتاپ، ەسكەرتكىشتەرىن اشۋ تۋرالى ون بەس جىلداي ۋاقىتتان بەرى دەپۋتاتتىق ساۋال جاساپ كەلە جاتقان، ساياسي قۋعىن-سۇرگىن قۇرباندارىن تولىق اقتاۋ جونىندە بىرنەشە رەت كوتەرگەن، الاش يدەياسىن ۇستانعان “اق جول” پارتياسى وكىلدەرى ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيادا دا جوق، كەشەگى الاش ارىستارىنىڭ ەسكەرتكىشتەرى اشىلۋى سالتاناتىنا دا شاقىرىلمادى…

ەڭ باستىسى، تاۋەلسىز قازاق ەلىن ارمانداپ، سول ۇلى كۇرەس جولىندا قۇربان بولعان الاش ارىستارىنىڭ استاناعا الشاڭ باسىپ كىرۋى!
اللا جار بولسىن الاشقا!

قازىبەك يسا

Abai.kz