لوندون وليمپياداسىنىڭ باستالۋىنا ءبىر كۇن قالعاندا، اۋىر اتلەتيكادان قازاقستان قۇراماسىنىڭ قاتارىندا وزگەرىس ورىن الدى. بۇگىنگە دەيىن باسشىلار مەن باپكەرلەر ماقتاۋىن اسىرىپ، لوندون وليمپياداسىندا التىندى قوس-قوستان الىپ بەرەدى دەگەن فارحاد حاركي مەن چونتەي ارلي ساپتان شىعىپ قالدى. ولاردى ساپتان شىعارعان  - حالىقارالىق اۋىر اتلەتيكا فەدەراتسياسى.

ماۋسىم ايىندا تالدىقورعان قالاسىندا  اۋىر اتلەتيكادان قازاقستان چەمپيوناتى ءوتىپ، سول دودادان ىرىكتەلگەن زىلتەمىرشىلەر لوندون وليمپياداسىنا قاتىساتىن بولىپ شەشىلگەن. قازاقستان قۇراماسىندا جالپى ەسەبى 8 جولداما بولدى، ونىڭ تورتەۋى ەرلەرگە، قالعان تورتەۋى ايەلدەرگە تيەسىلى ەدى. قىزداردىڭ جاراسى جەڭىلدەۋ، سەبەبى، مايا مانەزا، ءزۇلفيا چينشانلو، سۆەتلانا پودوبەدوۆالاردىڭ وليمپياداعا باراتىنى ەش كۇمان تۋعىزعان جوق. ال، ەرلەر اراسىندا تەك يليانىڭ وليمپيادادان سىرت قالمايتىنىنا سەنىمدى ەدىك. الماس وتەشوۆ، ۆلاديمير سەدوۆ، سەرگەي يستوميندەردى لوندون تورىنەن كورىپ قالارمىز دەپ جۇرگەندە...

لوندون وليمپياداسىنىڭ باستالۋىنا ءبىر كۇن قالعاندا، اۋىر اتلەتيكادان قازاقستان قۇراماسىنىڭ قاتارىندا وزگەرىس ورىن الدى. بۇگىنگە دەيىن باسشىلار مەن باپكەرلەر ماقتاۋىن اسىرىپ، لوندون وليمپياداسىندا التىندى قوس-قوستان الىپ بەرەدى دەگەن فارحاد حاركي مەن چونتەي ارلي ساپتان شىعىپ قالدى. ولاردى ساپتان شىعارعان  - حالىقارالىق اۋىر اتلەتيكا فەدەراتسياسى.

ماۋسىم ايىندا تالدىقورعان قالاسىندا  اۋىر اتلەتيكادان قازاقستان چەمپيوناتى ءوتىپ، سول دودادان ىرىكتەلگەن زىلتەمىرشىلەر لوندون وليمپياداسىنا قاتىساتىن بولىپ شەشىلگەن. قازاقستان قۇراماسىندا جالپى ەسەبى 8 جولداما بولدى، ونىڭ تورتەۋى ەرلەرگە، قالعان تورتەۋى ايەلدەرگە تيەسىلى ەدى. قىزداردىڭ جاراسى جەڭىلدەۋ، سەبەبى، مايا مانەزا، ءزۇلفيا چينشانلو، سۆەتلانا پودوبەدوۆالاردىڭ وليمپياداعا باراتىنى ەش كۇمان تۋعىزعان جوق. ال، ەرلەر اراسىندا تەك يليانىڭ وليمپيادادان سىرت قالمايتىنىنا سەنىمدى ەدىك. الماس وتەشوۆ، ۆلاديمير سەدوۆ، سەرگەي يستوميندەردى لوندون تورىنەن كورىپ قالارمىز دەپ جۇرگەندە...

قر اۋىر اتلەتيكا فەدەراتسياسى بىزدەرگە «توسىن سىي» جاسادى. بۇرىن-سوڭدى ءبىز ءجۇزىن كورمەك تۇگىلى، اتىن ەستىمەگەن ەكى قىتايلىق زىلتەمىرشى ءزىلباتپان تەمىردى بۇيىم كورمەي، قازاقستان چەمپيوناتىنىڭ التىنىن جەڭىپ الدى. ونى قويشى، باپكەرلەر قاۋىمى ءبىراۋىزدان فارحاد حاركي مەن ارلي چونتەيدى وليمپياداعا اپارامىز دەپ شەشتى. الەكسەي ني شەشىمىن وزگەرتپەي: «قالعان زىلتەمىرشىلەر وزدەرىنەن كورسىن!» دەپ، قولدى ءبىر سىلتەگەن سوڭ، باپكەرلەردىڭ ءبىر بىلگەنى بار شىعار دەدىك. بىراق، بەيجىڭ وليمپياداسىندا قولاعا قول سوزىم جەردەن قايتىپ، 2009 جىلى الەمدى باعىندىرعان ۆلاديمير سەدوۆتىڭ تۇماندى البيونعا بارمايتىنى جانكۇيەر جانىنا باتقان.

