اۋىل شارۋاشىلىعىن تەحنولوگيالىق تۇرعىدان قايتا جابدىقتاۋدى قولداۋ تاسىلدەرىن مۇقيات قاراۋىمىز قاجەت. اگروونەركاسىپ كەشەنى قولداناتىن تەحنولوگيانىڭ شامامەن 90 پايىزى ابدەن ەسكىردى. ونى جاڭارتۋ كەرەك. اۋىل شارۋاشىلىعىن سۋبسيديالاۋ ساياساتىن ونەركاسىپ سالاسىنداعى مەملەكەتتىك ساياساتپەن ۇشتاستىرعان ءجون. ۇكىمەت پەن «بايتەرەك» حولدينگى وسى ماسەلە بويىنشا ۇسىنىستار ازىرلەۋى قاجەت. جالپى، اۋىل شارۋاشىلىعى سالاسىنىڭ باستى مىندەتى – ەلىمىزدى نەگىزگى ازىق-تۇلىك ونىمىمەن تولىق قامتاماسىز ەتۋ. پرەزيدەن قاسىم-جومارت توقاەۆ قازاقستان حالقىنا جولداۋىندا ءدال وسىلاي ايتىپ پارمەن بەرگەن ەدى. راسىمەن، اۋىل شارۋاشىلىعى-اسىراۋشى سالا.

ماسەلەن، الماتى وبلىسىندا 201 مىڭنان استام ادام اگرارلىق سەكتوردا ەڭبەك ەتىپ، جان باعىپ وتىر. وڭىردە 50 مىڭعا جۋىق سۋبەكتىلەر مەن 300 مىڭ قوسالقى شارۋاشىلىق جانە 373 وڭدەۋ كاسىپورىندارى جۇمىس جاسايدى. وبلىس ەكونوميكاسىنىڭ جەتەكشى سالاسى – اۋىل شارۋاشىلىعى. بۇل باعىتقا قازىنادان ۇستىمىزدەگى جىلى 50 ملرد. تەڭگەگە جۋىق قارجى بولىنگەن، ونىڭ 43 ملرد. تەڭگەسى سۋبسيديا رەتىندە قاراستىرىلعان.

ينۆەستيتسيالىق سۋبسيديالاۋ باعدارلاماسى اياسىندا، جەتىسۋ ولكەسىندەگى شارۋاشىلىقتاردىڭ شىققان شىعىنىن 32 باعىتتا ءىشىنارا وتەۋگە 12 ملرد. تەڭگە كوزدەلدى.

«جالپى وسىمدىك شارۋاشىلىعىندا تۇقىم، مينەرالدى تىڭايتقىشتار مەن گەربيتسيدتەر، بىرەگەي كوشەتتىك ماتەريالدار، سۋ جەتكىزۋ، اعاش اۋرۋلارىن جويۋ، قايتا وڭدەۋ كاسىپورىندارىنا وتكىزىلەتىن قانت قىزىلشاسى مەن داندىك جۇگەرى باعىتتارى بويىنشا سۋبسيديالاۋ جۇرگىزىلەدى»،- دەيدى الماتى وبلىسى اۋىل شارۋاشىلىعى باسقارماسى باسشىسىنىڭ ورىنباسارى باحتيار شامپيكوۆ.
بيىل اۋىل شارۋاشىلىعى داقىلدارى 972,3 مىڭ گەكتارعا سەبىلىپ، ەگىس القابى وتكەن جىلمەن سالىستىرعاندا 3,8 مىڭ گەكتارعا ارتتى. وتكەن جىلى بۇل كورسەتكىش 968 مىڭ گەكتاردى قۇراعان ەدى.

تارقاتىپ ايتار بولساق، بيدايدىڭ ەگىس كولەمى – 10,9 مىڭ گەكتارعا، داندىك جۇگەرى – 9,5 مىڭ گا، مال ازىعى داقىلدارى – 8,0 مىڭ گا، كارتوپ جانە كوكونىس – باقشا داقىلدارى – 1,3 مىڭ گا جەرگە كەڭەيتىلدى. قانت قىزىلشاسى 16,1 مىڭ گا ەگىلدى.

بۇگىنگى كۇنگە 303 مىڭ گەكتار ماساقتى ءداندى داقىلدان 524 مىڭ توننا استىق جينالعان. ونىمدىلىگى گەكتارىنا 17,3 تسەنتنەردى قۇرايدى. ال كارتوپتان 15 مىڭ گەكتاردان 288 مىڭ توننا ءونىم جينالدى. كوكونىستەرگە كەلەر بولساق، 21 مىڭ گەكتاردان 596 مىڭ توننا داقىل الىندى. باقشا داقىلدارى - 4 مىڭ گەكتاردان 110 مىڭ توننا جينالدى.

فەرمەرلەر ۋاقىتىلى ساپالى تۇقىمدارمەن، تىڭايتقىشتارمەن، تەحنيكامەن، جانار-جاعار مايمەن قامتاماسىز ەتىلدى. كوكتەمگى دالا جۇمىستارىنا اگرارلىق نەسيە كورپوراتسياسى ارقىلى «كەڭ دالا» نەسيەلىك باعدارلاماسى اياسىندا 92 شارۋاشىلىق 1,3 ملرد. تەڭگەگە نەسيەلەندىرىلدى.

«جەڭىلدەتىلگەن جانار-جاعار ماي ەنەرگەتيكا مينيسترلىگى ارقىلى بولىنۋدە، ءبىزدىڭ وبلىسقا كەپىلدى 13,8 مىڭ توننا ديزەل وتىنى ءبولىندى، ليترىنە ورتاشا باعاسى 177 تەڭگە، قازىرگى ۋاقىتتا 6228 توننا جەتكىزىلىپ، ونىڭ 2811 تونناسى 213 شارۋاشىلىققا بەرىلدى»،-دەپ ءبولىستى باحتيار شامپيكوۆ.

Abai.kz