سەمەي قالاسىنداعى قازاق يننوۆاتسيالىق گۋمانيتارلىق-زاڭ ۋنيۆەرسيتەتىنە الاش كوسەمى ءاليحان بوكەيحاننىڭ ەسىمى بەرىلدى.

ەل تاۋەلسىزدىگىنىڭ 30 جىلدىعى جانە ءاليحان بوكەيحاننىڭ 155 جىلدىعىنا وراي قازاق يننوۆاتسيالىق گۋمانيتارلىق-زاڭ ۋنيۆەرسيتەتى الاش قوزعالىسى جەتەكشىسىنىڭ اتىمەن اتالدى.

بۇگىن ءبىلىم ورداسىنىڭ باس عيماراتىندا ءاليحان بوكەيحان ءبيۋستىنىڭ اشىلۋ سالتاناتى ءوتتى. بيۋست اۆتورى – بەلگىلى ءمۇسىنشى، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى تالعات اناربەكوۆ. سونداي-اق ۋنيۆەرسيتەتتە «ءاليحان بوكەيحان تۇلعاسى وتاندىق عىلىم كونتەكسىندە: جاڭا پانارالىق زەرتتەۋلەر مەن ىزدەنىستەر» اتتى عىلىمي-پراكتيكالىق كونفەرەنتسيا ۇيىمداستىرىلدى.

«سەمەي قالاسىنىڭ ءبىلىم جۇيەسىندە ءاليحان بوكەيحان ەسىمىن جاڭعىرتۋ ءىسى وزەكتى. بۇل تۇرعىدا رەسپۋبليكالىق جوعارى ءبىلىم كەڭىستىگىندە وزىندىك ورنى بار – قازاق يننوۆاتسيالىق گۋمانيتارلىق-زاڭ ۋنيۆەرسيتەتىنىڭ اتاۋى «ءاليحان بوكەيحان ۋنيۆەرسيتەتى» بولىپ اۋىستى. زامانا اعىسىندا ۇلت كوشباسشىسى بولعان تۇلعا ەسىمىنىڭ ۋنيۆەرسيتەتىمىزگە بەرىلۋىنىڭ تاريحي نەگىزى بار. بۇل ءبىلىم ورداسىنىڭ قۇرىلتايشىلارى مەن ستۋدەنتتەردىڭ ەل مەن سەمەي قالاسى تاريحىنا جانە ۇلتتىق مۇددەنى تۋ ەتىپ كوتەرگەن ءاليحان بوكەيحان باستاعان الاش قوزعالىسى قايراتكەرلەرىنىڭ تاريحي قىزمەتىنە كورسەتكەن قۇرمەتى»، - دەدى ۋنيۆەرسيتەت رەكتورى شىرىن قۇرمانباەۆا.

Abai.kz