بەيسەنبى, 2 جەلتوقسان 2021
اقمىلتىق 3245 5 پىكىر 1 قازان, 2021 ساعات 15:17

ارون اتابەك بوستاندىققا شىعادى

پاۆلودار قالالىق №2 سوتى شاڭىراق وقيعاسى بويىنشا سوتتالعان ارون اتابەكتىڭ جازاسىن دەنساۋلىعىنا بايلانىستى جەڭىلدەتۋ جونىندە ءوتىنىشتى قاناعاتتاندىردى. بۇل تۋرالى پاۆلودار وبلىستىق سوتى مالىمدەدى.

وندا، ارون اتابەكتىڭ ناۋقاستانۋىنا بايلانىستى باس بوستاندىعىنان ايىرۋ جازاسىنىڭ وتەلمەگەن بولىگىن نەعۇرلىم جەڭىل جازانىڭ تۇرىنە اۋىستىرۋ تۋرالى ۇسىنىسى قارالعانى ايتىلعان.

سوت انىقتاماسىنا سايكەس، ا.اتابەك كەلەسى ەمدەلمەيتىن اۋرۋمەن اۋىرادى: «م50.0. ومىرتقانىڭ مويىن بولىگى ومىرتقاارالىق ديسكىسىنىڭ ميەلوپاتياسىمەن زاقىمدالۋى (G99.2).  م50.1. جۇلىننىڭ مويىن ءبولىمى دەڭگەيىندەگى دەگەنەراتيۆتى - دەميەلينيزيرلەۋشى اۋرۋى جانە ت.ب».

بۇل اۋرۋ قازاقستان رەسپۋبلياسى ىشكى ىستەر ءمينيسترىنىڭ 2014 جىلعى 19 تامىزداعى №530 بۇيرىعىمەن بەكىتىلگەن ناۋقاستانۋىنا بايلانىستى جازاسىن وتەۋدەن بوساتۋدىڭ نەگىزى بولىپ تابىلاتىن سوتتالعانداردىڭ اۋرۋلار تىزبەسىنە كىرەدى.

«زاڭ تالاپتارىنا سايكەس، (قك-ءتىڭ 75 بابىنىڭ 2 بولىگى), ءومىر بويىنا باس بوستاندىعىنان ايىرۋدان باسقا، جازانى وتەۋگە كەدەرگi جاسايتىن اۋىر ناۋقاستان زارداپ شەگۋشى ادامدى سوت جازانى وتەۋدەن بوساتادى نەمەسە ناۋقاسىنىڭ سيپاتى، جاسالعان قىلمىستىق قۇقىق بۇزۋشىلىقتىڭ اۋىرلىعى، سوتتالعان ادامنىڭ جەكە باسى جانە باسقا دا ءمان-جايلار ەسكەرىلە وتىرىپ، جازا نەعۇرلىم جەڭiل جازا تۇرiمەن اۋىستىرىلۋى مۇمكiن.

زاڭدا باياندالعان ءمان-جايلار مەن پروتسەسسكە قاتىسۋشىلاردىڭ پىكىرىن ەسكەرىپ، سوتتالعان تۇلعاعا بوستاندىعىن شەكتەۋ جازاسى 1 جىل مەرزىمىنە پروباتسيالىق باقىلاۋ ورناتۋ مەن مىندەتتەردى جۇكتەۋىنە اۋىستىرىلدى.

سوت شەشىمىمەن كەلىسپەگەن جاعدايدا سوتتالعان تۇلعا جانە پروتسەستىڭ باسقا قاتىسۋشىلارى اپەللياتسيالىق سوت ساتىسىنا شاعىم تۇسىرۋىنە قۇقىعى بار»،- دەلىنگەن سوت شەشىمىندە.

ايتا كەتەيىك، بۇعان دەيىن قازاقستاندىق ءبىر توپ قالامگەرلەر تۇرمەدەگى اقىن ارون اتابەككە اراشا سۇراپ، پرەزيدەنت قاسىم-جومارت توقاەۆقا حات جازعان. ارتىنشا، زيالى قاۋىمنىڭ بۇل ۇندەۋىن رەسەيلىك قۇقىق قورعاۋشى ۇيىمدار - پەن-موسكۆا مەن «سۆوبودنوە سلوۆو» اسسوتسياتسياسى دا قولدادى.

ال، 18 تامىز كۇنى ازاپتاۋلاردىڭ الدىن الۋ جونىندەگى توپ وكىلدەرى پاۆلودار وبلىسىنداعى اپ-162/1 تۇزەتۋ مەكەمەسىندە جازاسىن وتەپ جاتقان ساياسي تۇتقىن ارون اتابەكتىڭ دەنساۋلىعىنىڭ ناشارلاعانىن مالىمدەگەن.

«ەكى قولىم اۋىرادى، جوعارى كوتەرە المايمىن، بۇگىلمەيدى، قالامساپ ۇستاۋدىڭ ءوزى قيىن. اياعىم اۋىرادى، كامەرا ىشىندە عانا جۇرەمىن، سەرۋەنگە شىعۋدان باس تارتتىم. تاكسوفونعا قولاربامەن بارامىن. ەتاپتا سوققىعا جىققان كەزدەگى جاراقاتتارىم بولۋ كەرەك. تولىق تەكسەرۋدەن ءوتۋدى ۇسىندى، بىراق مەن ودان باس تارتتىم. سەبەبى مەنىڭ جاسىمدا «وبلۋچەنيە» الۋ قاۋىپتى دەپ ەسەپتەيمىن»، – دەگەن توپ وكىلدەرىمەن كەزدەسكەن ساياسي تۇتقىن.

الايدا ول مەرزىمىنەن بۇرىن بوساتۋعا ءوتىنىش جازبايتىنىن، ءۇش جىلدان كەيىن بوستاندىققا شىققان سوڭ تولىقتاي وتەماقى تولەتۋگە شاعىمداناتىنىن ايتقان.

ايتا كەتەيىك، ارون اتابەك 2006 جىلى الماتىدا بولعان «شاڭىراق» وقيعاسىنا قاتىسقانى ءۇشىن 18 جىلعا سوتتالدى. وعان وقيعا بارىسىندا پوليتسيا قىزمەتكەرىن ءولتىردى دەگەن ايىپ تاعىلىپ، 15 جىلىن پاۆلودارداعى تۇرمەدە وتەدى.

Abai.kz

5 پىكىر