الماتى قالاسىنىڭ تۇركىسىب اۋداندىق سوتى قر مادەنيەت جانە سپورت مينيسترلىگىنىڭ بۇرىنعى ۆيتسە-ءمينيسترى ساكەن مۇسايبەكوۆكە ۇكىم شىعاردى. كىنالى دەپ تانىدى. 

رەسمي حابارلامادان ۇققانىمىز، مۇسايبەكوۆ 190 باپتىڭ 3-بولىگى، 1-تارماعى (اسا ءىرى كولەمدە الاياقتىق جاساۋ) بويىنشا ايىپتالعان. سوت مۇسايبەكوۆتى 2021 جىلدىڭ 18-21 اقپانى ارالىعىندا (ۆيتسە-مينيستر لاۋازىمىندا بولا وتىرىپ) مەنشىككە قاتىستى سىبايلاس جەمقورلىق قىلمىسىن جاسادى دەپ تانىعان.

مۇسايبەكوۆ پەن الماتى پروكۋرورى ورىنباسارىنىڭ اراسىندا جاسالعان كىنانى مويىنداۋ تۋرالى پروتسەسسۋالدىق كەلىسىمگە سايكەس، پروكۋرور مۇسايبەكوۆكە العان پارا سوماسىنان ون ەسە كوپ مولشەردە ايىپپۇل (62 394 000) سالۋدى سۇراعان. سوت شەنەۋنىكتى كىنالە دەپ تانىپ، وعان پروكۋرور سۇراعان 62 394 000 تەڭگە كولەمىندە ايىپپۇل سالعان.

جازا تاعايىنداۋ كەزىندە، سوت مۇسايبەكوۆتىڭ ءوز كىناسىن مويىنداۋ تۋرالى پرتسەسسۋالدىق كەلىسىمگە كەلگەنىن، جاساعان قىلمىستىق قۇقىق بۇزۋشىلىقتىڭ قوعامدىق قاۋىپتىلىك دارەجەسىن، قىلمىستىق جاۋاپكەرشىلىك پەن جازانى جەڭىلدەتەتىن فاكتورلاردى، سوتتالۋشىنىڭ تۇزەلۋىنە جانە ءوزى مەن وتباسىنا قاتىستى ءمان-جايلاردى ەسكەرگەن.

ايتا كەتەيىك، بيىل اقپان ايىندا سىبايلاس جەمقورلىققا قارسى قىزمەتى قر مادەنيەت جانە سپورت ۆيتسە-ءمينيسترى ساكەن مۇسايبەكوۆتى جەمقورلىق قىلمىس جاسادى دەگەن كۇدىكپەن، نۇر-سۇلتاننان دۋبايعا ۇشقالى جاتقان جەرىنەن ۇستاعان. شەنەۋنىك «بۋكمەكەرلىك كەڭسە مەن جالپى پاترونات سالاسىنداعى مۇددەلەردى لوببيلەۋ ءۇشىن پارا الدى» دەگەن كۇدىككە ىلىنگەن.

ال مامىر ايىندا قر مادەنيەت جانە سپورت ءمينيسترى اقتوتى رايىمقۇلوۆا ءوزىنىڭ ورىنباسارى ساكەن مۇسايبەكوۆتىڭ پارا الۋ فاكتىسى بويىنشا قاماۋعا الىنۋىنا بايلانىستى سۇراققا جاۋاپ بەرىپ، ەگەر مۇسايبەكوۆتىڭ كىناسى دالەلدەنسە وتستاۆكاعا كەتۋگە دايىن ەكەنىن مالىمدەگەن.

«مەن كونستيتۋتسياعا سايكەس كىناسىزدىك پرەزۋمپتسياسى بار ەكەنىن ايتقىم كەلەدى. ەڭ الدىمەن، كىنا دالەلدەنۋى كەرەك. ەگەر كىناسى دالەلدەنسە، وندا، ارينە، زاڭعا سايكەس مەن جۇمىستان كەتۋ تۋرالى ءوتىنىش بەرەمىن. بىراق بۇل كىنا دالەلدەنگەن جاعدايدا بولادى»، - دەپتى مينيستر رايىمقۇلوۆا.

مۇسايبەكوۆ 2020 جىلدىڭ مامىر ايىنان باستاپ مادەنيەت جانە سپورت مينيسترلىگى باسشىسىنىڭ ورىنباسارى قىزمەتىن اتقارعان.

ايتا كەتەيىك، 2020 جىلدىڭ ناۋرىز ايىندا مەملەكەتتىك قىزمەتكەر جەمقورلىقپەن ۇستالسا، باسشىسى ءوز ەركىمەن قىزمەتتەن كەتۋى ءتيىس دەگەن زاڭ كۇشىنە ەندى. جاڭا ەرەجەگە ساي قاراماعىنداعى قىزمەتكەرى پارا العان باسشى سوت ۇكىمىنەن سوڭ 10 كۇننىڭ ىشىندە قىزمەتىن بوساتۋى كەرەك.

Abai.kz