اقيىق اقىن مۇقاعالي ماقاتاەۆتىڭ 90 جىلدىق مەرەيتويى اياسىندا، نارىنقولدا 50 ءۇيدىڭ كىلتى بەرىلىپ، اقىنعا ارنالعان ەسكەرتكىشتىڭ اشىلۋ سالتاناتى ءوتتى.

كوپتىڭ قۋانىشىن بولىسۋگە، قر مەملەكەتتىك حاتشىسى قىرىمبەك كوشەرباەۆ، قر مادەنيەت جانە سپورت ءمينيسترى اقتوتى رايىمقۇلوۆا، الماتى وبلىسىنىڭ اكىمى اماندىق باتالوۆ ارنايى كەلدى.

ولكەدەگى قۋانىشتى جايىتتىڭ ءبىرى، 50 وتباسىنىڭ باسپانالى بولۋى .
سولايشا، ەل تاۋەلسىزدىگىنىڭ 30 جىلدىعى مەن مۇزبالاق اقىننىڭ مەرەيتويىندا نارىنقولدىق اعايىن قونىس تويىن تويلادى.

تۇرعىن ءۇي كىلتتەرىن تابىستاۋ راسىمىندە ءسوز العان قىرىمبەك كوشەرباەۆ، رايىمبەك اۋدانىنىڭ قايتا تۇلەگەنىن كورىپ، ولكەنىڭ ارى قاراي دامۋىنا تىلەكتەستىگىن جەتكىزدى.

«تاۋەلسىزدىك ەلەڭ العان ۋاقىتتا نارىنقولدا قيىنشىلىق كەزەڭدەرى ءوتتى. بىراق، ەلباسىنىڭ شەشىمىنە سايكەس، رايىمبەك اۋدانى قايتا قالپىنا كەلدى. ارىتنشا كەزىندە كوشىپ كەتكەن 2,5 مىڭ حالىق تۋعان جەرىنە قايتىپ ورالىپ، وڭىردەگى تىرشىلىك جاندانا ءتۇستى.
وسىنىڭ ءبارى، تاۋەلسىزدىكتىڭ ارقاسى. وبلىس اكىمى اماندىق باتالوۆقا دا العىس ايتقىم كەلەدى. ءوڭىر جايناپ، وسە بەرسىن.
نارىنقولدىڭ جاقسارىپ جاتقانىن كورگەنىمىزگە قۋانىشتىمىز. بۇگىن ءۇي الىپ جاتقان وتباسىلار ءۇشىن ەرەكشە كۇن. بارشالارىڭىزدى قونىس تويمەن قۇتتىقتايمىن»،- دەدى قر مەملەكەتتىك حاتشىسى قىرىمبەك كوشەرباەۆ.
جالپى اۋدانى 4961 شارشى مەتر. مەرەكە كۇنى جەكە تۇرعىن ءۇيدىڭ كىلتى، 7 جانۇياعا رەسمي تۇردە تابىستالدى.
ءار ءۇيدىڭ اۋدانى-100 شارشى مەتر.
جەرىنىڭ كولەمى-10 سوتوك.
تۇرعىن ۇيدە 3 بولمەمەن قاتار، اس ءۇي، اجەتحانا، جۋىناتىن ورىن قاراستىرىلعان. ءتىپتى، ىستىق جانە سۋىق سۋى دا تارتىلعان. بارلىعى جاڭا، ساپاسى جاقسى، تالاپقا ساي.
زاماناۋي باسپانانى «گۋنن ستروي سەرۆيس» سالسا، نىساننىڭ جوباسىن «ەلم» كومپانياسى جاساعان. نەگىزىنەن ءۇيدىڭ قۇرىلىسىنا 1,1 ملرد.تەڭگە بولىنگەن.