ەندى، وليمپيادا باستالۋىنا ەكى كۇن قالعاندا قازاقستان اۋىر اتلەتتەرى اراسىنان شي شىقتى. قىتاي رەسپۋبليكاسى حالىقارالىق اۋىر اتلەتيكا فەدەراتسياسىنا شاعىم ءتۇسىرىپ، فارحاد پەن ءارليدىڭ قازاقستان ازاماتتىعىن العانىنا ءبىر جىل تولماعانىن كورسەتىپتى. ءيا، حالىقارالىق وليمپيادا كوميتەتىنىڭ زاڭى بويىنشا، ازاماتتىعىن اۋىستىرعان سپورتشى سول مەملەكەتتە 3 جىل تۇرمايىنشا، وليمپيادا ويىندارىنا قاتىسا المايدى. ءدال وسىنداي سەبەپپەن قانات يسلام لوندونعا جول تارتپادى، ءتورت جىل بۇرىن سۆەتلانا پودوبەۆانى رەسەي تاراپى وسى زاڭنان اتتاتقان جوق. وسىنى بىلە تۇرا، قازاقستان ازاماتتىعىن العانىنا كوپ بولا قويماعان قىتايلىقتاردى وليمپياداعا اپارامىز دەپ شەشكەن قر اۋىر اتلەتيكا فەدەراتسياسىنىڭ باسشىلارى ءبىلىمسىز بە؟! ارينە، ولار دا اقىماق ەمەس. حالىقارالىق فەدەراتسيانىڭ «ءتىلىن تاپقان شىعار». بىراق، سپورتى قارىشتاپ، مەديتسيناسى عارىشقا قاراي كەتىپ قالعان قىتايدى الداۋ كىمنىڭ قولىنان كەلەدى؟ قىتاي باسشىلىعى ءبىزدىڭ باپكەرلەردى الىسقا اپارماي-اق، وليمپيادا الدىندا ساباسىنا ءتۇسىردى.

راسى كەرەك، فارحاد پەن چونتەي وليمپياداعا قاتىسپايدى دەپ ءىشىمىز كۇيىپ، جەر تارپىپ وتىرعان جوقپىز. ولاردىڭ ۇلتتىق قۇراماعا قوسىلۋى فەدەراتسيا تىزگىنىن ۇستاعان ادامدار ءۇشىن عانا قولايلى بولدى. جانكۇيەرلەر ءاۋ باستان بۇل سپورتشىلاردىڭ قاتارعا قوسىلعانىن جاراتپادى. بىراق، وتكەلدە ات اۋىستىرمايدى ەمەس پە؟! ەندى لوندونعا رەزەرۆتەگى ەكى زىلتەمىرشى الەكساندر زايچيكوۆ پەن كيريلل پاۆلوۆ قاتىسادى. ەكەۋى دە جاس زىلتەمىرشىلەر، ەكەۋى دە «ۆ» توبىندا سىنعا تۇسەدى. جۇلدەگە تالاسپاي اق قويسىن، تۇماندى البيونداعى عالامدىق جارىستان تاجىريبە جيناپ قايتقانىنىڭ ءوزى جەڭىس ءبىز ءۇشىن. بىراق، مەدال جوسپارى شە؟! الەكسەي ني باستاعان باپكەرلەر 5 التىن الامىز دەپ اۋىز تولتىرىپ ايتىپ ەدى. ولار الگى ەكى قىتايلىققا ارقا سۇيەگەن  بولاتىن. ونىڭ ۇستىنە، وليمپيادا باستالارۋىنا ءبىر كۇن قالعاندا سايىسقا قاتىساتىنىن بىلگەن كيريلل مەن الەكساندردىڭ دا دايىندىعى كەرەمەت ەمەس قوي. وسى تۇرعىدا ءبىزدىڭ باپكەرلەر قاتە جىبەردى...

ەكى قىتاي ازاماتى دا قازاقستانعا كەلەر الدىندا قىرعىزستان ازاماتتىعىن العان. الاتاۋدىڭ ارعى بەتىندە قىتايلىقتار ءۇشىن ازاماتتىق الۋدىڭ اسا قيىن ەمەستىگىن بىلەسىز. ەندەشە، قىرعىزستان ارقىلى قىتاي اتلەتتەرىن اكەلۋ قازاقستانعا ءتيىمدى! بيرەسمي اقپاراتقا سۇيەنسەك، ارلي چونتەي 2009 جىلدان بەرى قازاقستاندا ءجۇر ەكەن. ءتىپتى،ونىڭ شىن اتى جانگ ۆەي دە بولۋى مۇمكىن...

وسىلايشا، قازاقستانداعى قىتايلىق اۋىر اتلەتتتەر لوندون سىرتىنان كەرى قايتتى...

«ماسا-اقپارات»