سامميت تاڭعى ساعات 10.00-دا باستالىپ، 2,5 ساعاتقا سوزىلدى. جيىن جابىق ەسىك جاعدايىندا ءوتتى. وعان قازاقستان، تاجىكستان، قىرعىزستان پرەزيدەنتتەرى مەن ارمەنيا پرەمەر-ءمينيسترى جانە رەسەيدىڭ سىرتقى ىستەر ءمينيسترى قاتىستى. رەسەي باسشىسى ۆلاديمير پۋتين ونلاين-فورماتتا قاتىسىپ وتىردى.

جيىن كەزىندە قىرعىز پرەزيدەنتى سادىر جاپاروۆ تالىپتەرمەن اۋعانستانداعى جاعدايدى تەزىرەك قالىپقا كەلتىرۋ جانە ىنتىماقتاستىق ماسەلەسىندە ديالوگقا كەلۋ كەرەك دەگەن.

كەرىسىنشە تاجىكستان باسشىسى ەمومالي راحمون بولسا، "تاليبان" قوزعالىسى ءوزىنىڭ بەرگەن ۋادەسىن ورىندامادى دەپ سىنعا العان.

"تالىپتەر وزگە دە ەتنيكالىق توپتاردىڭ قاتىسۋىمەن ينكليۋزيۆتى ۇكىمەت قۇرامىز دەگەن ۋادەسىن ورىندامادى. ونىڭ ۇستىنە ورتاسعاسىرلىق شاريعات زاڭىنا سۇيەنىپ، يسلام ەميراتى قۇرامىز دەپ مالىمدەدى", - دەگەن تاجىك پرەزيدەنتى.

"تاليبان" قوزعالىسى 7 قىركۇيەكتە ۋاقىتشا ۇكىمەت قۇرعانىن جاريالاعان. ۋاقىتشا ۇكىمەت قۇرامىنا ەكى تاجىك، ءبىر وزبەك كىردى. تالىپتەر وسىنى ينكليۋزيۆتى ۇكىمەت دەپ اتادى.

"تالىپتەردىڭ جاريالاعان ۋاقىتشا ۇكىمەتى ساياسي، ەتنيكالىق، ءتىل جانە گەندەرلىك ماسەلەنى ەسەپكە الماي وتىر. بۇل ەكى-ءۇش جىلدا اۋعانستان ەكسترەميستىك يدەلوگيانى ناسيحاتتاپ، دەسترۋكتيۆتى يدەيالار قارقىن الادى ما دەگەن قاۋىپ تۋدىرادى", - دەپ اتاپ وتكەن ەمومالي راحمون.

تاجىكستان پرەزيدەنتى سونىمەن بىرگە اۋعانستاننان كۇندەلىكتى كەلىپ جاتقان اقپاراتقا سايكەس، جاعداي ءبىز ويلاعاننان دا كۇردەلى ەكەنىن كورسەتىپ وتىر دەگەن. ول تالىپتەردى پاندجشەر قالاسىن تۇتاستاي قورشاپ، ازىق-تۇلىك جىبەرمەي وتىر دەپ ايىپتادى.

ازىرگە رەسەيدىڭ اۋعانستانداعى جاعدايعا بايلانىستى ۇستانىمى ايقىن بولمادى. ۆلاديمير پۋتين ونلاين ارقىلى ارىپتەستەرىنە كەز كەلگەن جاعدايعا دايىن بولۋعا شاقىرعان.

17 قىركۇيەكتە دۋشانبەدە شانحاي ىنتىماقتاستىق ۇيىمىنا مۇشە ەلدەردىڭ ليدەرلەرىنىڭ باس قوسۋى وتەدى.

Abai.kz