قوس مەرەكە قاتار كەلگەن تۇرعىنداردىڭ قۋانىشىندا شەك جوق.
سولاردىڭ ءبىرى، اۋىل تۇرعىنى، كوپ بالالى انا مادينا جۇكەەۆا.
«ەل تاۋەلسىزدىگىنىڭ 30 جىلدىعى، مۇقاعالي ماقاتاەۆتىڭ 90 جىلدىعى اياسىندا باسپانالى بولىپ جاتىرمىز. بالالارىم مارە-سارە بولىپ ءجۇر. قۋانىشىمىزدا شەك جوق. وسنىداي باقىتتى سەزىنۋگە مۇمكىندىك بەرگەن مەملەكەتىمىزگە العىس ايتامىن. ءۇيىمىز وتە جاقسى، وزىمىزگە ۇناپ جاتىر»،- دەدى مادينا جۇكەەۆا.

ءدۇبىرلى تويدىڭ شەڭبەرىندە قونىس تويىن تويلاعانداردىڭ قاتارىندا بەگلان ساكەندە بار. «رايىمبەك اۋدانىنىڭ تۋماسىمىن. اۋداندىق اكىمدىكتىڭ اپپاراتىندا قىزمەت اتقارامىن. ماۋسكەۋدە ءبىلىم الىپ كەلدىم. اۋدانىمىزدا جاستارعا قولداۋ كوپ كورسەتىلەدى. وعان وزدەرىڭىزدە كۋا بولىپ وتىرسىزدار. بۇگىن جاس ماماندارعا ءۇيدىڭ كىلتىن تابىستادى. سولاردىڭ قاتارىندا وزىمدە بارمىن. قۇتتى شاڭىراققا يە بولىپ، شات-شادىمان كۇيگە ەنىپ تۇرمىن»،- دەيدى بەگلان ساكەن.

سونداي-اق، اسپانتاۋدىڭ اسقارىمەن وتتى جىرى تەڭەسكەن، مۇقاعالي ماقاتاەۆتىڭ تۋعان جەرىندە اقىنعا ارنالعان ەسكەرتكىشتىڭ اشىلۋ سالتاناتى ورىن الدى.

90 جىلدىق مەرەيتويى اياسىندا بوي كوتەرگەن نىسان، نارىنقول اۋىلىنداعى رايىمبەك كوشەسىنەن ورىن تەپتى. مۇزبالاق اقىننىڭ ءمۇسىنىنىڭ اۆتورى
قازاقستاننىڭ قۇرمەتتى ساۋلەتشىسى، اقمىرزا رۋستەمبەكوۆ بولسا، ءمۇسىنشىسى، قازاقستان سۋرەتشىلەر وداعىنىڭ مۇشەسى، سۇلتان بەيبارىس اتىنداعى سىيلىقتىڭ لاۋرەاتى كاكيموۆ قادىرحان بولىپ تابىلادى.
اماندىق عابباسۇلى شارا بارىسىندا، مۇقاعاليدىڭ ومىرشەڭ ولەڭدەرى ەل ەسىندە ماڭگى قالارىن تىلگە تيەك ەتتى.

«رايىمبەك اۋدانىنىڭ تامىرىنا ءنار ءجۇردى. بۇرىنعى كەلبەتىن كورگەندە جۇرەگىم اۋىراتىن. ەلباسىنىڭ قولداۋىنىڭ ارقاسىندا كەيپىن جاڭارتتىق. قاسىم-جومارت توقاەۆتا ولكەنىڭ وركەندەۋىنە كوڭىل بولۋدە. 800-دەن استام وتباسى كەلىپ، اۋداندا جۇمىس جانداندى وتە قۋانىشتى جايىت. وسىدان 10 جىل بۇرىن اقىننىڭ 80 جىلدىق مەرەيتويىن وتكىزۋگە دايىندىققا نارىنقولعا كەلدىم 2 اي بويى وسىندا بولدىم. اقىن شىعارماشىلىعىمەن تانىسقان سوڭ ونىڭ ولەڭدەرىنە عاشىق بولدىم. قازاق ەلى وسىنداي تالانتتى اقىندارعا باي. ولاردىڭ مۇراسىن ۇلىقتاۋ ۇرپاققا پارىز»،- دەدى اماندىق باتالوۆ.

ال ۇلى تۇلعانىڭ تۇياعى جۇلدىز ماقاتاەۆ اسقار تاۋ اكەسىنىڭ تۋعان كۇنىن ەل-جۇرتى ۇمىتپاي ۇلىقتاپ جاتقانىنا العىسىن ءبىلدىردى.

