قازاقستاندىق اسكەري قىزمەتكەر پاراشيۋتپەن سەكىرۋ كەزىندە قايتىس بولدى. قايعىلى جاعداي 14 قىركۇيەكتە الماتى وبلىسىندا بولعان. بۇل تۋرالى قورعانىس مينيسترلىگى وكىلدەرى حابارلادى. 

"2021 جىلى 14 قىركۇيەكتە الماتى وبلىسىندا جوسپارلى وقۋ پاراشيۋتپەن سەكىرۋدى ورىنداۋ كەزىندە قارۋلى كۇشتەردىڭ اسكەري قىزمەتشىسى، 1990 جىلى تۋعان "كاپيتان" اسكەري شەنى بار وفيتسەر قازا تاپتى. قالعان جەكە مالىمەتتەر تۋىستارىنىڭ ءوتىنىشى بويىنشا جاريا ەتىلمەيدى", - دەلىنگەن حابارلامادا.

مينيسترلىكتىڭ مالىمەتىنشە قايتىس بولعان اسكەري 50-گە جۋىق پاراشيۋتپەن سەكىرۋ تاجىريبەسىنە يە. ول شتاتتان تىس پاراشيۋتپەن قۇتقارۋ توبىنىڭ مۇشەسى بولعان. ءولىم سەبەپتەرى مەن ءمان-جايى انىقتالۋ ۇستىندە.

"قورعانىس مينيسترلىگىنىڭ باسشىلىعى مەن قارۋلى كۇشتەردىڭ جەكە قۇرامى قايتىس بولعان اسكەريدىڭ تۋىستارى مەن جاقىندارىنا قايعىلارىنا ورتاقتاسىپ كوڭىل ايتادى. قورعانىس مينيسترلىگى اسكەري قىزمەتشىنىڭ وتباسىنا كومەك كورسەتۋ ءۇشىن قاجەتتى شارالاردى قابىلدايدى", - دەپ حابارلادى مينيسترلىك وكىلدەرى.

Abai.kz