دۇيسەنبى, 17 قاڭتار 2022
46 - ءسوز 1129 1 پىكىر 21 قازان, 2021 ساعات 16:29

مۇسىلمانداردىڭ عىلىم مەن تەحنولوگياعا ىلەسۋى زامان تالابى

ءححى عاسىرداعى الەمنىڭ، ونىڭ ىشىندە مۇسىلمان ەلدەرىنىڭ جاڭارۋعا، عىلىم مەن تەحنولوگيالارعا ىلەسۋى زامان تالابى بولىپ تابىلادى. نازار اۋدارارلىعى – ءدىني داستۇرلەرىن قاتاڭ ۇستانعان ساۋد ارابياسى، يران سىندى ەلدەردىڭ ءوزى بۇگىندە عالامدىق مودەرنيزاتسيا ۇدەرىسىنە قارقىندى ەنۋ ۇستىندە. سونىڭ ءبىر كورىنىسى سيپاتىندا اتالعان ەلدەردىڭ جاستارى بەتتى بۇركەمەلەۋ، ۇزىن ساقال قويۋ، قىز-بالانى وقىتپاۋ ءيا جۇمىس ىستەتپەۋ سەكىلدى ەسكىلىكتىڭ رامىزدەرىنەن الشاقتاۋدا.

البەتتە مۇنىسى ءدىني ۇستانىمىنان قول ءۇزۋدى بىلدىرمەيدى، قايتا ونى ۋاقىت تالابىنا ساي جاڭعىرتۋ مەن يكەمدەۋگە كەلىپ سايادى. اينالىپ كەلگەندە سەنىم-نانىم اتاۋلى ەسكىلىكتى كوز جۇما قايتالاۋ عانا ەمەس، قايتا الدىڭعى بۋىنداردىڭ رۋحاني عيبراتىن زامان تالابىنا ساي قورىتىپ كادەگە جاراتا ءبىلۋدى العا تارتادى.

كەرەك دەسەڭىز وسىنداي بىرەگەي قابىلەتىنە بولا ءدىن عاسىرلار بويىنداعى ومىرشەڭدىگىن ساقتاپ، ءورىسىن كەڭەيتۋمەن كەلدى ەمەس پە. دەمەك، وركەنيەتتىڭ ءبىرىزدى دامۋىن توقىراتۋعا اۋەز، بۇگىن مەن ەرتەڭدى وتكەنگە عانا باعىنىشتى ەتپەك كۇشتەر كادىمگى ءومىر فيلوسوفياسىنا قارسى شىعىپ وتىرعانى ايتپاسا دا تۇسىنىكتى. ال ەندى ءدىننىڭ جاسامپاز الەۋەتىنە جۇگىنگەننەن كورى ونىڭ اتىن جامىلعان قاۋىپتى يدەولوگيانىڭ ەتەك جايۋى، البەتتە، جەكەلەگەن مەملەكەتتىڭ السىزدىگىن بىلدىرەدى. اسىرەسە اتالعان جاعداي ماتەريالدىق قۇندىلىقتاردى ءبىرىنشى ورىنعا شىعارىپ، رۋحانياتقا نەمقۇرايلىق تانىتقان، تاريحى مەن ۇلتتىق بولمىسىنان قول ۇزگەن، ءوز جولىمەن جۇرمەي وزگەگە ەلىكتەۋىش كەلەتىن ەلدەرگە ءتان قۇبىلىس. جانە كەرىسىنشە وزىنە سەنىمدى دە جاۋاپكەرشىلىگىن ۇعىنىپ ءتول بولمىسىن ساقتاعان قوعام دەر كەزىندە ارەكەتتەنىپ زور پالەنىڭ الدىن الۋعا قاۋقارى جەتەدى.

سايىپ كەلگەندە اباي، شاكارىم، ماعجان، ءماشھۇر ءجۇسىپتى وقىپ-ءبىلىپ، ىشكى جان-دۇنيەسى مىعىم ۇرپاق كەلىمسەك اعىمداردىڭ ارباۋىنا تۇسپەسى انىق.

راسۋل جۇمالى

Abai.kz

1 پىكىر