تاتارستان پارلامەنتى «رف سۋبەكتىلەرىندە قوعامدىق بيلىكتى ۇيىمداستىرۋدىڭ جالپى قاعيدالارى تۋرالى» فەدەرالدى زاڭ جوباسىن قولدامادى. اتالعان قۇجات بارىنەن بۇرىن بۇكىل ەلدەگى رف سۋبەكتىسىنىڭ باسشىسى – جوعارى لاۋازىمدى تۇلعانىڭ جاڭا اتاۋىن بەكىتۋگە ءتيىس بولاتىن. بۇل جايىندا kznews.kz حابارلادى.

تاتارستان – ەل باسقارۋشىسى «پرەزيدەنت» دەپ اتالاتىن رەسەيدەگى ەڭ سوڭعى ايماق.

قىركۇيەكتىڭ سوڭىندا دەپۋتات پاۆەل كراشەننيكوۆ پەن سەناتور اندرەي كليشاس گوسدۋماعا وڭىرلىك بيلىك تۋرالى جاڭا زاڭ جوباسىن ەنگىزدى.

مۇندا رەسەي ءوڭىر باسشىلارىنىڭ ەكى مەرزىمنەن ارتىق ۋاقىتقا قاتارىنان سايلانۋ قۇقىعى ەسكەرىلگەن. قۇجاتتا سونىمەن قاتار رف سۋبەكتىسى باسشىسىنىڭ اتاۋىن وزگەرتۋ ماسەلەسى قاراستىرىلعان.

دۇيسەنبىدە تاتارستان پارلامەنتى فەدەرالدى زاڭدى قولدامايتىنىن ءبىراۋىزدان اشىق مالىمدەدى.

«ءبىزدىڭ ويىمىزشا، زاڭنامانىڭ جەكەلەگەن ەرەجەلەرى رف دەموكراتيالىق فەدەراتيۆتى قۇقىقتىق مەملەكەت رەتىندەگى كونستيتۋتسيا جۇيەسىنە قاراما-قايشى. بۇل رەداكتسياداعى زاڭ جوباسى سۋبەكتىلەردى مەملەكەتتىك باسقارۋ ورگاندارىنىڭ قىزمەتىن رەتتەۋدىڭ قۇقىقتىق نەگىزدەرىنىڭ جالپى قاعيدالارىن بەكىتۋدەن تىم الشاق كەتكەن»، – دەپ ءمالىم ەتتى مەملەكەتتىك كەڭەستىڭ مەمقۇرىلىس جونىندەگى كوميتەتىنىڭ باسشىسى البەرت حابيبۋللين.

حابيبۋللين بۇل زاڭ بويىنشا پىكىرتالاس قاجەت ەمەستىگىن ايتىپ، ونى گوسدۋمادا ءبىرىنشى وقىلىمدا قارالعان جاعدايدا عانا قايتا تالقىلاۋدى ۇسىندى.

تاتارستان پرەزيدەنتى رۋستام ميننيحانوۆ – ماسكەۋ مەرى سەرگەي سوبيانين، شەشەنستان باسشىسى رامزان قادىروۆ سەكىلدى وسىعان دەيىنگى ەل باسقارعان مەرزىمى جويىلۋى مۇمكىن بيلىك وكىلدەرىنىڭ ءبىرى.

تاتارستان بيلىگى ەڭ اۋەلى ءوز كونستيتۋتسياسىندا سۋۆەرەنيتەتتىڭ ساقتالۋى ءۇشىن كۇرەستى، كەيىننەن رەسپۋبليكا باسشىسىنىڭ اتاۋىن «پرەزيدەنت» دەپ قالدىرۋ ءۇشىن جانتالاستى.

ايتا كەتەيىك، رەسەيدە 2010 جىلدان بەرى رەسپۋبليكا پرەزيدەنتتەرىنىڭ اتاۋىن وزگەرتۋ ءۇردىسى ءجۇرىپ جاتىر. بۇل اتاۋدان العاشقىلاردىڭ ءبىرى بولىپ شەشەنستان باسشىسى رامزان قادىروۆ باس تارتقان ەدى.

ول «بىرىڭعاي مەملەكەتتە تەك ءبىر عانا پرەزيدەنت بولۋى كەرەك» دەپ مالىمدەگەن بولاتىن.

وسىلايشا ەلدەگى 12 رەسپۋبليكانىڭ 11-ءى ءوز جەتەكشىلەرىنىڭ اتاۋىن وزگەرتىپ، «پرەزيدەنت» دەگەن ءسوزدى الىپ تاستادى.

مۇندا تەك تاتارستان عانا بۇل باستاماعا بەلسەندى قارسىلىق ءبىلدىرىپ، 2016 جىلعا دەيىن ويلانۋعا مۇمكىندىك العان ەدى.

كەيىن رف پرەزيدەنتى ۆلاديمير پۋتين ءوز ءوڭىرىنىڭ باسشىسىن قالاي اتاۋدى تاتارستان حالقى ءوزى شەشسىن دەگەن پىكىر ءبىلدىردى. ال 2017 جىلى اتالعان كەلىسىمنىڭ ۋاقىتى اياقتالدى.

ەندى تاتارستان پارلامەنتى «پرەزيدەنتتەن» باس تارتپايتىنىن تاعى دا ءبىلدىرىپ، جاڭا زاڭ جوباسىن قولدامايتىنىن ءمالىم ەتتى.

Abai.kz