«كوزى ءتىرى بولسا 90 جاسقا تولار ەدى. عۇمىرى ۇزاق بولعاندا بۇداندا كوپ جالىندى جىر قالدىراتىنىنا ءشۇبا جوق. قىسقا عانا ومىرىندە تىرشىلىكتىڭ تەتىگى مەن كەتىگى جايلى جازىپ كەتتى. قازاق پوەزياسىنا ەرەكشە قولتاڭباسىن قالدىردى. وسىنى ەلەپ-ەسكەرىپ، ارنايى شارالار ۇيىمداستىرىپ جاتقاندارىڭىزعا العىس بىلدىرەمىن. اكەمىزدىڭ ارۋاعى سىزدەردى قولداپ ءجۇرسىن»،-دەپ قورىتىندىلادى اقىننىڭ ۇلى.

ەسكەرتكىشتىڭ جالپى قۇنى-61,1 ملن.تەڭگە.
نىساننىڭ ۇزىندىعى-8,02 م. ءمۇسىندى «تايقازان»جشس جاساپ شىعارعان.
مۇقاعالي ماقاتاەۆقا ارناپ سالىنعان ەسكەرتكىش ەكى بولىكتەن تۇرادى: سۇلباسى مەن جازۋى بار قۇلپىتاس.
ايتا كەتەيىك، اقىن بەينەسى -قولادان، جازۋعا ارنالعان بولىگى گرانيتتەن جاسالعان.

سۇلباسىنىڭ ۇزىندىعى-3,87 م. ال پوستامەنتتىڭ بيىكتىگى -4,15 مەتردى قۇرايدى.
ايتا كەتەيىك، ماقاتاەۆتىڭ ەسكەرتكىشى ورنالاساتىن الاڭدا اباتتاندىرىلدى. اتالعان جۇمىسقا وبلىستىق بيۋدجەتتەن 70,1 ملن. تەڭگە ءبولىنىپ، جۇمىستار اياقتالدى.
جەرىنىڭ كولەمى -0,30 گا. اۋماق تولىقتاي كوگالداندىرىلىپ، جارىق شامدارى ورناتىلىپ، سۋعارۋ جۇيەسى جۇرگىزىلدى، كىشى ساۋلەتتىك كەسەنەلەر ورناتىلدى.

مۇزبالاق اقىن مۇقاعالي ماقاتاەۆتىڭ 90 جىلدىق تورقالى تويىنىڭ شەڭبەرىندە ۇيىمداستىرىلعان ءىس-شارالاردىڭ بارىسىندا، قر مەملەكەتتىك حاتشىسى قىرىمبەك كوشەرباەۆ، قر مادەنيەت جانە سپورت ءمينيسترى اقتوتى رايىمقۇلوۆا، الماتى وبلىسىنىڭ اكىمى اماندىق باتالوۆ اۋدان ورتالىعى نارىنقول اۋىلىنداعى 180 ورىندىق دەنە
شىنىقتىرۋ-ساۋىقتىرۋ كەشەنىنە باس سۇقتى.
عيماراتتىڭ اۋدانى-4800 شارشى مەتر.
نىسان ەكى قاباتتان تۇرادى. مۇندا ۆولەيبول، باسكەتبول، گاندبول، شاعىن فۋتبول سىندى كوماندالىق ويىندارعا ارنالعان جانە كۇرەس، بوكس پەن جاتتىعۋ زالدارى بار.

جاتتىقتىرۋشىلارعا ارنالعان جانە مەديتسينالىق، ماسساج كابينەتتەرى دە قاراستىرىلعان. 4 كيىم اۋىستىراتىن بولمە، 32 ورىندىق اسحانا، سونىمەن قاتار، توعىز قۇمالاق، دويبى شاحمات، ۇستەل تەننيسىنە ارنايى ورىندار دا جابدىقتالعان. قۇرىلىس جۇمىستارىن «فۋد مس» جشس جۇرگىزگەن.
ەستەرىڭىزگە سالامىز، سپورت كەشەنى اعىمداعى جىلى 14 ماۋسىم كۇنى قولدانىسقا بەرىلگەن بولاتىن.

Abai.kz