پرەزيدەنت قاسىم-جومارت توقاەۆتىڭ پارلامەنت سەسسياسىنىڭ باستالۋىندا ءسوز باستاۋى داستۇرگە اينالۋدا. مەملەكەت باسشىسىنىڭ 1 قىركۇيەكتەگى جولداۋى ونىڭ ءۇشىنشى جولداۋى. بۇل جولداۋ مازمۇنى باي بولعانىمەن، ناقتى ۇندەۋلەردى قامتيدى.

قۇندىلىقتار، ماقساتتار بىرلىگى، ورتاق تاپسىرمالاردى ءتۇسىنۋ – بۇگىنگى كۇننىڭ باستى تالاپتارى. بۇل جەردە بيلىك پەن قوعامدى ورتاق ۇلتتىق ماقساتتارعا باعىتتايتىن پرەزيدەنتتىڭ ءرولى ماڭىزدى. بيىلعى جولداۋدا تاكتيكا، ءارى ستراتەگيا جان-جاقتى قامتىلعان. زامان وزگەرۋى – زاڭدى قۇبىلىس. ەلدىڭ بۇرىنعى جاعدايى، ادامداردىڭ قارىم-قاتىناسى، ادامگەرشىلىك ۇستانىمدارى باسقاشا. سوعان سايكەستى الداعى ماقسات-مۇددە دە وزگە. پرەزيدەنت ءوز جولداۋىندا ناقتى ساندار، پايىزدىق كورسەتكىشتەر، ەسەپ-قيساپتى كەلتىرۋى ارقىلى حالىققا ۇعىنىقتى تىلدە اسا ماڭىزدى ماسەلەلەردى كوتەردى.

ەكىنشىدەن، پاندەميا جاعدايىنداعى احۋال. جەر بەتىن تۇگەل جايلاعان كەسەلدىڭ ۋاقىت وتكەن سايىن كەزەكتى تولقىنى، جاڭا شتاممدارى پايدا بولۋدا. قازاق ەلى عانا ەمەس، تۇتاستاي الەمدى اۋرەگە سالعان دەرتپەن كۇرەستە ءتيىمدى بولار ءادىس قانداي؟ بارلىق سالاعا دا كەرى اسەرىن تيگىزگەندىكتەن، قانداي قولداۋ تۇرلەرى جۇزەگە اسىرىلماق؟ اتالعان تاقىرىپتى، ەگجەي-تەگجەيلى تالداعان مەملەكەت باسشىسى مەديتسينا سالاسىنىڭ ولقى تۇستارىن دا سارالادى. راس، اتالعان سالا رەفورماسى كوپ، وزەكتى ماسەلەلەرى دە جەتكىلىكتى.

ءتىپتى، كوروناۆيرۋس كەسەلىنەن قورعانۋدىڭ جالعىز امالى رەتىندە ەكپە الۋ ۇسىنىلعانى بەلگىلى. اۋەلگى ۇستانىم بويىنشا، ەكپەنى ەگدە ادامدارعا الۋعا بولمايدى دەدى. كەيىن، ەۋروپا ەلدەرى قارتتاردى ۆاكتسينالايمىز دەپ، الدىڭعى بۋىن جاپپاي ەكپەگە جۇگىندى. ناۋقاستار سانى تۋرالى دا جالاڭ ساندار ەمەس، سالىستىرمالى دەرەكتەر، ناقتى مامانداردىڭ پىكىرىن ەل اراسىندا كەڭىنەن تاراتۋ ارقىلى عانا حالىقتى تاربيەلەپ، ەل ىشىندەگى قاڭقۋ ءسوز، جالعان اقپاراتتاردى جوققا شىعارا الامىز. سوندىقتان، مەملەكەت باسشىسىنىڭ مەديتسينا سالاسىنا ايرىقشا ءمان بەرىپ، پروبلەمالاردى اتاپ، ولاردى شەشۋ جولدارىن ۇسىنۋىن جاڭا جولداۋدىڭ نەگىزگى ەرەكشەلىكتەرىنىڭ بىرىنە بالار ەدىم.

جولداۋ قۇر ءسوز ەمەس. ەلدەگى وزەكتى ماسەلەلەردى سارالاعان پرەزيدەنت ناقتى كارتينانى كوز الدىمزعا اكەلدى. جالاقىسى از ماماندىقتاردى اتاپ، ولاردى قولداۋ تەتىكتەرىن جاريالادى. سۋبسيديا اينالاسىنداعى ۇكىمەت كومەگىن تالان-تاراجعا سالۋدى سىناپ، شۇرايلى جەرلەردى ادام كىرمەيتىندەي قورشاپ قويعان دوكەيلەرگە اكىمدەردىڭ «ءتىسى باتپايتىنىن»، مينيستر اۋىسسا، رەفورما دا اۋىساتىنىن سىناپ، حالىق كوكەيىندەگى ماسەلەلەردى ءدوپ باستى. سونىسىمەن دە، ءوز ماڭىزىن ارتتىرا تۇسپەك.

جولداۋ جاريالاندى. ماقسات ايقىن. ەندىگى جەردە اتالعان ماسەلەلەردىڭ وڭ شەشىمىن تابۋ جولىندا جۇمىلا قىزمەت ەتكەن ءجون دەپ بىلەمىن.

اسەم رىسقۇل، فيلوسوف

Abai.kz