وڭتۇستىك كاۆكاز ايماعىندا تاعى دا تىنىشتىق بۇزىلدى. بۇل جولى ارمەنيا مەن ازەربايجان ەمەس، يران مەن ازەربايجان اراسىندا قىرعي قاباقتىق پايدا بولدى. 

يران بيلىگى قاراباقتى ازات ەتۋ سوعىسىندا يزرايل كۇشتەرى كاۆكازعا كىرىپ الدى دەگەن ويدا. ولار دالەل رەتىندە ازەربايجاننىڭ باسقىنشىلارعا قارسى يزرايلدا شىعارىلعان دروندار مەن ءتۇرلى زىمىران كەشەندەرىن كەڭىنەن قولدانۋىن ايتۋدا. «ءبىز ءوز شەكارامىزدا سيونيستىك جۇيەنىڭ گۇلدەنۋىنە جول بەرمەيمىز»، - دەيدى يران بيلىگى.

يران ازەربايجانعا ەسكەرتۋ رەتىندە تۇركيا مەن ازەربايجان شەكاراسىنىڭ ماڭىندا، ياعني ناحيچەۆان تۇبىندە اسا قاۋىپتى مانەۆرلار جاساۋعا كوشتى. ءتىپتى تىكەلەي ەسكەرتپەلەر جاساۋدان دا تايسالار ەمەس. اتاپ ايتقاندا ءداپ قازىر يران مىڭداعان اسكەر، تانك، ۇشاقتار مەن تىكۇشاقتار، زىمىران كەشەندەرىن جىلجىتىپ شەكارا ماڭىندا اسكەري جاتتىعۋ باستادى. اسكەري جاتتىعۋدىڭ اتاۋى دا ەرەكشە. «حايباردى باعىندىرعاندار» دەپ اتالادى. بۇل 7 عاسىردا پايعامباردىڭ مەدينە قالاسىنىڭ ماڭىنداعى ەۆرەيلەر تۇرعان تۇراقتى باسىپ العان شايقاسىنىڭ اتىمەن اتالۋدا. جاتتىعۋدىڭ نەگە ولاي اتالعانى دا تۇسىنىكتى.

يران قاراباق سوعىسىندا ازەربايجانعا يزرايل اسكەريلەرى كىرىپ الدى دەگەن كۇدىگىنە جاۋاپ. باكۋ يزرايل قارۋلارىن ساتىپ العانى راس، زىمىرانعا قارسى كەشەندەر، دروندار مەن وزگە دە اسكەري تەحنيكالاردى الدى. ەندى تەگەران «ازەربايجان اۋماعىنان يزرايل بىزگە سوققى جاساۋى مۇمكىن، وعان جول بەرمەيمىز»، دەپ وتىر. ازەربايجان يزرايلمەن ونداي كەلىسىمگە بارا قويۋى ەكىتالاي. بىراق تەگەراندى ول قىزىقتىرمايتىن سياقتى. سوڭعى ۋاقىتتا يزرايل ارنايى جاساقتارى يراننىڭ ىشىندە جانە تاياۋ شىعىستا پارسىلارعا بىرنەشە سوققى بەردى. يادرولىق سالاداعى ماماندار مەن يراننىڭ اسكەري زاۋىتتارىنا قارسى باعىتتالعان ارنايى وپەراتسيالاردىڭ ارتىندا يزريال كۇشتەرى تۇرعانى دا انىقتالىپ جاتىر.

يراننىڭ اسكەري ارەكەتىنە تۇركيا مەن ازەربايجان بىرلەسە جاۋاپ بەرمەك. 5 قازان كۇنى ەكى ەلدىڭ «ماڭگى باۋىرلاستىق-2021» دەپ اتالاتىن بىرىككەن اسكەري جاتتىعۋى ناحيچەۆاندا باستالدى. وعان ارنايى جاساق كۇشتەرى، سوققى جاساۋشى دروندار، ارتيللەريا مەن تانكتەر قاتىسىپ جاتىر. تۇركيا مەن ازەربايجان اراسىنداعى اسكەري ۇشاقتاردىڭ جوسپاردان تىس ۇشۋى دا ارتقان. تۇركيا يران شەكاراسىنىڭ ماڭىندا بارلاۋشى دروندارىنىڭ سانىن ارتتىرعان.

ال كۇنى كەشە يران ءوزىنىڭ اۋە كەڭىستىگىن ازەربايجاننىڭ اسكەري ۇشاقتارى ءۇشىن جاپقانى بەلگىلى بولدى. تەگەران اۋە كەڭىستىگىن جاۋىپ قانا قويماي، ازەربايجاندى ستراتەگيالىق قاتەلىكتەر جاساۋدان اۋلاق بولۋعا شاقىردى. ال ازەربايجاندا يراننىڭ رۋحاني كوسەمى سايد ءالي اتىنداعى ورتالىق جابىلدى. ونى باكۋ ەلدەگى پاندەميالىق جاعدايمەن تۇسىندىرۋدە، الايدا ساراپشىلار ونىڭ ارتىندا ساياسي قادامدار جاتىر دەگەن ويدا.

«يراننىڭ ارەكەتى ۇركىتۋ مەن قورقىتۋ، بار بولعانى ەسكەرتۋ جاساۋ عانا. باسقا پيعىلى جوق دەپ ويلايمىن. اسكەري قاقتىعىس بولۋى ەكىتالاي»، دەيدى اعىلشىن اسكەري ساراپشىسى دجەيك مەلليس. يراننىڭ ىشكى ەكونوميكالىق الەۋەتى دە قيىنداپ كەتكەن. اتاپ ايتقاندا بيىل يراندا اۋىز سۋ تاپشىلىعى مەن قۇرعاقشىلىق رەكوردتىق دەڭگەيگە جەتكەن، ال كوروناۆيرۋستىق شەكتەۋلەر حالىقتىڭ جاعدايىن ءتىپتى ناشارلاتىپ جىبەردى. بيلىك حالىققا «ءبىز مىقتىمىز» ۇرانىن تاعى ءبىر كورسەتۋ ءۇشىن وقىس قيمىلدار جاساۋدا. تۇركيا مەن ازەربايجاننىڭ اسكەري وداقتاستىعى دا تەگەراندى الاڭداتاتىنى انىق. دەي-تۇرا تەگەراننىڭ ۇرەي سالۋ قيمىلى الدىمەن وزىنە زيانىن تيگىزۋدە. جاتتىعۋ بارىسىندا ءۇش جاۋىنگەر تىكۇشاقتان قۇلاپ، التى جاۋىنگەر ارتيللەريالىق سوققىدان كوز جۇمعانى بەلگىلى بولدى.

Abai.kz